Jon 2:10-25

¹⁰Tama asama, agai te bidibolo te po wali, “Tigidali bidigo da, augwaligo dwagi yai bomo ąį wain polo dobabo dao. Tama nosali, augwali bidi dabego te ąį hauwa tulama, tama augwaligo dobo ąǫ yali ąį te dobabo dao. Tiali goli, nago naga dwagi yai ąį wain naga dąų olaluama, tama megi tama nago sela asalio,” agai te po wai.

¹¹Te bomai sę Jisasgo yali bomai sę hasia mu yai. Te Jisas agai te Galili tǫ pedai badu tomode, te dwasianu be nani nogi Kana, tede te sę yai. Tama Jisas aga bomo augwalibolo ola mawai, tama Jisas aga wali pabo bidi augwa Jisasba homu tigidali muai.

¹²Te sę silama, tama Jisas aga Kaperneam buluba pai. Aga ida me, aga ama dede me, aga wali pabo bidi dabe me, augwali hodobo pai, tama augwali te bulu Kaperneamde osogo bidigi pai, si sela sogo bidai.

¹³Te Juda bage augwaligo bo disąwai bret tuabo side te pąde tama o, te si nogi Pasova dao. Tama Jisas aga te Jerusalem moni be naniba pai.

¹⁴Tama Jerusalem be nani tomoba sabolama, tama te Moni Lotu Be tempel tomode Jisas agai suali, augwali bidi dabe augwa kibu bulmakau me, kibu sipsip me, ba dabe, tama augwaligo te naide maket ebo sę eyu, te Moni Lotu Be tempel tomode yai, we bidi augwaligo te nai si dobu eyu abelama, Godibolo momainogo yai. Tama Jisasgo suali, ma gasa bulu masigi dobu si ebo bidi dabe da augwali ni nami pąde dulalubo suali.

¹⁵Tama Jisasgo te sę sulama, tama agai bono dabe selama, bį nigai. Bį nigilama, agai te kibu bulmakau dali kibu sipsip dali tigidali te tempel bede augwali bįgo elama, buluba gudulai. Tama Jisas agai te masigi dobu si ebo bidi dabego masigi dali ni nami dali gea palali.

¹⁶Tama agai ba dabe dobu si ebo bidi dabebolo te po wai, “Te nai sela pao,” wai. “Dagego eno ayago be te nai dobu ebo be tiwai egio,” Jisasgo augwali dali te po wai.

¹⁷Jisas aga wali pabo bidi dabe augwaligo po me Godigo po bukude wali po me ma koneai. Te bukude te po wai, “Eno homugo nago be tonalubo homu bomo ebo dao. Tama augwaligo enabolo dene mawaibao.”

¹⁸Te Juda dabe augwaligo te sulama, Jisas dali te po wai, “Mena bidigo nagebolo ‘Te nai sela sąyao,’ obaso, tama nago te nai dabe sela sąyaniwe? God agai nagebolo te po weyu da, teda nago naga moni bomai sę me deli yao. Tama dago nago te sę ebo sulama, Godigo nagebolo ‘Te sę yao’ wali dago koneaibao,” Juda dabe augwaligo Jisasbolo te po wai.

¹⁹Tama Jisasgo po wei ponoyu, te po wai, “Dagego e lotu be tempel hųgibaso, tama sela sogo eno polo te be ma sę yaibao,” Jisasgo te po te Juda dabe dali wai.

²⁰Tama Juda bage augwaligo te po wai, “Te tempel Moni Lotu Be sę yani kibu be bidi sese si olama, tama a naga olama, me badu nogo deli badu kibu be te be sę yai dao,” te po wai. “Tama dago te be hųgilama, tama sela sogo nago te be polo me sę yaibawe? Woo, nage usu egobeo,” te po Jisas dali wai.

²¹Tialima, Jisasgo te tempel lotu be po wali aga tigide po wali, te Moni Lotu Bede meni.

²²Tilama, tama nosali Godigo Jisas gų pagede ma hodolai, te sogo Jisas aga wali pabo bidi dabe augwaligo Jisasgo polobadu te wali po augwaligo ma koneai. Tama augwaligo Godigo bukude muani po dali, Jisasgo wali po dali, te po siba augwa homu muai.

²³Te bidi Jisas bo disąwai nai bret tubo side, te Pasova side, aga Jerusalem bulude bidibadi, tama we bidi hauwa augwaligo agai bomo yai sę ebo suai. Tama sulama, tama augwaligo augwa homu tigidali Jisasba muai. Augwaligo te homu yai, aga te Godigo sa muyu, asaiba wali bidi dao.

²⁴Tialima, Jisasgo te homu yai, augwaligo konesiąbo ąǫ, te homu yai. Tama tibaso, Jisas aga digi augwaligo nogoba mubeo.

²⁵Magi basowe? Jisas aga digi te tigidali we bidigo homu mu konea silai. Gasa bidi mego agabolo te we bidigo homu me ola magobeo.