Jon 21:4-25

⁴Söra qahö öröba öne malgetka miri lök giaŋiiga Jisösnöŋ saknöŋ kinök. Kinökmö, yaŋgö kaisoŋgolomŋi mi qahö ek kutuget.

⁵Jisösnöŋ kinda eŋgohola jiyök, “Alaurupni, söra kun öröze me qahö?’ Jiiga meleŋda “Qahö!” jiget.

⁶“Qahö!” jigetka kewö jim kutum eŋgiyök, “Iŋini mönö mösakŋini waŋge ölŋe göröken gilgetka eri ölöp söra miwikŋaime.” Mi möta mösakŋini gilgetka söra sehisehiŋi geba ölökögeraŋgöra öröget kotmapkö osiiga öröm suksuköget.

⁷Mewö aiga Jisösgö wölböt gwarekŋi miaŋön Saimon Pitö kewö jii mörök, “Mi mönö Kembuya!” Mewö jiiga Kembugö qetŋi möta opo bindoŋanök jöhöba malöhaŋgöra silepökeŋi köpeiba miaŋgöreŋök o aŋgönöŋ luhuba geyök.

⁸Yeŋön sak qöhöröŋe 100 mita miaŋgö dop kösutŋe anda malget. Miaŋgöra Pitönöŋ geba ani gwarek tosatŋi yeŋön waŋge lökuatnöŋ qem naŋgöba anda mösak söraŋambuk örögetka waŋge andöŋe kayök.

⁹Mewö kaba sak körikŋe öŋgöba miaŋgöreŋ yuai kewö eket: Könöp jeiga gapnöŋ söra jejeŋi aka beret soŋsoŋ ahöyök.

¹⁰Mi eketka Jisösnöŋ kewö jii mötket, “Iŋini dölki söra örözei, mönö miaŋgöreŋök tosatŋi memba ki kaget.”

¹¹Mi jiiga Saimon Pitönöŋ möta waŋgenöŋ öŋgöba mösak öröiga körikŋe öŋgöyök. Öŋgöiga ölŋi 153 eket. Mösak mi söra ketaŋi sehisehiŋi mieŋön kokolak qegetmö, mösaknöŋ töndup qahö tiŋgirök.

¹²Ölŋi mi eketka Jisösnöŋ kewö jii mötket, “Mönö kaba söŋangö neneŋi neget!” Mewö jii möta kaba “Mi Kembunina,” mewö möt kutugetmö, gwarek yeŋgöreŋök kunŋan “Gi daŋön?” mewö qesimamgö urulömböt aka qahö qesiyök.

¹³Qahö qesiyökmö, Jisösnöŋ anda beret memba eŋgiba söra mewöyök mendeŋda eŋgiyök.

¹⁴Jisösnöŋ kömupnöhök wahöta gwarekurupŋi asuhum eŋgiyöhaŋgö indimŋi karöbut mi ahök. Mewö.

¹⁵Söŋangö neneŋi neget teköiga Jisösnöŋ Saimon Pitögöra kewö jii mörök, “Saimon Jongö nahönŋi! Alaurupki kieŋön ni uruŋinan jöpaköm niŋgimakzei, gi mönö i eŋgoŋgita gwötpuk jöpaköm niŋgimakzan me qahö?” Mi möta kewö meleŋnök, “O Kembu, ni göhöra ak niŋgimakza. Gi wölböt alani akzan. Mi nangak ölöp mötzan.” Mewö meleŋniga Jisösnöŋ jii mörök, “Gi mönö nöŋgö lamaurupni moröŋi gumohom eŋgiba malman.”

¹⁶Mewö jii möri indimŋi yahöt qesim waŋgiyök, “Saimon Jongö nahönŋi! Gi ölŋa jöpaköm niŋgimakzan me qahö?” Mi möta kewö meleŋnök, “O Kembu, ni göhöra ak niŋgimakza. Gi wölböt alani akzan. Mi nangak ölöp mötzan.” Mewö meleŋniga Jisösnöŋ jii mörök, “Gi mönö nöŋgö lamaurupni galöm köl eŋgiba malman.”

¹⁷Mewö jii möri indimŋi karöbutŋi qesim waŋgiyök, “Saimon Jongö nahönŋi! Gi mönö ölŋa wölbötkan (jojopaŋgan) nöŋgö ak gihimakza me qahö?” Mewö qesim waŋgiiga urujöjöpakö qeqesiŋi mohot miyök qesiiga indimŋi karöbut ahöhaŋgöra Pitönöŋ wösöbirik möta meleŋda kewö jiyök, “O Kembu, gi yuai pakpak ölöp möt teközan. Gi wölböt alani akzan. Göŋön mönö nangak mi ölöpŋanök mötzan.” Mewö jiiga Jisösnöŋ jii mörök, “Gi mönö nöŋgö lamaurupni gumohom eŋgiba malman.

¹⁸“Nöŋön keu öl töhönŋi kun kewö jibi mötnöŋ: Gi sepgulia mala nangak sileötaŋgi jöhöba köna igen me waigen ‘anmam,’ jiba ak gihiyöhaŋgö dop ölöp anda kaba malnöŋ. Mewö mala malnöŋmö, azi namŋi akŋani, nalö miaŋgöreŋ börögi böraŋnöŋga kunŋan kaba opo silepökegi jöhöm gihiba köna kungen qahö anmangö mötmani, mönö miaŋgöreŋ goaŋgiriga anman.”

¹⁹Jisösnöŋ kezapqetok keu mewö jiba Pitö kömumawaŋgö keu saiŋi indelök. Yaŋön kömup tandökŋi qainŋi kun kömuiga Anutugö qetbuŋaŋi qarimapköra mötmöriba mi jiyök. Keu mi jiba yaŋgöra jii mörök, “Gi mönö kaba ni nuataŋgöba malman!” Mewö.

²⁰Pitönöŋ Jisösbuk anda liliŋgöba Jisösgö wölböt gwarekŋan andöŋire kaiga ehök. Gwarek miaŋön ak-kömukömu lama negeri, miaŋgöreŋ nöröpŋan Jisösgö töptöpŋe nariba jiyök, ‘Kembu, göhöreŋ mamalolo azi mi daŋön?’

²¹Gwarek miaŋön könaŋire kaiga Pitönöŋ i eka Jisös kewö qesim waŋgiyök, “Kembu, gwarek kiaŋgöra mönö denöwö asuhuma?”

²²Qesim waŋgiiga kewö jii mörök, “Nöŋön yaŋgö malmal areŋi mewö me mewö albileŋak, mi mönö göhöreŋ waimanjara qahö. Nöŋön jibiga yaŋön qahö kömumba nöŋön gölmenöŋ liliŋgöba kamamaŋgö nalöŋe toroqeba jebuk mal öŋgöbawak, keu mi yaŋgö keuya akawak. Gi mönö yaŋgö keuŋi mosöta nangi malmalgi möhamgöba galöm köl aŋguba nöŋgö andöne kaba ni nuataŋgöba malman.”

²³Keu mewö jiiga tosatŋan laŋ möta jim sehigetka urumeleŋ alaurup yeŋgö sutŋine keu mi kewö jim sohoget, “Gwarek miaŋön qahö kömuma.” Mewö jim sohogetmö, Jisösnöŋ jebuk teteköŋi qahö mal öŋgömapköra qahö jiyökmö, keu kewö jiyök, “Nöŋön yaŋgö malmal areŋi mewö me mewö albileŋak, mi mönö göhöreŋ waimanjara qahö. Nöŋön jibiga yaŋön qahö kömumba nöŋön gölmenöŋ liliŋgöba kamamaŋgö nalöŋe toroqeba jebuk mal öŋgöbawak, keu mi yaŋgö keuya akawak. Gi mönö yaŋgö keuŋi mosöta nangi malmalgi möhamgöba galöm köl aŋguba malman.” Mewö.

²⁴Gwarek miaŋön yuai mi jeŋan eka mala miaŋgö dop mi naŋgöba jim asariba Ölöwak Buŋa ki ohoyök. Körek pakpak eŋön gwarek miaŋgö könaŋi mötzeaŋgöra aka ölöp tönguba kewö jiba malme, “Yaŋön keu naŋgöba jiyöhi, miaŋön mönö keu öl töhönŋi akza.”

²⁵Jisösnöŋ nup aka aŋgöletot tosatŋi sehisehiŋi mi mewöyök aka memba malök. Mieŋgö kösohotŋini mohot mohot mi lökŋanök törörök ohobinak ewö, mönö buk papia böranŋi böranŋi sehisehiŋi asuhugetka kantri dop papia köwe miri (laibreri) pakpak miaŋgöreŋ alinga kokolak qeba ölököiga tiŋi töndup qahö dop kölbawak. Mewö mötmörizal.