Jon 21:2-22

²Saimon Pita, Tomas (nyaran ari ja Didimus), Nataniyel iy badu Kana udu loboho Galili, ma nadu Sebedi uru ma la-uh, hawe uru lau tan la-uh ja, are hawe oro ale.

³Saimon Pita asehek toro anya, “Jo kameh ili asilah nato ni!” Oro asehek i tan anya, “Aso anya kawek hawem ale.” Eme oro ala a ndron hawen, oro asowe au ala len. Arile na ben ari ma buruwen oro bakohok ari ni bwe.

⁴Kon ndraleu ai, an edek eme loken, eme oro anyolom Jises ales udu bada babi, arile oro lau tan baseleyani iy bwe.

⁵Jises eme aloh ili toro, “Ado kawas tek, ari ni keme!” Oro anya, “Ni bwe!”

⁶Iy eme aloh i toro ja, “Ado kakahei kubwin tado kili bilisiu loboho lim salin ja, idah kameh ado akohok.” Oro ame akahei kubwin toro ili gwa ja, eme ni solo-an labai ihis udu bolo kubwin toro, ma oro winiyan baruwi kubwin hawe ni udu bolon bame loken bwe.

⁷Jo, iy lau nane Jises aso-ok labai, asehek i ta Pita, “Laban asah kodo-oh!” Saimon Pita anuhun le badeh, iy eme asini awin tan ili la-un suwi suwi, tasah awin tan nane iy ibo gok, eme iy asiniy iu. Iy eme sandrakon i gwa ma iy eya iu ili amik.

⁸Oro lau tan rayah ado ndra ndron ado gwek ariu kubwin hawe ni, ma oro asowe ame amik ale. Ndron toro badeh, bado len ta babi bwe, i buku mita rinek le.

⁹Oro asos bada babi le badeh, oro anyolom jabi ramen ma ni udu bolo mitihi jih.

¹⁰Ano Jises tiye toro, “Ado kakohok rayah ni nane ado akohok badeh, keme loken.”

¹¹Saimon Pita eme ili ndron ja, aseben oro ta ariu kubwin irek ta ni eme amik. Udu bolo kubwin badeh, ni ma rinek lomonoh taloh (153), iri ni ndra badan le, arile kubwin batarah bwe.

¹²Jises aloh ili toro, “Kame kaimon nyamon!” Ade oro lau tan a len sese ta ndremenya iy buku, “Ou are lau?” Tasah oro tanan, idoh Laban le ai.

¹³Jises eme ili kapa jih iy andrei jabi ramen, iy eme edeu ili noro lau tan. Ano, iy edeu ni ili noro i buku le aliy.

¹⁴Idoh badeh, i san tulusin ai, ta Jises ili asahan eme awas hawe oro lau tan amwenen, udu hamon ta iy ndramak ndrame awas ja.

¹⁵Udu hamon ta nyamon toro ano, Jises eme ndremenya Saimon Pita, “Saimon, nadu Jon, ou kede-eh aso-ok jo tinan labai ja, toro rayah kede-eh ja nadeh?” Pita anya, “Ehe Laban, ou ndratanam jo, jo badeh, aso-ok ou tinan labai i buku ari kawas.” Jises eme tiye i tan ja, “Ou atondrok iri nadu sipsip tek.”

¹⁶Jises asehek sahou le nane san rasan ja ili tan, “Saimon, nadu Jon, ou kede-eh aso-ok jo handru?” Iy anya, “Ehe Laban, ou ndratanam jo, jo badeh, aso-ok ou labai i buku ari kawas.” Jises eme tiye i tan ja, “Mwasin, ou atondrok iri sipsip tek.”

¹⁷Ili san tulusin ai, Jises asehek sahou le nane ili tan ja, “Saimon, nadu Jon, ou kede-eh aso-ok jo handru?” Eme bwidi Pita tikisiy, tasah Jises badeh, ndremenya iy san tulusin ai, ta sahou randra le doh, “Ou kede-eh aso-ok jo handru deh?” Eme iy asehek i tan, “Laban, ou tanam lakou marakon; ou ale ndratanam jo, jo badeh, aso-ok ou labai!” Jises eme asehek sahou ili tan ja, “Mwasin, ou atondrok iri sipsip tek.

¹⁸“Jo asehek tam handru: Mwena mene ou ma loweu, ou amwenen apeu balaban tam, ma ou adek ala kon solo-an ou aso-ok ta ala aliy. Arile ou ado, ou ala asahan alon, badeh kameh ou suri minem ili loken, ya ndramak ari ja kameh apeu balaban tam, ano iy sirini ou ala kon nane ou bwalem ta ala aliy.”

¹⁹Jises asehek iri sahou marakon nane doh ta leheya kandriyen ta Pita kameh iy imek i buku sah, eme iy atudun nyara Kindrei. Ano iy tiye Pita, “Ou ame an hamon tek.”

²⁰Pita tubuni madan, eme iy anyolom lau ta Jises ari nane nyaran Jon, Jises ale aso-ok iy tinan labai. Iy in hamon turu eme. Iy doh mene manyah udu mirihik hawe Jises aimon nyamon ado se. Iy ale mene atehei batun ili batala Jises ta ndremenya iy, “Laban, are lau handru kameh edeu sa-oh tam ili mine iri lau ta bahun?”

²¹Pita anyolom iy, eme iy ndremenya Jises, “Laban, iy i buku sah handru?”

²²Jises eme asumon iy, “Buku jo aso-ok iy kudu katondrok jo keme hamon, ya saba budon tam? Ou ame a-en hamon tek.”