1Kwasɨg ikɨn ye narɨmnar mɨnə e, Yesu rɨtərhav-pə mɨn tuk kafan narmamə mɨnə apa ye nɨkar-kar tahik apa Lugun Galili. Kɨni mamor əpu In.
2Ye nɨpɨg a, narmamə mɨnə kape Yesu kɨmnasəriwək kɨrikianə. Saemon Pita, mɨne Tomas e kamokrən kɨn kɨmə Didimas, mɨne Nataniel e yemə Galili, rukwanu kafan kamni kɨmə Kena, mɨne ji Sebedi mir, mɨne yermamə mir kɨraru mɨn kape Yesu.
3Saemon Pita rɨni-pən tuk əriə mə, “Yo yakamvən jakaruk kɨn net.” Kɨni khamə, “Inta. Pəh kɨtawə khavən.” Kɨni iriə fam kɨmɨsəsok pirə ye bot kɨrik. Mɨsaruk kɨn net a mɨseriaji reraan. Mərɨg khapəh nhaviyen kəmam kɨrik.
4Kɨni rɨnamraan, Yesu ruə mamərer i-fiak; mərɨg kafan narmamə mɨnə khapəh nharkunien mə Yesu.
5Kɨni In raiyoh əriə mə, “Ah. ?Nakhavi kəmam kɨrik, uə?” Mərɨg iriə khamə, “Nɨkam. Kəmam rɨkək.”