Jon 20:9-20

⁹(Tama te sogo augwaligo Godigo polobadu asęani po page konesiąbadi. God agai po te bukude asęyu, te po wai dao, “Aga gų pagede ma hodaluao,” te po wai. Te sogo augwaligo te po page konebeo.)

¹⁰Tama te bidi augwali sigo te sę tigidali sulama, tama augwali si augwa si beba ma pai.

¹¹Te we Maria te gų pageba ma sabolali, te bidi si augwali te ola be tomode bidibadi. Tama augwali si augwa si beba ma pelama, tama Maria te gų page ola be bulu badu gana dolaluyu, tama Maria aga gela udai. Aga gela udu digi, tama aga basi gulama, tama agai Jisas te muani ola be tomoba tonai.

¹²Tama Maria agai Godigo sę ebo ensel mobo bidi si tedela bobobage ugwa muai bidi si suai, te Jisas muani ola be tomode dulalubo suai. Tama te ensel mobo bidi me deli te Jisas tobolu muani digi dulaluyu, me te sągą muani digi dulaluyu yai, te Maria agai suai.

¹³Tama te ensel mobo bidi sigo Maria dali te po wai, “Te we, nage magi baso gela obawe?” te po wai. Tama Mariago augwali si dali te po wai, “Augwaligo eno Genuai Bidi selama, tama augwaligo menaba muaniwe, te eno konebeo,” Mariago te ensel mobo bidi si dali te po wai.

¹⁴Maria agai te po weyu, tama agai begelama suai, tama agai Jisas dolalubo suai. Tialima Mariago koneyu, te Jisas tama dao, te homu agai ebeo.

¹⁵Jisasgo Maria agabolo te po wai, “Magi baso nage gela obawe? Nago de gegeyu ebawe?” Maria agai te homu yai, te bidi aga e gi tonalubo bidigo agai te po aga dali wabowe, agai te homu yai. Tama agai te bidibolo te po wai, “Genuai bidi, nago te isali bidi tigi sela pali wida, te nago enabolo aga muani digi ola mao, tama eno aga sela paio,” wali.

¹⁶Jisasgo agabolo te po wai, “Mariao.” Tama Maria aga ma begelama, Jisas dali agai Hibru pogo weyu, “Rabonai,” te po wai. Te po page e tama wai, “Po ola mabo bidio,” te po wai.

¹⁷Jisasgo Maria dali te po wai, “Nago ena diągio. Ena eno Aya God bidibo digi dagaluba me pabeo. Tama tibaso, nago ena dąų ola sigio. Tialima, nage eno ama dabe bidibo digi pelama, augwali dali te po tama wagibao, ‘Ena eno Aya bidibo madigi dagaluba holobao, tama te aga dagego Aya me dao. Tama eno ena God bidibo digi pobao, tama te God dagego God me dao,’ te po eno ama dabebolo pusigi pao,” Jisasgo Maria dali te po wai.

¹⁸Tama tibaso, te Makdala bulu we nogi Maria aga pai, tama agai te Jisas wali pabo bidi augwali dali po weyu, te po wai, “Eno Genuai Bidi Jisas sualio,” te po wai. Tama agai te Jisasgo agabolo mani te po augwali dali wai.

¹⁹Te Jisas wali pabo bidi dabe augwali Juda bidi dabe wi eyu, tama augwali bidibo te be tų dąų olama, augwali te be tomode bidai. Te sogo moni Sarere dao wabo sogo giliga iba dega sigi pai. Tama Jisas augwali bidibo digi tomoba dolaluagasai, tama augwalibolo te po wai, “Dagego homu dwagi yai elama, tama dage bugagia bidao,” Jisasgo augwali dali te po wai.

²⁰Jisas agai te po olama, tama agai nogo dali punali badu dali augwalibolo waselai. Tama agai bidi augwaligo Genuai Bidi sulama, tama augwaligo homu dwagi yai mu yai.