Jon 20:8-23

⁸Agog megeloum a imug yaug ilasa yan, iŋ dam pat gubaran ilon lo iladug, abaŋ nek ago mi ileg, ilon lo rumok a.

⁹Nal an lo man iŋsinan megeloum Jesus mateŋ lo imasa san ru Anut san buk lo yen an gamugo duloŋ a.

¹⁰Agog megeloum uraru an dumul go aben dumado dan ante diau a.

¹¹Maria fon imul go mutou awan te itatad itur gug, itakoksig gib lo iyep go,

¹²eŋel uraru kulos milkouk geig ak amad da sisanun yen ak aben na dumado dugo yil. Neinta ŋien na imado dugo, neinta gumuran na imado dugo ile.

¹³Uraru en Maria durupei, “Nei, oŋ ata wo tata di?” Iŋ irupidaig ibol, “Ŋaisag Tubun en digam go dugon te digane yak man ŋai ta ŋaloŋ na ya.”

¹⁴Iŋ ago ibol go idaŋsa man, Jesus itur dugo ile. Gug iŋ Jesus sen itur dan ta iloŋ na ya.

¹⁵Jesus irupei, “Nei, oŋ ata wo tata di? Enti abaŋan wabi di?” Maria ilon lo tamol en sasau an san titianek tamol ta ibol go isumiani, “Tubun en, oŋ ŋaneg dugon te sini wau an, rupaiag pe, ŋaup ŋiŋane wa.”

¹⁶Jesus awan yabig ibol, “Maria.” Maria idaŋsag, Hibru ru lo iwagiŋ go ibol, “Rabboni!” (Ru an fun man: girek maŋau.)

¹⁷Maria Jesus yabi wo igane dugo iŋ imoig ibol, “Oŋ ŋai biag umoi, man dugo, ŋai Bai san na gamugo ŋau da. Ak man oŋ waup, teig taog ŋai ago ŋabol ak ubol rupudai, ‘Ŋai lak na Bai san na ŋamul ŋau o da. Ŋaineg Tamag en aŋsam Tamami, ŋaineg Anut en, aŋ dam sam Anut, amaiak san na ŋamul ŋau o da.’”

¹⁸Man niŋen o Maria Magdala pein an yaug, megeloum irupudai, “Tubun en ŋile la ya!” Agog Jesus san awan aban an dam irupudaig duloŋ a.

¹⁹Nal nek a ubou guraian megeloum iŋ Juda niŋedi wo direr go, ab lo dumado dan dalawan fidian dufutanai idug, ilon lo mi dumado dugo, Jesus luluŋad lo ilasag, itur dugo igo ibol irupudai, “Aŋ maror am da amado wa.”

²⁰Iŋ ago ibol dugo, banin giraŋen dam ikubiai pidinai a. Agog megeloum iŋaned Tubun en dile yak niŋen o uyasusai tubun mi digane ya.

²¹Jesus fon irupudai, “Aŋ maror am da amado! Bai ŋai idinag go tan na ŋupalu ya, nek ago mi ŋai aŋ ŋidiraŋ pe, urat lo au a.”

²²Iŋ ago ibol dugo, ur iwi pidinaig, igo ibol, “Ŋai Urgun ŋupanaŋ da.

²³Aŋ tamolpein iŋaned aupasek apare idu dop man, Anut dam aupasek an ipare idu wa. Ak gug aŋ iŋaned aupasek ta apare idu na dop man, Anut dam ta ipare idu na wa.”