Jon 20:6-19

⁶Saimon Pita, ae i mih sau lo, ka tapiek ma ka kau sikit una palgan fat ae. Ke ka par foron rokap na kaen ae tinaiwa tom,

⁷turan kaen sabin ae ri fis ta u kale paklu Iesu. Kaen ae, aragii ri palim ta u, ma ri ka luun keskes u tom koseng fal e kaen tinaiwa.

⁸Namih, kalalik na fafausum ae i tapiek famu tah na matanfat, ka kau sabin. Ke ka par u ma ka unune.

⁹Aunbiing ae, biil biitom ri malal na orek ae na Buk na Gogoh le, Iesu in aptih fis tina minet.

¹⁰Ke, iun kalalik na fafausum ru ka fis una maleh.

¹¹Isau le Maria Makdalin i sotih awii na maleh na matanfat ma ka teng. Aunbiing i teng biitom, ka parau ma ka kongkilii.

¹²Ke ka par iu e angelo ru kau ta na foron tier ae i pos tikii, ru kiis tah na falifuh ae ri luun ta pununfo Iesu lo, neng na koskosngoi kia, ke neng na kar keke.

¹³Ru ka diik u aragii, “Tin ier, o tingis sanih?” Maria ka kiliis ruh aragii, “Ri ka kep ufu ta Kumguui kiak, ma biil ia usum le ri ka luun u mang fiawah.”

¹⁴Ka giliim fis ke ka par Iesu i sotih la aiwa, isau le biil i iliim u, le i e Iesu sau.

¹⁵Iesu ka diik u aragii, “Tin ier, o tingis sanih? O im isi seh?” Maria i wol le i e taman mok, pesu ka fas u le, “Ier, male o ka kep ufu tah, fas iau ini falifuh o luun u lo, isi iak kep pes u.”

¹⁶Iesu ka tara sing i aragii, “Maria!” Maria ka giliim usuf i ma ka tara aragii na orek Ibru, “Raboni!” Kamtinan orek ae, le tom fafausum.

¹⁷Iesu ka tara sing i aragii, “Gong o pose lo iau, wara le biil biitom ia fis ubae usuf Tata. La usuf foron tuaklik ma ok fas ri le, ian fis ubae usuf Tata i e Tama gam, usuf God kiak i e God kimi.”

¹⁸Maria Makdalin ka la usuf berberat na fafausum ke ka fas ri le, “Ia ka par ta Kumguui!” Ma ka fas ri le Iesu i fas ta u ini foron tier ae.

¹⁹Na efef worwor, na tipesu e biing na wik ae, berberat na fafausum ri kiis turim ma ri ka babat rakrakai na foron matanfel, wara le ri soke foron famfamu ken fan Iudaia. Iesu ka tapiek ma ka sotih na fatpoto ri ma ka tara aragii, “Siaroh in kiis na balmi!”