Jon 20:2-28

²Mako i tho werer a Saimon Pita tomo nge a Jon ako ini Jisas ile wainlanga ako ia sagu rintet i, ma i ria or ve, “O elpot Toko Pomnga a vuvepun lale, na lemimem mire nge wop kathnga ako o rongu i nge, kene avele.”

³Mako Pita ome a Jon ako ini Jisas ile wainlanga aken o es a vuvepun la.

⁴Ma or alaini o tho inga, ave Jisas ile wainlanga ako ia sagu rintet i, i sertet a Pita ma i velpol tel a vuvepun aken.

⁵Ma i lotoru ma ikei eto la ma i thopol seltun ako o so i nge, ave i koro la avele.

⁶Ma Saimon Pita i velpol a rumongaling ma i alpo sele nge koroong a vuvepun lemi la, ma i thopol seltun ako o so i nge kene i ngo.

⁷Na i thopol mun seltun siva ako o kin tetal ipounga nge, ako i ngo relpot alapinmolnga.

⁸Ma Jisas ile wainlanga aton ru i velpol tel a vuvepun aken, kene i koro mun la ma i thopol i veno ako ma ilemio ol nge.

⁹Aveto olemi mire senu nge riong ako i voth a God ile erere imirenga rongan ako i ri ve, aro i rin lamo i mimi werera mun.

¹⁰Lamako Jisas ile wainlanga or aini aken o lo werer ol a ole pen la.

¹¹Na Maria i mit a vuvepun thekia ma i tang. Ma rongan i tang na i lotoru ma ikei eto a vuvepun lemi la

¹²ma i thopol ensel or aini ako oa teunong i veleles. Ma o men nge wop ako Jisas ini peti i ngo tel nge. Na e i men a ipounga nge anga na e i men a ieve nge anga.

¹³Mako or paini o nina i ve, “Bouti, ong tang neke?” Mako i olal ole riong ve, “O elpot ok Pomnga lale, na lemik mire nge wop ako o pango i nge, kene avele.”

¹⁴Mako i eksinga ma i thopol a Jisas ako i mitit, aveto i ate i avele.

¹⁵Ma Jisas i nina i ve, “Bouti, ong tang neke? Na ong ortet anga?” Na i rivenga ini ometa thealnga e, mako i ria i ve, “Eve ong elpot i, aro ria tho nge wop kathnga ako ong pango i nge mo aro tho es lamo tho el i.”

¹⁶Mako Jisas i ria i ve, “Maria.” Ma itheki lel a i nge na i ria i nge Hibrure okei ve, “Rabonai.” Riong ake mirenga ako ve, “Pamirealinga.”

¹⁷Lamako Jisas i ria i ve, “Mothong tova krim tuntun tel tho, eneke tho lo werer a Vovo nge la rongan. Aro ong es a titeikre nge la, mo ong ria or nge ako aro tho lo werer a ok Vovo nge, ako ini omu Vovo mun na ini lek God na ini lomu God mun.”

¹⁸Mako Maria Makdala anga i lo werer ma i ria ile wainlangaere ako i thopol a Toko Pomnga lale, ma i ritet or nge ur alavusnga ako i ria i nge.

¹⁹Na nge penaivuvu nge won tinanga aken, Jisas ile wainlangaere o veliloalo pel a vel lemi ma o pupal ritrito or, eneke o ngange nge Judare. Na Jisas i velpol a or nge ma i mitu a otheki, ma i ria or ve, “Lemi moring aro i voth tomo nge thomu.”

²⁰Na i ria venen aken ma vus, mako i pathengalu imeni salemi na peang wo mei ako a itelipo a or nge. Na ile wainlangaere o vual rintet nge lemi sivengaing, eneke o thopol a Toko Pomnga lale.

²¹Lama Jisas i ria mun or ve, “Lemi moring aro i voth tomo nge thomu. Na ponange tho pakepot thomu ranga ve ako Vovo i pakepot tho.”

²²Mako i thupostun or ma i ria or ve, “O elo Oni Riringa a lomumu.

²³Na aro ve ong panes Oni Riringa ilemi na ong ria toko e nge ve, ‘God ilemi simikal lom vothung kerenga.’ Aken God aro ilemi simikal toko aken ile vothung kerenga. Na aro ve ong ria toko e nge ve, ‘God ilemi simikal lom vothung kerenga avele.’ Aro toko aken kene ile vothung kerenga rongan i voth.”

²⁴Na Jisas ile wainlanga or mule pa omole pothoi or aini, e ako iion a Tomas na iion mun a Didimus i voth tomo nge or avele nge wop lemi ako Jisas i velpoltun or.

²⁵Mako o ria i ve, “Them thopol a Toko Pomnga lale.” Ave Tomas i ria or ve, “Aro lemiko inga ako i mimi tova tho thopol ia sotunong wo mei a imeni salemi na tho paeso menik pupo nge, naro tho paeso mun menik a peang wo mei a itelipo. Na aro ve tho oma venen aken avele, aro lemiko nge avele.”

²⁶Lama nang or limae i vus na Jisas ile wainlangaere o veliloalo mun pel a vel aken lemi na Tomas i voth tomo ol nge or. Ma o pupal ritrito mun or. Ma Jisas i velpol ma i mitu a or nge, ma i ria mun or ve, “Lemi moring aro i voth tomo nge thomu.”

²⁷Lamako i ria Tomas ve, “Tomas, parong rumo menum pupo a menik salemi, na osepot menum mo paeso i a telik po. Mothong tova wong voth ini toko ako lom lemioong avele, aro lomumo inga nge tho.”

²⁸Mako Tomas i olal ile riong ve, “Wong ini ok Pomnga na wong ini lek God.”