Jon 20:2-16

²Kaeŋ iima iikanondeeŋ mesaoŋ uulaŋawo kema Saimon Piito ano Jiisaswaa wombo gowokoya yoroonoŋ kaŋ kokaeŋ irijoro, “Mono Pombaa qamoya qasirinoŋga meŋ kema dakanoŋ aŋgi eji, ii mende mojoŋ.”

³Kaeŋ irijoro mesaoŋ qasirinoŋ keni.

⁴Motooŋ bobogariŋ kenito, gowoko alianoŋ bobogariŋ kema Piito uuguŋ wala qasirinoŋ keuro.

⁵Keuma jamo kobaa urorooya iikawaa uutanoŋ mende uma qaa ootanoŋ eeŋ akakariŋ uuro keno opoya momosigiti, iikayadeeŋ ero iiro.

⁶Ii iiro Saimon Piitonoŋ kaaŋagadeeŋ gematanoŋ kouma jamo kobaa uutanoŋ uma opoya momosigiti, iikayadeeŋ ero iiro.

⁷Ii iiro ano waŋa opo jakaŋa moŋnoŋ momosiiŋ esuugiti, ii tosianoŋ kuma selewaa opoya kawo mende mindiriŋ aŋaso aŋgi raro iiro.

⁸Kaeŋ iiro gowoko alianoŋ wala qasirinoŋ kouroti, iinoŋ kaaŋagadeeŋ jamo kobaa uutanoŋ uma iwoi ii iima moma laariro.

⁹Jiisas gbiliŋ koomunoŋga waabaati, iyoronoŋ Buŋa Terewaa qaa kaaŋa ii waladeeŋ mende moma asariŋ tompiririŋ laligoŋ kouri. Kiaŋ.

¹⁰Rama kouma iikanondeeŋ moma laariŋ eleema mirigaranoŋ keni.

¹¹Yoronoŋ kenito, Marianoŋ aŋodeeŋ qasiriwaa jamo kobaa qaa ootanoŋ nama saaro. Kaeŋ saama kobaa urorooya iikawaa uutanoŋ akakariŋ uuro keno.

¹²Uuro keno Siwe gajoba woi malekugara tualalakota iriiro. Yoronoŋ Jiisaswaa qamoya eroti, iikanoŋ rari. Moŋnoŋ waŋa eroti, iikanoŋ raro moŋnoŋ kanianoŋ raro.

¹³Kaeŋ rama kokaeŋ ijori, “Emba, gii naambaajoŋa saajaŋ?” Ijori moma jero, “Poŋnaa qamoya meŋ kema dakanoŋ aŋgi eji, ii mende mojeŋ.”

¹⁴Kaeŋ jeŋ eleema Jiisasnoŋ kosianoŋ nano iiroto, kaitania ii mende iima kotoŋ haŋqaŋ qeŋ nano.

¹⁵Haŋqaŋ qeŋ nano Jiisasnoŋ kokaeŋ qisiŋ muro, “Emba, gii naambaajoŋa saajaŋ? Morowaajoŋa moŋganjaŋ?” Kaeŋ qisiŋ muro urukisi galeŋanoŋ nanja me nomaeŋ, iikaeŋ romoŋgoŋ kokaeŋ ijoro, “Oo somatana, gii qamoya meŋ aŋgoŋ moŋgeŋ kema anjaŋati eeŋ, mono nijona kema memaŋa.”

¹⁶Kaeŋ ijoro Jiisasnoŋ qata qama “Maria!” jero. Ii qama jero iwaanoŋ eleema Hibruu qaanoŋ qama “Raboni!” jero. Ii ananaa qaanoŋ “Boina!”