Jon 20:19-31

¹⁹Te Jisas wali pabo bidi dabe augwali Juda bidi dabe wi eyu, tama augwali bidibo te be tų dąų olama, augwali te be tomode bidai. Te sogo moni Sarere dao wabo sogo giliga iba dega sigi pai. Tama Jisas augwali bidibo digi tomoba dolaluagasai, tama augwalibolo te po wai, “Dagego homu dwagi yai elama, tama dage bugagia bidao,” Jisasgo augwali dali te po wai.

²⁰Jisas agai te po olama, tama agai nogo dali punali badu dali augwalibolo waselai. Tama agai bidi augwaligo Genuai Bidi sulama, tama augwaligo homu dwagi yai mu yai.

²¹Tama Jisasgo augwalibolo te po ma wai, “Dage dwagi yai homu elama, bidao,” te po wai. “Tama Ayago ena tagala palobaso, ena asai dao. Tama tialigia, eno me dage tagala palobao,” Jisasgo te po aga wali bilali bidi dabe dali wai.

²²Jisas agai te po olama, tama aga mobo augwalibolo ponai, tama augwalibolo te po wai, “Dagego Godigo Dwagi Yai Mobo Bidi te sao,” Jisasgo te po wai.

²³“Dagego gasa bidi dabe mego dwai sę yali sęgę sela sąyu da, tama te dwai sęgo sęgę Godigo silaibao. Dagego gasa bidi dabego dwai sę yali sęgę dąų weyu da, teda te sęgę me elaluaibao, te dwai sę sęgę Godigo sela sągobeo,” Jisasgo te po wai.

²⁴Jisas aga te aga wali pabo bidi augwali bidibo digi pedalai, te sogo aga bidi me deli augwali dali bidisiąwai, te bidi Tomas dao, tama agai gasa nogi me Didimus wai, te nogi page aga idago wai si deli sogo ame nai. Te baso te nogi Didimus wai.

²⁵Tama Jisas aga wali pabo bidi mebago Tomas agabolo te po wai, “Dago naga Genuai Bidi dago suai dao,” te po Tomas dali wai. Tialima Tomasgo augwalibolo te po wai, “Eno aga nogode nel enani digi susiąyu da, tama eno nogo dani te nel enani digi tomoba musiąyu da, te eno nogo aga punali badu palama susiąyu da, teda te eno te poba ena homu mu mugobeo,” Tomasgo te po wai, augwali dali.

²⁶Te nosali a naga olama me badu nogo sela sogo bidai, tama Jisas aga wali pali bidi augwali te be tomode ma bidai, tama Tomas me augwali dali bidai. Augwaligo tigidali tų mu dąų ola silai digi, tama Jisas augwali tomoba dolagasai. Tama agai te po wai, “Dagego homu dua bugagia bidao.”

²⁷Tama agai Tomasbolo te po wai, “Nago nogo dani eba da muao. Tama nago eno nogo me suao. Tama nago nogo eno punali badu palama suao. Nago homu si ebo tagalao. Enade nago homu deli yao, te tiwai bidao,” Jisasgo te po Tomas dali wai.

²⁸Tomasgo aga dali po wei ponoyu te po wai, “Nage eno Genuai Bidi dao, tama nage eno God nage dao,” Tomasgo te po Jisas dali wai.

²⁹Tama Jisasgo Tomas aga dali te po wai, “Nago ena subaso naga, tama nago homu enaba mubawe? Niwai bidi augwaligo ena susiąma, augwaligo homu enabolo mubo we bidi, te augwali dwagi yai homu mu yaibao,” Jisasgo Tomas dali te po wai.

³⁰Te Jisas agai bomo yai sę hauwa mu aga wali pabo bidi augwaligo gedude agai te sę yai. Tama eno te Jisas agai yali sę po tigidali eno e bukude asębeo, meba naga asęani.

³¹Te bidi Jisas da, te Godigo sa muyu nosali asaibao wali bidi Krais dao, aga da te Godigo Ogwa dao. Tama dagego te po mu po dao homu emainogo, eno Jisasgo yali bomo yai sę po meba e bukude asęani. Tama dagego Jisas da te Krais dao, te aga Godigo Ogwa dao, dagego te homu eyu, aga dali wadoloyu, mu bidada pabo ula dagego somainogo eyu, eno agai yali sę po asęani.