Jon 20:14-28

¹⁴Wal wen Meri bin tok lagijat, imbin tenaran, en imbin luk Jisas jandapbat deya. Bat im nomo bin sabi imbin Jisas.

¹⁵Wal Jisas bin askim im, “Gel, wotfo yu kraikraibat? Hu yu lukabat?” Wal Meri bin reken Jisas bin det men hubin oldei lukaftumbat det gadin, en imbin askim im, “If yubin deigidawei det bodi, wal yu dalim mi weya yubin pudum det bodi wulijim ai garra go en gajim.”

¹⁶Wal Jisas bin dalim im na, “Meri.” En wen Meri bin irrim im tok lagijat, streidawei imbin luk langa im, en imbin tok garram im ron langgus, “Rebonai!” Det wed im tok Titja.

¹⁷Wal Jisas bin dalim Meri, “Nomo holdim mi, dumaji ai nomo bin gobek langa main Dedi langa top. Bat yu gobek en dalim main braja en sista olabat ai garra gobek langa main Dedi. En yu dalim olabat main Dedi im blanga yumob Dedi du, en main God im blanga yumob God du.”

¹⁸Wal Meri bin go langa detlot wekinmen blanga Jisas, en imbin dalim olabat imbin luk det Bos blanga olabat, en imbin dalim olabat wanim Jisas bin dalim im.

¹⁹Wal wen imbin naitaim det seimdei, ola wekinmen blanga Jisas bin majurrumap miselp insaid langa haus, en deibin lokimap ola dowa blanga det haus, dumaji deibin bradin blanga ol detlot haibala serramonimen. Bambai na Jisas bin kamat langa olabat deya insaid langa det haus, en imbin jandap langa midul langa olabat, en imbin tok, “Yumob garra jidan gudbinjiwei.”

²⁰En afta imbin shoum olabat im bingga en det said weya deibin jalk im garram spiya. Wal detlot wekinmen bin brabli gudbinji wen deibin luk det Bos blanga olabat,

²¹en wanmo Jisas bin dalim olabat, “Yumob garra jidan gudbinjiwei na. En ai jandim yumob blanga dum det wek jis laik main Dedi bin jandim mi blanga dum det wek.”

²²Afta na Jisas bin blowim win langa olabat, en imbin tok, “Yumob deigim det Holi Spirit.

²³En wen yumob dalim enibodi God bin larramgo im fri brom ola nogudbala ting weya imbin dumbat, wal im jidan fri. En wen yumob dalim enibodi God nomo bin larramgo im fri brom ola nogudbala ting weya imbin dumbat, wal im nomo jidan fri.” Lagijat na Jisas bin tok langa im wekinmen olabat.

²⁴Wal wen Jisas bin kamat langa detlot wekinmen blanga im deya langa det haus, det wekinmen neim Tamas Didamas nomo bin deya garram olabat,

²⁵en bambai wen detlot wekinmen bin luk Tamas, deibin dalim im, “Melabat bin luk det Bos blanga wi.” Wal Tamas bin dalim olabat, “Ai kaan bilib langa yumob. Bat if ai luk detlot neil mak langa im bingga en pudum main bingga langa detlot mak langa im said, wal tharran na garra meigim mi bilib.”

²⁶Bambai na wan wik afta ol detlot wekinmen bin majurrumap miselp langa det haus igin, en Tamas bin deya garram olabat, en deibin lokimap ola dowa blanga det haus. Bambai na Jisas bin kamat langa olabat deya insaid langa det haus, en imbin jandap langa midul langa olabat, en imbin tok, “Yumob garra jidan gudbinjiwei.”

²⁷Afta na Jisas bin dalim Tamas, “Yu pudum yu bingga iya langa main bingga en yu luk gudwei. En yu pudum yu bingga langa main said du. En yu stap askimbat oldei. Yu garra bilib langa mi weya aibin gidap laibala brom dedbala.”

²⁸Wal Tamas bin tok, “Yu na main Bos en main God!”