Jon 20:13-25

¹³E rua na enjel iangeni koro huatia a Meri, “Ehava gi o tangi?” Meri ke velea, “Imarea kena hati aua na tonogna nigua a Lod, mu boi adoa ivei kena vano boa.”

¹⁴Leghugna ke velea iangeni, a Meri ke rei tabiru me reghia a Jisas ke sokara leghugna. Keana iia ke boi ghithatha imanea a Jisas.

¹⁵A Jisas ke huatia, “Vaivine, ehava gi o tangi? Ahai ko hiroa?” A Meri ke ghaghana imanea na mane ke reireghia na gnatha i ghai, me velea, “Mane puhi, gi koda hatia na tonogna, o veleu ivei ko vano boa eigna kuda vano hatia.”

¹⁶Gi a Jisas ke ania, “Meri!” Meri ke rei vano itagna me velea kori haghoredia mara Jiu, “Raboni!” (Na ghaghanagna na haghore iaani, “Velepuhi.”)

¹⁷Gi a Jisas ke ania, “O saghoi tangoliu, eigna inau ku boi vano hadi mua tagna a Tamagu. Kari o vano tadia nigua na komi vaovarongo mo velera inau kuda vano hadi tagna a Tamagu ma a Tamamiu, tagna nigua a God, ma nimiu a God.”

¹⁸A Meri gna i Magdala ke tabiru vano tadia mara na vaovarongo me velera, “Inau ku reghia a Lod!” Gi e titiono itadia na komi fata a Jisas ke veleagna.

¹⁹Kori lavigna na dani Sade iangeni, mara na vaovarongo kena mono haidu koragna sina vathe. Mena bilaki ngasira na komi hagetha eigna kena mataghunira mara puhidia mara Jiu. Sina fata vano keari a Jisas ke sokara duadia me velera, “Na soleana itamiu.”

²⁰Leghugna ke velea iangeni, imanea ke tatelia itadia na limagna ma na sokugna. Gi mara na vaovarongo kena ghithatha imanea a Lod mena totogo hutu puala.

²¹Gi a Jisas ke ghoi velera mua, “Na soleana itamiu. Vaghagna a Tamagu ke vetulau, inau ku vetulaghamu mua.”

²²Gi e aheahe itadia me velera, “Oti hatia na Tarunga ke Tabu.

²³Gi ighamu kotida talutavogha na paluhagna ahai, a God keda talutavogha mua na paluhagna. Keana gi ighamu kotida boi talutavogha na paluhagna ahai, a God keda boi talutavogha mua na paluhagna.”

²⁴Sikei itadia mara na vaovarongo, a Tomas (kena kiloagna mua Baso), imanea ke boi mono duadia kori vido a Jisas ke tate vanira.

²⁵Kori vido imanea ke tabiru mai, mara na vaovarongo kena veleagna, “Ighami kiti reghia a Lod!” Keana a Tomas ke anira, “Gi kuda boi reghia mu tangolia na ngeso kori limagna mu ghehuvia na ngeso kori sokugna, teo kuda vaututunighamu!”