Jon 20:10-29

¹⁰Ana disaipel suwo ikra ye ende ikine yungunomugl embrika.

¹¹Maria ye kombuglo dra mendakra andigl kai eremoglkwa. Ye kai eremogltre ana si goindi kan kombuglo dra yungugl kra endindre,

¹²ana ye kangwa angelo suwo gagl kruwo ende pandigltre, Yesus pandiglmara dumo igle kra amedi miurka, ta bre yomara dumomugl moglko te ta kagle yomara dumomugl moglkwa.

¹³Ye krapogl Maria tembrika, “Ambu ya, ene sragl orko pre kai etne?” Maria di ikine endungwa, “Na Yaglkandena yend korugl eingwa, ana ye ipi aglokra pandiglkwa i na kankrika!”

¹⁴Maria yegl dindre kan akete kango, ana Yesus igle andigl moglkwa, ba i Yesus moglmedi ye kanpogl sikrukwa.

¹⁵Ana Yesus krapogl Maria tongwa, “Ambu ya, ene sraglpre kai eremotne? Ene ira pre dokune?” Ana Maria prukwa yagl i kongun ereyaglkwa yagl ta moglmedi pre, ye ka yegl dungwa, “Yagl kande, ene eremogl ye yend bangeta emin, ana ye ipi yenara dumo i dinatn ana na pi inaglka.”

¹⁶Yesus di ye tongwa, “Maria!” Ana Maria kan akete Yesus moglmara ende ana Aram ka mina yegl dungwa, “Rabonai!” I mambuno yegl, “Beke Notnga”.

¹⁷Ana Yesus di ikine endungwa, “Na nangina akekro, sraglpre na ende ikine imbo Nina moglmara pikrika. Ba ene ende na angrima meglmara iro pindre ana ye ditenatnga, na ende ikine imbo ye mina enaglka, ye na Nina te ama ene Neno moglkwa, ye na Godna mogltre ama ene Godno moglkwa.”

¹⁸Yegl dungo ana Maria, Makdala kamun mam, ende pindre ana ye Yesus kanyedi disaipel wagle ditendre te Yesus ka ditomere ikra boglo kugl tongwa.

¹⁹Sande enge i mim panagledi orko ana disaipel wagle ye Juda yomba kande wagle pre kundutno gogltre ana yungu dua prapra lok giglendi si pandigl yungugl ye makaisi meglkwa. Yegl ere meglko ana Yesus wu ye meglmara suna andigl mogltre ka yegl dungwa, “Nomano pokndungwa i ene mina yenano.”

²⁰Ye ka i di kondo okuwo, ye ongo koglkoglo ya te dangigle ombunodi disaipel wagle tongwa. Ana disaipel wagle Yaglkande kandre ye gun pond kaima yeingwa.

²¹Yesus aglke kordagl ditongwa, “Nomano pokndungwa ene mina yenano. Nina na di endumere yegl na ama kuno yegl ene diendinga.”

²²Ye ka yegl dindre ana dra mur pudi yene disaipelma wagle meglmara endindre yegl dungwa, “Ene Holi Spirit iyo.

²³Ene yomba tandaglmeno kindekondo tembi ana tandaglmeno i dundinambuka. Te ene yomba tandaglmeno i kindekondo tekrimbi ana tandaglmeno i pai morambuka.”

²⁴Disaipel wagle meglmara Yesus wu pendigl ongwa. Enge igle disaipel 12 mina suwarata akiye moglkrikwa, ye kangiye Tomas (kangiye ta Didimas).

²⁵Ana disaipel tau ikra di Tomas teingwa, “No Yaglkande kamga!” Ba Tomas di ikine endungwa, “Na nana ye ongo koglkoglo buglo-nil boglmara i kandre ana ake pirtre te dangigle mina kuglange boglmara i onguna ende suna endimbo, ana na kaima pirngi dinaglka.”

²⁶Sande suwarata ende wongo ana Yesus disaipelma wagle aglke kordagl yungugl meglkwa. Ana Tomas ye bogl akiye meglkwa. Te yungu dua prapra lok sikendingwa, ba Yesus wu ye meglmara pukamugl andigl mogltre ana dungwa, “Nomano pokndi ene mina panano.”

²⁷Te ye ama yegl di Tomas tongwa, “Ene ongun mongo magl ya yei ana na onguna kano, te ene ongun duglosi na dangra mina suna endo. Ene noman suwo yeikre ana pirngi kaima do!”

²⁸Ana Tomas di ikine endungwa, “Na Yaglkandena te na Godna!”

²⁹Yegl dungo, ana Yesus di Tomas tongwa, “Na kandre ene pirngi dinga. Ba na kankre pirngi dingwa yomba God eran ye gun yenaglkwa!”