Jon 20:1-19

¹Ma ndra wahun ta len ma bwena ta wik ari ja, Mariya badu Makdala edek ili mada lek anya kanyolom Jises. Iy ili mirihik, iy anyolom bek bado mada lek bwe, iri ndratundruwiy ndra-au ndrala len.

²Iy sakaliye eme hamon tiye jo hawe Saimon Pita. Jo badeh, lau ta Jises iy aso-ok labai. Mariya tiye taru i buku doh, “Iri ndrabwese-ei Laban udu bolo lek tan ndra-au. Iri ndrabwese-ei iy ndrala heh handru, to bala tanan bwe.”

³Eme aru Pita adek ala mada lek anya kanyolom.

⁴Aru ma la-uh sakaliye taseh ala, arile jo sakalawi Pita eme hamon, jo ili isos mada lek bwena.

⁵Jo aluh, ma anyolom ili munu bek. Eme jo anyolom iri kari kolau nane iri asu iy na aliy, arile jo bala munu bek bwe.

⁶Saimon Pita in hamon tek eme ja, edek ales amwenen ili munu bek. Iy anyolom iri kari kolau marakon nane iri asu iy na aliy udu api.

⁷Ma iy anyolom kolau nane asu batu Jises na aliy. Arile kolau nane doh, bare hawe iri kari kolau rayah nane bwe. Nyolom ta aliy i buku kolau le nane alokom iy.

⁸Pita ndra-au ndrala bolon, jo eme edek in hamon tan ili munu bek ale. Eme jo anyolom iri lakou marakon nane doh, ma jo atehei budon tek ili tan i buku Jises badeh, ndramak ndrame awas ja.

⁹(Na len doh badeh, aso bala tanan ta buk ndrabun asehek ta Jises kameh amak ja bwe.)

¹⁰Aru anyolom iri lakou marakon udu lek nane ano, aru ame adek au ala hamon ala kon ja.

¹¹Mariya badu Makdala eden udu mirihik ta mada lek. Iy eden kahis, iy aluh ma anyolom amwenen ili bolo lek.

¹²Iy anyolom angelo ma la-uh ado bolo lek, asini awin belen. Uru manyah are loboho bada kei mene udu aliy. Iy ari udu loboho batun, iy ari ja udu loboho kiwin.

¹³Uru ndremenya Mariya i buku doh, “Badih den, ou aden ndranye sah?” Iy asumon, “Iri ndrandrei Laban tek ndra-au, jo bala tanan bwe, iri ndratehei iy ndrado heh handru.”

¹⁴Iy asehek sahou ano, iy tubuni madan ili amwenen ta Jises ales udu konan, arile iy baseleyani Jises bwe.

¹⁵Jises eme ndremenya iy, “Badih den, ou aden ndranye sah handru? Ya ou asilah are lau handru?” Iy anya, kede-eh iy ndramak ta bilin doh le ai. Iy anya, “Ndramak den, i buku ou ndrandrei iy ndra-au, ou tiye tek, ou atehei iy udu heh handru, jo kameh kili kandrei iy.”

¹⁶Jises anya, “Mariya.” Mariya tubuni iy amwenen tan, ma iy aloh i boho iri Hiburu anya, “Raboni!” (Moso sahou Raboni badeh, “Ndramak ta leheya.”)

¹⁷Jises anya, “Minem same badak o! Tasah, jo bala loken hawe tama bwe le. Arile ou ala tiye oro lau tek, ou tiye toro, ‘Jo kameh ilih loken hawe tama, iy tama ado. Jo ili hawe Kindrei tek ma Kindrei tado ale.’”

¹⁸Eme Mariya badu Makdala sakaliye eme tiye taso lau tan, “Jo ndratou Laban!” Ma iy asehek taso mari ta iri sahou nane Jises asehek i tan.

¹⁹Na len ma bwena ta wik doh, an i andri badeh, oro lau tan atukum oro a le se ado bolo asiu ari. Oro sulu-i kou toro marakon ihis, tasah oro anoh iri lau tinan badu Juwis. Oro ado le badeh, Jises eme ales udu alih toro, ma iy anya, “Mondrei kudu hawe ado.”