Jon 20:1-12

¹Te Jisas gų pagede munama, si sogo bidilama, tama moni Sarere dao wabo side, tama te Makdala bulu we nogi Maria, te we aga gų pageba kigamu asai. Tama te bulu hulialubadi ganao. Tama agai suali, te ola be tų haluali moni masigi te halualubo agai subeo.

²Tama sulama, tama te we aga Saimon Pita dali, te gasa bidi te Jisas agai godolo yali te bidi dali, te bidi si bidibo digi te we udawai. Tama Mariago augwali si dali po bomonama weyu, te po wai, “Augwaligo dago Genuai Bidi te ola bede sela pai yalio. Tama dago konebeo, augwaligo aga menaba mugi paliwe naga subeo,” te we Mariago te Jisas wali pabo bidi si dali te po wai.

³Tama te wego te po obaso, Pita dali te gasa bidi me dali, tama augwali si te bidali be tagalama, tama augwaligo te hanu tagalama, Jisas muani digi ola beba pabo gagalali.

⁴Tama augwali si hodobo udawai. Tialima gasa bidigo Pita geanama, tama aga polasa pai, tama ola beba polo polasa sabolai.

⁵Tama te polasa pali bidi aga basi gulama, bomo elama suali, te pedai ugwa nami dabe naga munalubo suali. Tialima aga te ola be gų page tomoba pabeo.

⁶Saimon Pita aga nosali tudi badu asai, tama aga te gų page ola be tomoba polasa pai. Tomoba pelama, tama aga bomo elama suali, te pedai ugwa nami dabe naga munalubo Pita agai suai.

⁷Tama gasa ugwa me munalubo agai suai, te Jisas tobolude bebe pali ugwa dao. Te ugwa gasa ugwa dabe dali munalubeo. Tama te ugwa bebe pelama, agaduba tali munaluai.

⁸Tama te gasa bidi aga polo Pita geanama polasa asali, te bidi aga me te gų page ola be tomoba pai. Tama agai te tiwai elalubo sulama, tama te bidi agai te Jisas ma hodaloali tede te sogo konealuali.

⁹(Tama te sogo augwaligo Godigo polobadu asęani po page konesiąbadi. God agai po te bukude asęyu, te po wai dao, “Aga gų pagede ma hodaluao,” te po wai. Te sogo augwaligo te po page konebeo.)

¹⁰Tama te bidi augwali sigo te sę tigidali sulama, tama augwali si augwa si beba ma pai.

¹¹Te we Maria te gų pageba ma sabolali, te bidi si augwali te ola be tomode bidibadi. Tama augwali si augwa si beba ma pelama, tama Maria te gų page ola be bulu badu gana dolaluyu, tama Maria aga gela udai. Aga gela udu digi, tama aga basi gulama, tama agai Jisas te muani ola be tomoba tonai.

¹²Tama Maria agai Godigo sę ebo ensel mobo bidi si tedela bobobage ugwa muai bidi si suai, te Jisas muani ola be tomode dulalubo suai. Tama te ensel mobo bidi me deli te Jisas tobolu muani digi dulaluyu, me te sągą muani digi dulaluyu yai, te Maria agai suai.