Jon 1:20-44

²⁰Aveto Jon i wotum avele, i ritetu i a or nge ve, “Tho ini toko ako God i ateal i ve aro i el werer ile tokokoere, kene avele.”

²¹Mako o nina mun i ve, “Ong ini ao? Ong ini a Elaija?” Ma i olal ole riong ve, “Avele! Tho ini a Elaija avele.” Mako o ria i ve, “Na ong ini a God ile riong elnga ako them men tetal i?” Ave Jon i olal ole riong ve, “Avele!”

²²Na o ria mun i ve, “Aro ong ria them, ong ini ao, mo ako aro them el lom riong olalnga a tokokoe areko o pake them me, na ong ri senu a them nge sivengom.”

²³Mako Jon i olal ole riong ma i ripot riong ako God ile riong elnga a Aisaia i wat i nomenga ve, Tho ini toko omole ako tho presa pres a pen polpolnga ve, ‘O pavengveng Toko Pomnga ile sovengalo mo aro i es nge me.’”

²⁴Lamako, Parisi pelie ako ole mukalingare o pake or a Jon nge la,

²⁵o nina mun i ve, “Na eve ong ini toko ako God i ateal i ve aro i el werer ile tokokoere avele, na eve ong ini a Elaija avele, na ong ini a God ile riong elnga ako them men tetal i, kene avele, na i vova ako ong paninu tokokoere, e?”

²⁶Na Jon i olal ole riong ve, “Tho paninu tokokoere nge thei, aveto toko e ako i mit tomo nge thomu na lomumu mire nge i avele,

²⁷aro i rumongal ol a kimek, na tho ini toko sivenga avele na tho pavurvur avele ako aro tho es totho a ilo sei mo tho inospot ile esonga a we.”

²⁸Na ur areke i velpol a thei a Jordan wo epee ako a Betani, ini wop ako Jon i paninu tokokoere nge.

²⁹Na nge erangunga Jon i thopol a Jisas ako i es me, ma i ria ve, “O thopol, ake ini a God ile Sipsip Tun ako aro i rin mo aro i eltetpot toko na seng ake ru a ulue ole vothung kerenga.

³⁰Toko ake tomo tho ri nge ve, ‘Toko ako i rumongal nge tho, kene i pomnga nge tho, eneke i voth tomo nge a God nomenga lamako nina i maneu ol tho.’

³¹Na nomenga sivengek lemik mire nge toko kathnga ako i rumongal nge tho avele, aveto tho es ake me, ve aro tho paninu tokokoere nge thei, mo ako aro thomu Israelre aro lomumu mire nge i.”

³²Lamako Jon i ritet i a or nge ve, “Tho thopol Oni Riringa ako i esu a Pen a Urvet lemi me, ma i ranga ve ini pothu, ma i mena a i nge.

³³Na nomenga sivengek lemik mire nge i avele, aveto God ako i pake tho me ve aro tho paninu tokokoere nge thei, i ria tho ve, ‘Naro ong thopol Oni Riringa ako aro i esu me, mo i mena a toko e nge, i re aken ini toko ako aro i paninu tokokoere nge Oni Riringa.’

³⁴Na tho thopol i lale, na tho ritet thomu ve, ake ini a God Itun.”

³⁵Na erangu mun, na Jon i mit mun e pen aken tomo nge ile wainlanga or aini.

³⁶Ma Jon i thopol a Jisas ako i es me, ma i ria ve, “O thopol, ake ini a God ile Sipsip Tun.”

³⁷Na ile wainlanga aini o nongpol ile riong venen aken, mako or paini o panes ol a Jisas.

³⁸Mako Jisas i the singal werer ma i thopol or paini ako o panes i, ma i nina or paini ve, “Thomu paini o vo neke?” Ma or paini o olal ile riong ve, “Rabai, lom vel kath?” Na Rabai ake mirenga ako ve, “Pamirealinga.”

³⁹Ma Jisas i olal or paini ole riong ve, “O es me mo o thopol i.” Mako or paini o es tomo ol nge i ma o thopol vel ako i voth nge. Na or paini o voth tomo nge i, na i patea nge nang theki i el or penel nge penie ma i pavurvur ako la nge nang le sivlukong.

⁴⁰Na oa omole kene iion a Andru, ako ini a Saimon Pita itein.

⁴¹A ur e avele, nako Andru i ortet itein a Saimon, ma i ria i ve, “Them thopol Mesaia lale.” (Na Mesaia mirenga ako ve, toko ako God i ateal i ve aro i el werer ile tokokoere.)

⁴²Lamako Andru i wol a Saimon a Jisas nge. Ma Jisas i thopol i ma i ria i ve, “Iom a Saimon ako ini a Jon itun, aveto aro tho leng ol ong nge a Sipas.” (Nge Grikre okei ini a Pita, ako i mirenga ve ini um aolonga.)

⁴³Na erangu mun ma Jisas ilemi ve aro i es a Galili, ma i es a pen ako Pilip i voth nge, ma i ria i ve, “Es me mo ong panes tho.”

⁴⁴Na Pilip ile a Betsaida, nge rem pomnga ako Andru ome a Pita o voth nge.