Jon 19:9-30

⁹Iy eme iu ili bolo asiu tiri kabin ja, ma iy ndremenya Jises ja, “Ou badu heh handru?” Arile, Jises basumon bohon bwe.

¹⁰Pailat asehek sahou i tan ja, “Tasah handru ou winiya basumon bohok bwe? Ou tanam jo bwe? Jo le ari atondrok, ta jo winiya tiye ou au laleyah, ma jo winiya tatahi ou ala ta kei tondreh ale.”

¹¹Jises eme tiye i tan ja, “Ou winiya batondrok jo bwe, i buku Kindrei batehei boto-on ta atondrok jo bawek tam bwe. Ta idoh le kameh, are lau iy atehei jo eme minem dah, iri kandriyen tan marakon kameh udu bwele-en labai ja ta iri kandriyen ndra-in tam.”

¹²Pailat anuhun iri sahou doh, eme iy asilah san ta Jises ki-iu laleyah. Arile iri Juwis arah i tan ja, “Buku ou ruwani iy ndramak badeh, iu laleyah eh, badeh, kameh ou kawas ta Sisa bwai. Are lau asehek, anya iy kabin, badeh, iy bobose Sisa.”

¹³Pailat anuhun iri sahou nane doh, eme iy sirini Jises eme manan ja. Ano Pailat manyah udu andri bada koyeu tiri kabin, udu loboho bolo asiu doh iri aloh “Bek Malahan.” (Iri Hiburu aloh Gabata.)

¹⁴Mada an eme ndrado le alih, mirihik ta len ndrabun iri aloh Pasoba anya kasahan. Pailat eme tiye i tiri Juwis, “Ya, aha kanyolom, idah kabin taha.”

¹⁵Iri lau ame arah ili bwele-e Pailat, “Kadi iy kimek! Kadi iy kimek! Katatahi iy ki bada kei tondreh!” Pailat eme ndremenya iri, “Aha aso-ok jo katatahi kabin taha kede-eh kili ta kei tondreh?” Arile, iri tinan tiri pris anya, “Ahi ari kabin ja bwe. Sisa le ari, kabin tahi.”

¹⁶Eme bwidi Pailat inoh, ma iy atehei Jises ili mine iri, ta iri katatahi iy kili ta kei tondreh. Iri lau ta bahun ame andrei Jises iu ili hawe iri.

¹⁷Iri tiye iy ta bwese kei tondreh tan. Iy bwese-ei ili isos kon ari iri aloh “Kon ta bwisi bar ta ndramak,” ili boho kon tiri Hiburu iri aloh Golgata.

¹⁸Udu loboho doh, iri lau ta bahun tatahi Jises ili ta kei tondreh. Iri tatahi uru lau la-uh ala ta kei tondreh ale. Iy ari udu loboho minen salin, iy ari udu loboho minen kamweu, Jises udu alih turu ma la-uh.

¹⁹Pailat eme torowenei sahou rayah, ano iy tiye oro lau ta bahun tatahiy udu bwisi no-o kei tondreh ta Jises. Tarou nane tiye i buku doh, “Jises Badu Nasaret, Kabin tiri Juwis.”

²⁰Sahou nane doh iri torowenei ili boho kon tiri Hiburu, boho kon tiri Latin (Rom), ma boho kon tiri Grik. Iri Juwis badeh, solo-an ame anyolom sahou nane iri torowenei udu ta kei tondreh ta Jises. Tasah kon nane iri tatahi Jises udu aliy bado len ta kon tinan nane doh bwe.

²¹Eme iri tinan tiri pris anyolom ma iri abolosen. Iri ame asehek ili ta Pailat i buku doh, “Ou satorou sala buku kodo-oh: ‘Kabin tiri Juwis.’ Ndri-iy labai. Ou atorou kili buku doh: ‘Iy ndramak le kede-eh asehek i buku doh: “Jo Kabin tiri Juwis”’”

²²Pailat eme asehek sahou boto-on i tiri, “Ndri-iy ai, saba sahou jo ndratorowenei badeh, kudu gwek ai.”

²³Na len iri lau ta bahun tatahi Jises ili ta kei tondreh, iri andrei awin tan ta bwele-en, iri tarani ili ma ha-ei, ano iri ondrek tiri. Awin tan ra-ei ja ma buruwen ta badan badeh, iri andrei ale.

²⁴Iri asehek ili tiri ari, ari, “To satarani awin tan mwasin dah, to kamekes laki ta aliy. To kanyolom are handru kameh andrei.” Lakou nane dah bwidiy amwenen ta sahou udu bolo buk ndrabun asahan handru, “Iri andromwei iri awin tek ili le winiya iri. Iri amekes nyorei laki ta awin tek.” Iri kandriyen marakon nane doh, iri lau ta bahun amekes.

²⁵Ales are mirihik ta kei tondreh ta Jises badeh, tinen, nadu tine tinen, Mariya udu Klopas, ma hawe Mariya badu Makdala.

²⁶Jises anyolom tinen ma hawe lau tan ari iy aso-ok iy tinan labai ales are hawe tinen. Iy eme asehek sahou ili ta tinen, “Tine, iy ndramak kede-eh nadum handru.”

²⁷Ano iy asehek ili ta lau tan nane, “Iy badih kede-eh tinem.” Eme udu ndra bada len doh badeh, iy lau ta Jises nane andrei tine Jises ili asiu hawen ma tondrokei iy.

²⁸Jises tanan ta iri gok tan mara-ei ndrano ai. Iy eme aloh, “Balek ndramar ta gwa.” Iy asehek doh ta amekes sahou udu bolo buk ndrabun eme asahan handru.

²⁹Kun ari, waen titi-in udu bolon udu mirihik ta kei tondreh tan. Iri lau ta bahun andrei konyei, oro tolomwani i bolo waen titi-in nane doh, ano oro atehei ili no-o kei ari, iri aloh hisop. Ma oro adeu ili bohon.

³⁰Jises anyuwi waen nane dah ano, ma iy anya, “Kabwai, lahou mara-ei ndrano.” Iy eme atehei batun i andri ma iy ruwani kohan ma iy imek.