Jon 19:8-40

⁸Wo, Pailat hiy senkin lonuayk menkin, hiykwe sawk hok ipey-ar non nuwnak-wak.

⁹Hiykwe sawk hyo gavman-a arian mon ma-lyawriy nok, Jisas se senkin ma-mesopok, “Hunkwe yier perey suko se le so?” Sawk Jisas hiykwe hyo ok ke pase ma-sahre onuayk me e.

¹⁰Sa Pailat hiykwe hye senkin me, “Hunkwe hano ok ke lonuayk me pa, panoke lwak o? Hmey, hunkwe senkin pankaw kiy-nonkway o, hakwe krai non, hne kumay mon preisia ha ey o, seyr hne now mon nak-okin pror kawk sawan ey o.”

¹¹Jisas hiy sa hyo ok ke senkin ma-sahre onuayk me, “Hne God ayaw ko hiy krai kow lopa hokwe, hakwe hno iha mon lwak lopa po lwak. Uwr hane hno iha mon ma kow sohiy so yor piap-araw kokwe, hno yor piap-araw ko eir mon sehe lwak.”

¹²Pailat hiy ok seme lonuayk menkin, hiykwe sawk yerki, Jisas se preisia ha kow ey se pawk. Sa Juda homkwe senkinaw lokre me, “Sawk hunkwe uwr sehe preisia ha ankin, hunkwe Sisar so wayh-ih-ar korey. Uwr senkin ma me sohokwe ‘hakwe king’ hiykwe Sisar se akre akre me uwr hiy non.”

¹³Enekwei Pailat hiy ok sokwe lonuayk menkin, hiykwe Jisas se ki apau mon hiy-ousne ha nok, hyo sey, ok liwak onuayk anon anon ey mon liwak. Yop sohok ko uru hokwe, mein-keip-ok me. Hibru ok non kokwe senkin mowie, Gabata.

¹⁴Eypok sohokwe, Pasova-ayay me lonhan onhan koruay ey, enekwei sohokwe pau 12 klok senkin lwak. Pailat hiy sa Juda me senkin sehe mekow, “Hmo king hokwe ehe ow.”

¹⁵Sawk Juda homkwe hye senkin lokre me, “Hye lokin kwor okrue e, hye lokin kwor okrue e. Now mon nak-okin pror kawk sawan e.” Pailat hiy ma-mesopok, “Hmey, ha hmo king se nak-okin pror kawk sawan e?” Pris karmay hom sa senkin mekow, “Hromkwe king lopa, sawk Sisar hiykwaw.”

¹⁶Wo, sa Pailat hiykwe Jisas se kokwe hmo iha mon sehe kow ha, Jisas se ayaw mon nak-okin pror kawk sawan e. Sa aw-uwr homkwe hye sehe nekie owk nakey.

¹⁷Sawk now hye nian nak-okin pror kawk sawan ey hokwe, Jisas hiykiaw-aw lway nakey. Hiykwe yier kamon makwey-oiow-ok ma mowie mon lway nakey. (Yier sohokwe Hibru mo ok kokwe senkin me, “Golgota.”)

¹⁸Yier serey kokwe uwr prueysyar se kokwe seyr serey nak-okin pror kawk sawan. Prueyn se kokwe sayar mon, prueyn se kokwe irayh mon. Jisas se kokwe ompok mon nak-okin pror kawk sawan.

¹⁹Sawk Pailat hiykwe ok kamon ke mey nok, Jisas so now mawk-eir mon nak-okin pror kawk iarok ha. Ok sokukwe, senkin mey, “Ohokwe Jisas Nasaret ko, Juda mo King hiy non.”

²⁰Uwrsa kraiar homkwe ok sokwe lanio ira mesor, payhokuaw, yier Jisas se ma nak-okin pror kawk sawan hokwe, taun ohriar mon lwak. Ok sokukwe om krompri non mo ok non meyamey, Hibru-ok o, Rom-ok o, Grik-ok o.

²¹Sawk Juda mo pris karmay homkwe Pailat se senkin mekow, “Hunkwe ok senkin peie mey o, ‘Juda mo king’ sawk hunkwe senkin mey e, ‘Uwr ohokwe senkin me, hakwe Juda mo king.’”

²²Sawk Pailat hiykwe hme senkin mekow, “Korey, ok, ha ma mey sokukwe, senkinaw lwak ey.”

²³Aw-uwr hom Jisas se now mon nak-okin pror kawk sawan menkin, homkwe Jisas so omeme owh ko seme lopri nok, iha-iha-aw anon kekie sowkriy. Sawk aw-uwr prueyn prueyn-aw homkwe kopi kamon kamon-aw lway. Seyr aw-uwr somokwe hyo siot meiamei sokwe ma-nakway nok, lira, siot sokukwe laplap kopi kamon-awaw nonaw nak-pror kumey.

²⁴Sa aw-uwr homkwe homkiaw-ayay senkin me, “Ama, hromkwe peie kama-sopre o. Hromkwe heyow kamon satu-ok ma me ke-aw mon onkuw-seyn ey. Uwr-ar siot meiamei sokwe lway ey hokwe, satu ko sor-mey hok ka mesair kow.” Yor sokukwe liy-liy-aw-ar seme mon ousne, God so ok, mamey porih mon ma mey ke nuw-mon ousne hrahra ha. Ok sokukwe senkin me, “Homkwe hano owh mon ma lie mokwe, kekie anon anon opri, homkiaw-ayay-aw. Seyr homkwe hano siot meiamei kokwe, heyow satu non mon onkuw-seyn lway.” Weyn sokukwe aw-uwr homkwe senkin seme lon.

²⁵Sawk Jisas so pouh arian o, hyo pouh ko nay-ih o, Maria, Klopas so sah o, Maria Makdala ko o, homkwe now, Jisas se ma nak-okin pror kawk sawan ohriar mon nakrok.

²⁶Enekwei sohokwe Jisas hiykwe hyo pouh ke lira nok, seyr hyo ki-wayh hyo uron-pi ko-ar ma nuw-wak se nak-ira, ohriar ma lorok sehe. Sa hiykwe hyo pouh ke senkin me-kow, “Akwa, hiykwe hno ney.”

²⁷Seyr hyo ki-wayh sehe makiy-mekow, “Ara, hokwe hno ipey.” Sa enekwei sohiy non kokwe Jisas so ki-wayh sohokwe Jisas so pouh Maria ke huonok nok, hyo a mon hiy-ey nok, hiy-wayr.

²⁸Sawk Jisas hiykwe senkin nonkway, hyo mey lowpwarowp mokwe po nuw-meio lowpway. Seyr ok mamey porih mon ma lwak me mon ousne hrahra ey mokwe, hiykwe senkin sehe makiynak-me peykyay, “Hano huei hokwe sonay.”

²⁹Seyr yowr kamon wain-hu lankre non hokwe ohriar serey mon nakrok. Aw-uwr homkwe laplap-kopi kamon ke lonok nok, wain-hu lankre non serey sakeyn prouk. Sawk laplap-kopi sokukwe now-ho-kueim kamon, hisop-ok ma me sohiy non waynan kraipakrai nok, Jisas so woki ohriar mon arnak-wayon kow, hiy lowswa e.

³⁰Jisas hiykwe wain-hu sehe lowswa menkin, kiynak-me, “Mey okukwe sopiaw.” Sa hiykwe hyo makwey se kyor-sakworay nok, hyo niohney se isay ha.

³¹Enekwei sohokwe sabat-enekwei se lonhan onhan koruay. Seyr sabat-enekwei sohokwe ipey-ar, payhokuaw Pasova-sabat hiy non. Sawk Juda homkwe senkin seme nan, owhi-sopok mokwe now mon-aw liy isay sawan kreik e ko. Homkwe sa Pailat se sehe mesopok, uwr, now mon ma sawan sohom mo oiow me lokimaun sawan kreik nok, owhi-sopok me kama-lieys lonar nok.

³²Sa aw-uwr hom ley nok, uwr peyr mon ko so oiow me lokimaun pie nok, hai, prueyn so oiow me ma-lokimaun. Uwr prueysyar sohokwe Jisas se nion ma nonnak-okin pror kawk sawan hiy non.

³³Sawk hom Jisas so oiow me ma-lokimaun e le ira liok menkin, homkwe sa senkin lira, Jisas hiykwe sa papo saw-okrue sawan. Wo, hom sa hyo oiow me pase lokimaun e.

³⁴Sa aw-uwr prueyn hiy yeik non Jisas so nayh-meyk-yowp mon ar-swa-kros kawk. Sa nioh o, hu o, hoh non-swa-nonsow kumey.

³⁵(Uwr, Jisas so lokrue enekwei se ma lorok ira hiykwe, yor hiy ma lira somokwe, hme po mesor kumay kow. Hiykwe nonkway, ok hiy hme ma mesor kumay somokwe, ok-arar. Hiykwe ok somokwe seme mesor kumay kow, hom God se-aw nanpanan kiykiy-ay e.)

³⁶Weynpaweyn somokwe seme mon ousne, ok mamey porih mon ma lwak seme nuw-mon hrahra ha e. Ok sokukwe senkin me, “Hyo oiow kamon nopre hokwe liy lokiaun sow ley.”

³⁷Seyr ok kamon, mamey porih mon ma lwak kokwe senkin me, “Uwrsa homkwe uwr, yeik non ma swapru kawk se kokwe ya lira a.”

³⁸Enekwei sohiy so meyki hokwe sawk Josep, om Arimatea ko hiy lousne nok, Pailat se mesopok, hiy Jisas so owhi-sopok ke hye isay lway nakey e. (Josep hiykwe Jisas so ki-wayh prueyn ouon-aw ma lwak hiy non, payhokuaw, hiykwe Juda mo hakamay me hok.) Pailat hiy sa ipan sehe lon. Sa Josep hiykwe ley nok, Jisas so owhi-sopok ke kandieys way nok, lway nwakey.

³⁹Sawk uwr Nikodemus, paraw arawh Jisas se ma ley ira nayr pie sohokwe, hiykwe siraw non-e. Nikodemus hiykwe sanda prawk yaprue non se nake. Sanda sohokwe now kreysyar so nioh non monhre. Sanda sohiy so low hei hokwe sankaw, 30 kilogram.

⁴⁰Sa Josep, Nikodemus leys hohkwe Jisas so owhi-sopok ke lway nok, sanda prawk yaprue non sehe Jisas so owhi-sopok ke low neyr-a-neyr kow nok, laplap yaprue non swakuwmay ho-a-ho. Hohkwe senkin sehe lon, Juda mo sopok me lopru kwawk yor mo meyki ley.