Jon 19:5-15

⁵La ne Iesu ga vas su ukamang mi lavatkiam diga vele i mi laban gagas la labantamon memele. La ne Paelat ga lok tidi, “Mina ven i. Neni nga na laradi.”

⁶Se lavamaasa silok la luvuttadi silok at loogu laplavang diga ven ne Iesu, diga xup keretna, “Paxarem i ro at laxaba! Paxarem i ro at laxaba!” Paelat ga lok tidi, “Nemi xa mina lok ka i, la mina vaxarem i ro at laxaba. Nenia axo vuse ka tavasuun kusu ti lok li lumumuat teren.”

⁷Luvuttadi amgomgo diga lok tin keretna, “I epovo do neni na met mila ni ga los polo Laulis Linga atnama, i lok do neni ne Nitna ne Moroa.”

⁸Se ne Paelat ga ronga mo levelinga, neni ga marat aleng.

⁹Neni gamlong uto xeneng at loogu nunuan la ga sue ne Iesu xeretna, “Nenu uga laa meva?” Ketla ne Iesu goxo vorang lususue ren.

¹⁰La ne Paelat ga lok tin, “U xopara una vaase ria? Una xasep do a ruuna lolos kusu ti soxomus asu u, la ri vaxarem box u at laxaba.”

¹¹Iesu ga lok tin keretna, “U ruuna lolos mavana rak mila ne Moroa mun ga raba u min. Na lavanga u lox i ria i lok kapmek, ketla mo laradi ga song araba ia ru, laxakapmek teren i silok aleng.”

¹²Se ne Paelat ga ronga i na, neni ga lok tong pen i do na vuse ka tangas kusu ti soxomus asu ne Iesu. Ketla luvuttadi amgomgo diga xup silok keretna, “Mo do una soxomus asu i, i ven ngan ta do nenu xopmen lentangas at ne Kaisar. Nom laradi ga lox asilox i ngan loorong, kuren la neni laradi munepen mi ne Kaisar.”

¹³Se ne Paelat ga ronga na levelinga, neni ga lam asu ne Iesu ukamang la ni ga xis kopok to at loxot kitkis ting tonga linga, laasen teren do, “Langas Uat.” At lavapaase Ibru diga tong i do Gabata.

¹⁴Na levempanga ga ravasu at lasangaun mi legepu xonaleng at laaleng gagas ti mo laaleng at leluxa at Lovovolo Pe. La ne Paelat ga lok ti mo limixin, “Loorong atnimi na.”

¹⁵Diga xup silok keretna, “Sev amer i. Sev amer i. Paxarem i ro at laxaba.” Paelat ga sue di xeretna, “Kereva, mi vara i do ana vaxarem loorong atnimi ro at laxaba?” La lavamaasa silok diga vorang i rin keretna, “Loorong mun atnema ma ruuna i, neni ne Kaisar.”