Jon 19:32-42

³²Ke foron tom fapaket ri ka la ma ri ka bai foron keken iun kaltu ae ru kulkulik tah tura Iesu, ri bai famu keken neng, ke nami neng.

³³Isau le, aunbiing ri ka la usuf Iesu, ri ka par u aragii le, Iesu ka met tah, pesu biil mang ri bai iun keke.

³⁴Pesu nenge tom fapaket ka so Iesu awii na baba ini nenge lamruut, ma fanpil dah turan dan ka ring suuh.

³⁵Kaltu ae i par ta u, i famalal sanih i par ta u ma orek an fafamalal kia i tekentu. I usum le i orek tekentu ma ka famalal u, isi gam sabin gamek unune.

³⁶Foron tier igii ka tapiek, isi una fasuut orek na Buk na Gogoh le, “Biil rin bai ti tua.”

³⁷Ke arae nenge orek na Buk na Gogoh sabin i tara aragii, “Rin parpar usuf ier ae ri ka so ta u.”

³⁸Namih, Iosep tina Arimatea ka diik Pailat isi punufo Iesu. Iosep i nenge kalalik na fafausum ke Iesu, isau le i mi kum la sau lo, wara le i soke foron famfamu ken fan Iudaia. Pailat ka somangat ke Iosep ka la ma ka kep ufu pununfo Iesu.

³⁹Nikodimas ae na famu i la tah usuf Iesu na nenge wor, i sabin i la tura Iosep. Nikodimas i kep nenge tier ae ri tel u ini iu e tier ae i furung rokap e sana, ma ri foteng u ini mir ke aloi. Ma tatawin lo, i fasih aragii, i tuul e sangful e kilogrem.

⁴⁰Ru ka kep punufo Iesu, ma ru ka afit u ini foron rokap na kaen turan foron tier ae i furung, arae na matngan sal fan Iudaia ri mi la lo una fakilkiliis foron minet.

⁴¹Na falifuh ae ri fakulkulik ta Iesu wah, i mel e nenge mok, ma awii na mok ae, i mel e nenge matanfat fuuh una luun foron minet, ae biil biitom ri luun ti minet ta lo.

⁴²Matan fat ae i fatat sau, pesu ru ka luun pununfo Iesu aiwa. Wara le i e biing una geges ken fan Iudaia una tara na Biingen Mangeh.