Jon 19:27-39

²⁷Tama Jisas agai te sę bidibolo te po wai, “Te naga ida dao.” Tama te sogo te bidigo Maria aga beba odasa pelama, tama Maria aga dali bidai.

²⁸Te silama, Jisas agai koneai, eno sę tigidali megi tama siliyu te ebao, te homu yai. Tialima, Godigo polobadu asęani po me usu numainogo, agai te po wai, “Ena ąį nogonego sobao,” te po wai.

²⁹Ąį tubo nai me deli tede munaluai, tede gasagi yai ąį pągąnaluai. Tama augwaligo te wawi yai bola tiwai nai selama, tama te ugwa te ąįde munama, tama augwaligo te ąį sali ugwa awi dilide kęnama, tama augwaligo Jisas agai te ąį tumainogo te ugwaba selama, mawai.

³⁰Jisas agai te ąį tulama, tama agai te po wai, “Eno yabo sę tigidali te silali,” Jisasgo te po wai. Agai tama po olama, tama aga mage basi gulu, aga noma bidi tagala palama, tama Jisas aga isai.

³¹Te Jisas ni pedaide elali sogo augwaligo te Pasova bo disąwai nai sisi ebo side dao wai. Te do me te Sabat yabo sogo dao, tama te Pasova olo bidibo si te do gagalaibao, te genuai sogo mu dao. Tama tibaso, Juda bage augwaligo homugo te Sabatde te isai bidigo tigi te ni pedaide me daganalubo hagelabo wai. Tama augwaligo Pailat tuni bidibolo te po olama, tama augwaligo te bidi dabe sągą dili togolama, tama megi augwali polo isimainogo yao. Tama isai digi, augwaligo tigi te ni pedaide sao, te po wai.

³²Tama tibaso, te ami bidi dabe pelama, augwaligo te Jisas dali elali bidi si sągą dili togogi pai.

³³Te bidi si sągą dili togolama, tama augwali Jisas munalubo digi aselama suai, tama augwaligo Jisas aga isai digi suai. Tama tibaso, augwaligo Jisas aga sągą dili togobeo.

³⁴Tialima ami bidi me deligo Jisas punali badu sesemonego enai. Tama polo kaneme dali ąį dali geasa dulai, tǫba.

³⁵(Te tebo eno suali, eno po polo wai dao, tama tiyu, dagego duga homu Jisas agaba mumainogo yai. Tama eno te wali po te mu po tama dao. Tama ena digi koneyu, tama eno mu po wabo dao.)

³⁶Te sę tama pedalai, tama Godigo bukude wali po usu numainogo yai. Te bukude asęani po tama wai, “Augwaligo agai dili me deli togogobeo,” te po asęani.

³⁷Tama gasa po me te Godigo bukude asęyu te po wai, “Tama augwaligo te enani bidi teba gedugo tonaluaibao,” te po me asęani.

³⁸Te augwaligo Jisasgo tigide yali sę silama, tama gasa bidi me nogi Josep, Arimatea bulu bidi, agai te gavman tuni bidi Pailatbolo olama, “Jisas tigi eno saio,” te po wai. Te bidi Josep aga Jisas wali pabo bidi dao. Tialima aga te Juda tuni bidi dabe dali wi eyu, tama agai ‘Ena da Jisas wali pabo bidi da,’ po hania wabe. Tama Pailatgo “Usu dao, nago sa,” te po wai. Tama tilama Josep pelama, Jisas tigi sigi pai.

³⁹Te bidi me, agai nogi Nikodemus, te bidi polobadu hasia Jisas bidibo digi hulide asali bidi, aga me asai. Agai te ni kaneme si taluama sesai, te dwagi yai denami ebo nai dao. Tama te nai dila pai nai mu dao, abelabo mone genuai mu dao.