JON 19:21-40

²¹Kendeke Anutue yot takwan gwene pasiya amindane takeakwakga kuke Pailat anzing iniking, “Gata wamu wa matake ‘Judia amindane buyambam tapa,’ ngang matayak kaknga dotdonguke wamu takngatu anzing matayo, ‘Aminu aapata na Judia amindane buyambam tapa ngang yakut tapa anin,’ ngang matayo,” ngang iniking.

²²Iniwa yake anzing yanikut, “Wamu nata gwa matat taknga unzing yuwik,” ngang yaniwan kekekakut.

²³Siwan amak aminu tapaat tapaatda Jesu take amin saamdakane tangukenga itane tauknga panangge natake usanzike sandu sandu ba gomdu gomdu paking. Sike itane siotna kuut paking. Siwan ngana siotna kukgom mamaya aknga apmapa pukunanga gom kake wesinangge apbitaking.

²⁴Apbitake anzing yaking, “Ninda anggomu dua wesinim. Aho. Ninda kat binga tasike nikat nana tapatutakan tapikge tasinim,” ngang yake unzing tasiking siwan Anututane wamu takngatu yakapsa aminu tapatuta tupa siknga ie anzing matakut, “Wa aminda natane tauknga usanzike pake kat binga tasike aminu tapatuta natane siotna takut,” ngang matakut taknga unin tasiwa buya aakut.

²⁵Siwan Jesu tangukingu amin saamdaka wesimu Jesutane mingata une yukut. Iat maya tapaat tapatuatda unekan gatake yuking. Wa yukingu Mariatane uyapna gatu paanatane tange tapatu umana Maria ngang iniking. Ita wawi tapatu umana Klopas ngang inikinggane maatna. Siwan maya tapatu Magdala yot gapmane nanaapa umana Maria ngang iniking kapaaya kuut unekan gatake yuking. Maya waakwau Jesutane amin saamdakane wesim yuking.

²⁶Yuwawa Jesuta kawawan mingaat pandetna tapatu ie take siknga nataak kapaatda wesim yukumayak. Wesim yuwawat kake Jesuta minga anzing inikut, “Ming! Wawi waapa gata waakgae tapso,” ngang inike

²⁷ita pandetna waapa inike, “Natane minga gata minggae tapso,” ngang inikut. Siwan wa inikut tapa na unin. Siwan tapduu wagwene nata Maria take yotnane takuke kayukum.

²⁸Siwana Jesuta anzingu atnatapbut. Itane puyana kuupbam gwa tasiwan puyukgak ngangun. Siwan Anututane wamu matakingu buyana asaawikge ita anzing yakut, “Na yanggae nataat,” ngang yawan

²⁹dopangu gwendu wain yangga kapanga gwa sikut taknga atdopan teking. Siwan wa aminda yanggabam gwene nana misa musatu take yangga waakngane tewa dopbut. Siwan pitamu tapatune ukgaoke Jesutane genane tewa kopbut.

³⁰Tewa kopan Jesuta yangga waaknga bupbuyake tangokenga, “Gwan tasiwa puyukgak,” ngang yakut. Ita unzing yake akgwetawan weenata asakowan akumbut.

³¹Sike tapduu wagwenu Pasova yuwatakak tapduk takwan gwende sangaapa tandakngaking. Siwan yuwatakau wagwenu buyambam siknga gwen ngang natake Judia amindane takeakwakga akupsatane gupna yuwatakak tapduu wagwene amin saamdakane yutningge apbitaking. Apbitake Pailat inike kepi zipmapuke gupna sandetningge iniking.

³²Iniwa ita yanipewan amak aminda kuke aminu Jesuat zipbing kapaatdane kepi zipbuking.

³³Zipbukenga Jesue kuke ngana gwa kumbutna kake Jesutane kepi dua zipmapuking.

³⁴Siwan ngana amak aminu tapatuta ngikngiknga saak gwawayata makut. Mapan zetgaman dakaat yanggaatda epbing.

³⁵Siwan na wamu aaknga matanggat tapata unin kainata kakum taknga matawa siakan singgak. Siwan siakan wamu waaknga kendeke ginda Jesue natake Anututa tapan akgatanimuyaapa dakngake yuak ngang natapa kekeknga siwikge matanggat.

³⁶Siwan Anututane wamu takngatu tupa siknga ayanikapsa apata anzing matakut, “Aminda itane kwatai tapatu dua zipmaputning,” ngang matakut taknga buyana unin aakut.

³⁷Siwan wamu takngatuat anzing, “Aminda aminu wa making kapa katasining,” ngang matakut takngaau buyana unin aakut.

³⁸Siwana aminu tapatu umana Josep ngang iniking. Ita Arimatia yot gapmane nanaapa. Siwan ita Pailatde kuke Jesutane gupnasan tapikge natake inikut. Josep waapa Jesutane wamna atnatapbikat nana tapatu ngana ita Judia amindane takeakwakge akgwauke Jesue banip singgak kaknga atakusopukut. Sike Pailatda katewan ita kuku Jesutane gupnasan sandeke takepbut.

³⁹Iat Nikodimas aminu tupa zikaane ita Jesue apbut tapaatda sandeke takepbumayak. Siwan Nikodimas waapata katau dakaaya umana mel gatu alo ngang yanikainggane inuknga kupiawan pekingu pake aiwa pimapa undanggan kwaidotdonguke Jesue gupnane pasiwat kapanga take siwikge pakapbut. Itane meyana 75 ngang buyambam.

⁴⁰Siwan aminu waapaatda Jesutane gupna sandeke takepuke sanga wa kapanga take siknga akngata gupnane dotdonguke taukga tapat kopbut. Unzing Judia nana aminda amin kwainangge tasikaing binga.