Jon 19:21-37

²¹Mewö ohoiga Juda yeŋgö jike nup galöm yeŋön Pailöt kewö jiget mörök, “‘Juda yeŋgö kiŋ kembuŋina ki,’ mewö kude ohomanmö, kewö ohoman, ‘Nanŋaŋgöra Juda kiŋ kembunina akzal, jiyök.’”

²²Mi möta Pailötnöŋ keu kewö meleŋnök, “Keu lök ohozalaŋgöra mi mönö mewö ahöma.”

²³Yarö azi yeŋön Jisös maripomnöŋ qebagun opo silepöke öröyuaiŋi memba azi 4 sutŋine mendeŋda 4 aiga totoŋine meget. Mewö megetka malukuŋi ahöi megetmö, mi kewögöra ölöp qahö mendeŋget: Mi körekŋanök opo jöhanŋi mohotŋan memeŋa. Opo kitipŋi kitipŋi qahö mindiriba euyök liliklilik uhum megetka emu gegeŋi ahöyök. Miaŋgöra mi bölibapuköra mendeŋbingö osiget.

²⁴Osiba eraum möta kewö jiget, “Mi mitiinga qahö dop kölma. Miaŋgöra ölöp miaŋgö unji qeinga toŋi ahuma.” Mewö jiba unji qegetka Buŋa keu kun ölŋambuk ahök. Keu mi kewö ohoget ahöza, “Yeŋön opo silepökeni memba sutŋine mendeŋda totoŋine memba malukunaŋgö unji mönahot algetka kunöŋ luhut alma.” Yarö azi yeŋön keu miaŋgö dop aket.

²⁵Jisös maripomnöŋ qeget kiniga ambi kewöŋan könaŋe kinget: Jisösgö nam nasöŋi aka Klopas anömŋi qetŋi Maria aka Magdalagö ambi qetŋi Maria.

²⁶Jisösnöŋ namŋi aka wölböt gwarekŋi kösutŋe kinohotka etkeka namŋaŋgöra kewö jiyök, “Namni, mönö nahöngi ki eka tönjoŋgöba malman.”

²⁷Mewö jiba gwarek mi kewö jii mörök, “Mönö namgi ki eka tönjoŋgöba malman.” Mewö jii möta Jisösgö namŋi nalö miaŋgöreŋök waŋgiriga miriŋe anda mohotŋe malohot. Mewö.

²⁸Jisösnöŋ nupŋi pakpak mem teköyöhi, mi möta miaŋgöreŋ Buŋa Kimbigö keu kunöŋ ölŋambuk akŋapköra kewö jiyök, “Ni ogöra ak niŋgiza.”

²⁹Miaŋgöreŋ qem nene kun wain o asölŋambuk miaŋön kokolak qeba tarök. Mi tariga köwet mömöndö kun kahali tandök mi memba wain onöŋ kundumgöba soŋgorep suŋe qesamböta meget öŋgöiga numbuŋe alget.

³⁰Algetka wain o asölŋambuk mi nemba jiyök, “Mönö teköza.” Mewö jiba malmalŋi mosötmamgöra nöröpŋi wambelahöi eri imutŋi koriga nöŋ qeyök. Mewö.

³¹Jisösnöŋ nöŋ qeiga Juda ambazipnöŋ silim miaŋgöreŋ ak-kömukömu kendon tatpingöra jöjöröget. Ak-kömukömu Sabat kendon mi kendon nalö ketaŋi ahök. Miaŋgöra Juda jitŋememe yeŋön waimanjat möta kewö jiget, “Qamöt mieŋön Sabat kendon nalöŋe maripomnöŋ kingetka qahö dop kölja.” Mewö jiba premiö Pailötköreŋ anda kewö qesim waŋgiget, “Gi ölöp jinöŋga anda maripomnöŋ eŋgugeri, yeŋgö töwat sihitŋini kusugetka qamötŋini meköin etme?”

³²Qesim waŋgigetka jim teköiga yarö azinöŋ kaŋgotket. Kaŋgota Jisösbuk maripomnöŋ etkugeri, mi zilaŋ kömumahotköra mutuk yetköreŋök kungö töwat sihitŋi kusuba likep anda kungöreŋ mewöŋanök aket.

³³Mewö aketmö, Jisösgöreŋ kaŋgota eketka lök kömuyök. Mewö eka sihitŋi qahö kusuget.

³⁴Qahö kusugetmö, yarö azi yeŋgöreŋök kunŋan liŋgip memba marömŋi umburatiiga miaŋgöreŋök sep aka o erök.

³⁵Mewö aketka kunöŋ yuai mi jeŋan ehöhi, yaŋön mi naŋgöba jiba ki ohoi ahöi dölki oyoŋje. Keu naŋgöba jiba ohoi ahözawi, mi mönö keu ölŋa akza. Iŋini mewöyök mi möt narimegöra möta keu ölŋa jizawaŋgö dop mötza.

³⁶Yuai mi asuhuyöhi, mi Buŋa Kimbigö keu kunöŋ ölŋambuk akŋapköra asuhuyök. Keu mi kewö, “Yaŋgö sihitŋi mönö kude kusume.”

³⁷Aka Buŋa Kimbigö keu kun kewö ahöza, “Azi utohogeri, yeŋön mönö yaŋgöreŋ göröken jeŋini uba ekŋe.” Iŋini keu yahöt miaŋgöra aka mi möt narime. Mewö.