Jon 19:10-32

¹⁰Pailat ka tara sing i aragii, “Isi sah biil o kiliis iau? Arafah, biil o usum le imel e rakrakai kiak una puk ufu wo ke una fakulkulik wo?”

¹¹Iesu ka kiliis u aragii, “I mel sau e rakrakai kiam una nagogon iau, wara le God i ta u tinbae usuf wo. Isau le kaltu ae i ta ufu ta iau una limam, sinang laulau kia i laumet na sinang laulau kiam.”

¹²Aunbiing Iesu ka use ta u arae, Pailat ka tof u le in puk ufu Iesu tina kamkabet, isau le fan Iudaia ri tongon tautau biitom le, “Male on puk ufu kaltu igii, ke biil o tala Sisar. Seh i tara le i tom e king, i tuui ke Sisar.”

¹³Aunbiing Pailat i ongen u arae, ka fasuuh Iesu ke ka kiis na nian kiiskiis una nagogon na falifuh ae na orek Ibru, ri foteng le Gabata, kamtinan orek ae le falifuh ri tel u ini fat.

¹⁴I e biing una geges isi tel inen na Liuliu Kulef. Ma na sangful ini u e aunbiing, Pailat ka tarah sing fan Iudaia aragii, “Igii e king kimi.”

¹⁵Isau le ri ka tautau le, “Lame ufu! Lame ufu! Fakulkulik u na aupaket!” Pailat ka diik ri aragii, “Gam ier le ian fakulkulik king kimi na aupaket?” Foron laulaumet na pris ri ka kiliis Pailat aragii, “Biil ti king kimem, Sisar sau i e king kirer.”

¹⁶Ke Pailat ka ta ufu Iesu mang usuf foron tom fapaket isi rik fakulkulik u na aupaket. Ke ri ka lame ufu Iesu.

¹⁷Iesu ka kusep aupaket kia tom, ma ka la una falifuh ae na orek Ibru ri foteng u ini Golgota, ma kamtinan as ae le, salan tuan paklun kaltu.

¹⁸Aiwa ri ka fakulkulik Iesu turan iu e kaltu na iun baba, ma Iesu na fatpoto ruh.

¹⁹Pailat ka siit ta nenge sun orek ma ri ka kabet ta u na olon aupaket. Sun orek ae i tara aragii:

²⁰I fuun e fan Iudaia ri wes sisiit ae, wara le falifuh ae ri fakulkulik Iesu lo i fatat isi Ierusalem. Sisiit ae ri siit ta u ini orek Ibru, Latin ke Grik.

²¹Foron laulaumet na pris ken fan Iudaia ri ka ta rakrakai na orek usuf Pailat le, “Gong o siit u le, ‘King ken fan Iudaia,’ isau le on siit u aragii, ‘Kaltu igii i tara le, i tom i King ken fan Iudaia.’”

²²Pailat ka kiliis ri aragii, “Sanih ia ka siit ta u, ia ka siit ta u.”

²³Aubiing foron tom fapaket ri ka fakulkulik ta Iesu, ri ka kep foron kaen ae i afit kale foron kilkiliis kia la ini, ke ri ka tem u una ifet. Neng usuf temtem tikii lo ri. Ke ri ka kep kaen sabin ae i fis u la. Kaen ae biil ti tungtungus lo, i dolo sikit sau.

²⁴Ke ri ka tara sing ri tom le, “Gong kere sisi u, kerek fangfang laki ini isi seh tom in kep u.” Buk Song 22:18 Tier igii ka tapiek isi ik fasuut orek na Buk na Gogoh ae i use u le, “Ri tem foron kaen kiak na fatpoto ri, ke ri ka fangfang laki ini isi seh tom in kep kaen kiak.” Ke, tier ae foron tom fapaket ri ka tel u.

²⁵Tina Iesu ru la kisilik, Maria antu Klopas, ke Maria Makdalin rifet sotih tah awii fatat aupaket ke Iesu.

²⁶Aunbiing Iesu ka par tina turan kalalik na fafausum ae i ier kanaka la isi ru sotih fatat tah, ka tara sing tina aragii, “Tin ier, kem kalalik ae.”

²⁷Ke ka tara sing kalalik na fafausum ae aragii, “Tinam ae.” Tipesu lo e aunbiing ae, kalalik na fafausum ae ka lame pes u una fel kia.

²⁸Iesu ka usum tah le foron foim tikii ka rop mang, ke ka tara aragii, “Ia metdan.” I tara arae isi ik fasuut orek ae na Buk na Gogoh.

²⁹Nenge utut na dan i mel e wain mingin lo aiwa, pesu ri ka falum nenge tier ae i duup pes dan la, ke ri ka luun u na nenge akan au asa e isop, ke ri ka sik fatatkau u una ngusu Iesu.

³⁰Aunbiing Iesu ka yin tikii, ka tara aragii, “Ka rop.” Ke ka fapuh paklu ke ka sokufu liu kia.

³¹Foron famfamu ken fan Iudaia ri ka diik Pailat isi rin bai foron keke tuul ier ae ri falkulkulik ta rituul isi rituul ek met sape, ma rik fapuh ufu rituul tina ituul e aupaket. Ri ka ier isi arae, wara le, i e biing una geges, ma biing namih, in tara na Biingen Mangeh. Pesu biil ri ier isi pununfo rituul in kulkulik na aupaket una Biingen Mangeh kiri.

³²Ke foron tom fapaket ri ka la ma ri ka bai foron keken iun kaltu ae ru kulkulik tah tura Iesu, ri bai famu keken neng, ke nami neng.