Jon 19:1-23

¹Ra o Pailat i itula sur din ben gisen pas o Iesu ma din mirasi namin narus na inaim.

²A kum tene inaim det liko pas in narus ra a loklokono ma det ubek tari unin lorino elar nama kukup anun a king, ma det mar tari namin pepol na malu.

³Det wanan toromi, ma det watungi lena, “Ui a king anun a taro Juda!” Ra det kubu pasor in masarino.

⁴O Pailat i pirso melet, ra i watungi tandet lena, “Mot tama i, iri a ben pirso tari umatamot, sur mot in tasmani lena, ka sio pas tu niraro anunu.”

⁵Ra o Iesu i pirso, di sa mar tari namin narus ra a loklokono unin lorino, ma in pepol na malu. O Pailat i watungi tandet lena, “Mot tama a musano ri!”

⁶Ra a kum lamlabino tene etabor torom o God, ma a kum tene tamtamabat tagun a rumu na etabor det tama o Iesu, det kukukuk lena, “Sak wati unin nanai kutus! Sak wati unin nanai kutus!” Ra o Pailat i watungi tandet lena, “Mot in ben pasi, sur mot ut, mot in sak wati unin nanai kutus. Iau ka sio pas tu niraro anunu.”

⁷A kum te Juda det balu i lena, “Anumet a warkurai i lenri, din um doko i, uni i watungi lena i a Nutun o God.”

⁸O Pailat i longoro a wasiso ri, ra i ngara doko.

⁹I ruk melet usa urumu, ra i ting o Iesu lena, “Ui tagai ui?” Ikut o Iesu ke balu i.

¹⁰O Pailat i watungi tano lena, “Sur asau ra ko balu iau? Ko tasmani lena, a utur ukai a warkurai sur an ulangolango ui, o an sak wat ui unin nanai kutus?”

¹¹O Iesu i balu o Pailat lena, “Ra gunuk o God ken pitar tar a warkurai tam, kalako dekdekim sur un pam tu utna un iau. I mo ra o naro ra i pitar tar iau torom ui sur un warkurai iau, anun a sakino i labo taun anum a sakino.”

¹²O Iesu i watung len tari ra, ra o Pailat i lari sur in ulangolango ru i. Ikut a kum te Juda det kukukuk toromi lena, “Ra un palos ru i, ka mur pasano nama Sisa! Uni taio ra i ulabo pasi lena i a king, i lakai a warkurai anun a Sisa.”

¹³O Pailat i longoro a kum wasiso ri, ra i ben pirso pas o Iesu unago upiso. Numur o Pailat i kis taru una kiskis na warkurai, kura una dino ra di watungi o Gabata una wasiso Ibru. A kukuraino i lena, di ubek bat a piso nama kum watat.

¹⁴Ra in matanas i sa kis lekeleke, o Pailat i watungi tan a taro Juda lena, “Mot tama i, anumot a king ri.” A utna ri, i wanpat una bung na waninar, a bung numugu tan a labino bung na lotu na Wanlakai.

¹⁵A taro Juda det kukukuk dekdek lena, “Sak doko i! Sak doko i! Sak wati unin nanai kutus!” O Pailat i ting det lena, “Mot nemi sur an sak wat anumot a king unin nanai kutus?” A kum lamlabino tene etabor torom o God det balu i lena, “A Sisa sot kut i anumet a king!”

¹⁶Ra o Pailat i pitar tar o Iesu torom a kum tene inaim, sur det in sak wati unin nanai kutus. Ra det ben ru pas o Iesu.

¹⁷O Iesu i pirso gusun a tamon Jerusalem, i los pas anun in nanai kutus ra i wan sur a nubual ra di watungi nama “Nubual na Lor na Minat,” ma una wasiso Ibru di watungi lena o Golgota.

¹⁸Tiro iai, di sak wat tari unin nanai kutus. Ma di sak wat aru musano kai tomo nami, una ru paporino, ma o Iesu i kete potor tander.

¹⁹Ma o Pailat i pitar a wasiso sur din tumus a tumtumus, sur din ubeki sapat netes unin nanai kutus. A tumtumus ra i lena:

²⁰A susut na taro Juda det luk a tumtumus ri, uni a nubual ra di sak wat o Iesu unin nanai kutus iai, i milau kut o Jerusalem, ma di tumus a tumtumus ri una tulu ngas na wasiso, a wasiso Ibru, Latin ma Grik.

²¹A kum lamlabino tene etabor torom o God det watungi tan o Pailat lena, “Gong u tumusi lena, ‘A King anun a taro Juda.’ Un tumusi kut lena, ‘A musano ri i watungi lena i a king anun a taro Juda.’”

²²O Pailat i balu det lena, “A tumtumus ra a sa tumus tari in lenutra.”

²³Ra a kum tene inaim det sa sak wat tar o Iesu unin nanai kutus, det los pas anun a kum malu ra i rakup bat anun a ememar nami, ma det isuaro pasi una a wat na tinibo, arara tene inaim anun ara tinibo. Det los pasi kai anun in namalu ra i pipisi. In namalu ra, katu sunusuk uni, in teken kudulano malu kut.