Jon 19:1-17

¹Silata qetketka Pailötnöŋ Jisös waŋgita anda jiiga yarö azi yeŋön ihilek wahiŋambuknöŋ tauköba qeget.

²Yarö azi yeŋön tauköba mepaqepaik kewö ak waŋgiget: Yeŋön Jisös qeba kösö wahiŋambuk memba köpeiba ila möhamgöba nöröpŋe kölget geiga maluku pisikŋi gugakgugakŋambuk mi köl waŋgigetka geyök.

³Mewö aka kösutŋe areŋgöba kinda jiget, “Owe owe! Juda eŋgö Kiŋ Kembuŋini, owe!” Mewö jiba nuŋgulumŋe gwötpuk qekötahöget.

⁴Mewö mepaqepaik ak waŋgigetka Pailötnöŋ kunbuk yaigepŋe geba kewö jii mötket, “Mötket! Nöŋön azi mi kewöta pinjitŋi kun qahö miwikŋaizal. Miaŋgöra i kunbuk waŋgitpiga eŋgö jeŋine eriga könaŋi mewö möt kutuba ekŋe.”

⁵Mewö jii mötketka Jisösnöŋ eta söndakŋe kini kewö eket: Tosatŋan kösö wahibuknöŋ ila köpeiba nöröpŋe köla maluku pisikŋi gugakgugakpuk köl waŋgigetka kiniga Pailötnöŋ jii kewö mötket, “Azi ölŋi ki eket!”

⁶Mewö jii mötketka jike nup galöm aka naŋgu galöm (sikiriti) yeŋön i eka keu wölwölbuk qeta jiget, “Maripomnöŋ qeget kömuma. Maripomnöŋ qeget kömuma.” Mewö jigetka Pailötnöŋ jitŋine memba kewö jii mötket, “Nöŋön pinjitŋi kun qahö miwikŋaizal. Miaŋgöra iŋini mönö nanŋinök i memba maripomnöŋ qeget kömumbawak.”

⁷Juda jitŋememe yeŋön keu mi möta kapaŋ köla kewö jiget, “Neŋgöreŋ Köna keu ahöza. Keu miaŋgö dop kewöringa kömumawaŋgö dop akza. Nanŋi memba öŋgöba ‘Anutugö nahönŋi akzal,’ jimakza. Miaŋgöra mönö kömupkö buŋaya aiga dop kölma.”

⁸Mewö kapaŋ köla jigetka Pailötnöŋ möta bönŋi wahöriga jönömŋi undui keŋgötŋi mörök.

⁹Mewö möta Jisös waŋgita kunbuk jakömbuak miri uruŋe öŋgöba kewö qesim waŋgiyök, “Gi denikegöra?” Qesim waŋgiyökmö, yaŋön kitipŋi kun qahö meleŋda keu bök kinök.

¹⁰Keu bök kiniga kewö jii mörök, “Gi nöŋgöra keu kitipŋi kun meleŋman me qahö? Nöŋön jim teköbiga pösat gihime me maripomnöŋ guhugetka kömuman. Miaŋgö kukösumŋi mi nöŋgöreŋ ahöza. Miaŋgö könaŋi mötzan me qahö?”

¹¹Mewö jii möta kewö meleŋ waŋgiyök, “Kunöŋ euyaŋgöreŋök kukösum qahö al gihiyök ewö, gi mönö azi omaŋi mala yuai ak niŋgimangö osibanak. Miaŋgöra azi kun daŋön ni göhö böröge al niŋgizawi, yaŋgö siŋgisöndokŋan mönö göhöreŋ pinjit oŋgita ketaŋi akza.”

¹²Mewö meleŋ waŋgiyöhaŋgöra aka Pailötnöŋ Jisös pösari etmapkö kapaŋ kölök. Mewö kapaŋ kölökmö, Juda yeŋön qet gigilahöba kewö jiget, “Pösatnöŋga etma ewö, mönö sisa kiŋgö alaŋi qahö toroqeba aka malman. Kunöŋ nanŋaŋgö möri öŋgöiga ‘Kiŋ kembuya akzal’ jizawi, yaŋön mönö sisa kiŋ tuarenjoŋ ak waŋgiza.”

¹³Mewö jigetka keu mi möta jim kutuiga Jisös waŋgita yaigep etket. Etketka premiö Pailötnöŋ jake kun kötnöŋ ala tömbulget ahöyöhi, miaŋgöreŋ öŋgöba keu jimtekötekögö dum tatatŋe eta tarök. Jake miaŋgö qetŋi Hibru keunöŋ Gabata jimalget. Mi nanine keunöŋ Jake Kötnöŋ mem tömbultömbulŋi.

¹⁴Eta taröhi, Juda ambazipnöŋ wehön miaŋgöreŋ ak-kömukömu kendon tatpingöra jöjöröget. Wehön mi aiga silim bibiŋi dopdowiiga Pailötnöŋ dum tatatŋe tata Juda yeŋgöra kewö jii mötket, “Eket, eŋgö kiŋ kembuŋini ki!”

¹⁵Mewö jii möta qet gigilahöget, “Yapmakek! Yapmakek! Maripomnöŋ qeget kömuma!” Qet gigilahögetka kewö jiyök, “Eŋgö kiŋ kembuŋinaŋgö keuŋi jim teköbiga maripomnöŋ öŋgömapköra jize me?” Mewö jiiga jike nup galöm yeŋön meleŋda jiget, “Sisa kiŋnöŋ mohok kiŋ kembunina akza. Neŋgöreŋ kiŋ kembu murutŋi kun qahö ahöza!”

¹⁶Mewö meleŋda jigetka Pailötnöŋ Jisösgö keuŋi jim teköba maripomnöŋ qeget kömumapköra böröŋine alök. Böröŋine aliga yarö azi yeŋön Jisös memba galöm kölget.

¹⁷Galöm kölgetka nanŋi maripomŋi nanŋak aŋguba siti kutuba yaigep geba gölme kun qetŋi Nöröpsihit qerakzema, miaŋgöreŋ anget. Nöröpsihit qet mi Hibru keunöŋ Golgota qerakze.