John 9:6-16

⁶Anubanila, ni-waban-judangi aaban-guy, marri manubami nima-miyn manaaḻnga, nga anubanila nu-ba-baḻbini ama-bagaḻang-guy.

⁷Nga nu-magayn, ni-yamayn “Ba-ḻaḻagiiyn, ba-yaarri wubani a-wurugu-wuy a-Siloam-guy, nga ba-ba-jarrbina aa-gugu-wuy.” Dani-yung na-Jesus ni-yamayn. Anubani ana-lhal anu-muwaj wu-mayini Siloam, anubani wiijamana ana-wurugu “warra-lharrgang-jinyung aa-gugu-wuy”. Nubagi na-bagaḻang-aladi-nyung ni-ḻaḻagiiyn, nga ni-jarrarriyn, nga bagu ni-bagaḻang-jarrbini. Anubanila, lhugaajgiyalawaj-gaj aḏaba ni-warranggayn. Nga anubuguni niigiyn nigawi-wuy anaanga-wuy, aḏaba ni-ba-maṉdhiiyn ni-warranggaa.

⁸Wugurraayung warruburru-yung warra-wurru-wurruj, anubani anaanga wu-ridiynjini-rruj warubaj bagu-mirri wurru-yaay-yinyung, marri warruburru-yung anubani-yunggaj naagi-yung ni-ba-bagumaa-waj, wani-lhanga-lhangayaani-waj anu-ṉuga, warruburru-yung wunu-nana-nani. Warraawurru-yung wurru-yamayn “Yigaj nga yaagi nubagi-yung na-waḻyinyung, wani-lhanga-lhangayaani-yinyung anu-ṉuga anubani-yunggaj!” wurru-yamayn.

⁹Warruburru-yung warra-mulung-arrgi-yung wurru-yamayn “Yuu nga, dagu nga.” Warra-mulung-aynbaj wurru-yamayn “Waari naadagu-magaa. Yagu wini-nguynju nigawi-yii,” wurru-yamayn. Nigaayung nubagi-yung na-waḻyinyung ni-yamayn “Yii, yaani nga ngaya-waj anubani-yung,” ni-yamayn.

¹⁰Wugurraayung wurru-yamayn “Nuynjaminggarrini nagang aadanu nunggarranggayn-jinyung maaḻamburrg? Yangi-nyung nimbi-maṉdhiyn nagang?” wurru-yamayn.

¹¹Nigaayung ni-yamayn, “Nubagi-yung na-waḻyinyung na-nimuwaj-jung Jesus, nima-miyn manaaḻnga, marri nima-burriyn ama-bagaḻang-guy ngayawi-wuy nga anubani-yung ngani-magayn, ‘Ba-jarrarrang nga bagu ba-yarrbina wubani a-wurugu a-Siloam-duj’. Marri ngaayung nga-ḻaḻagiiyn nga nga-yanggi nga bagu nga-ba-jarrbini nga anaani nga-maṉdhiiyn.” Dani-yung yigaj ni-yamayn.

¹²Nga wugurraayung wurru-yamayn, “Ajiga marri naadagu na-Jesus?” Nigaayung ni-yamayn “Ngaya anaani nga-maḻaḻadi,” ni-yamayn.

¹³Nubagi-yung yaga wunu-yarrijgini warruburru-wuy warra-Pharisee-wuy.

¹⁴Anaani-yung yamba na-Jesus ni-waṉbini yibagi-rruj yi-waḻirr-maṉngulg-duj, manaama-yung nima-maṉdhangi manaaḻnga nga naagi-yung nu-maji-wayn nubagi-yung.

¹⁵Nga warraawurru-yung warra-Pharisee wunu-yambiḻibiḻingaani nubagi-yung na-wurrujung. “Nuynjaminggarrina nunggarranggana-yinyung ana-maaḻamburrg?” wurru-yamayn. Nigaayung ni-yamayn “Nubagi-yung nga na-waḻyinyung ngani-ba-baḻbini-yinyung ngaya, aḻnga-mirri. Marri anaani ngaya ngaarranggana aḏaba,” ni-yamayn.

¹⁶Warra-mulung-arrgi-yung warruburru-yung warra-Pharisee wurru-yamayn, “Nubagi na-Jesus waari aniwu-yandhurrbangaa anaani-rruj ana-lhaawu-runggal ngarraagi-yung-jinyung ngarraaḻirr-maṉngulg-jinyung, niga. Waari nubagi-yung ani-yanggi na-God-gala.” Dani-yung wurru-yamayn. Yagu wugurraayung warra-mulung-aynbaj wurru-yamayn, “Yagu niga-maynji ni-waṉbaaṉbina-yinyung anaaladi, ni-yaminggarrini nubagi yuga yij-mamaaḻang ni-waṉbini na-waḻyinyung-guy nu-maji-wayn niga?” Dani-yung wurru-yamayn. Wurru-yambini wiij-bulawaa-wala ana-lhaawu wugurru.