John 9:3-13

³Me fulweg Jesus ni ga’ar, “Malmit nike tay e dariy rogon ko denen rok ara denen rok e gallibthir rok. Ke malmit ya nge yag ni ngan guy gelngin Got ni nge maruwel u fithik’ i downgin.

⁴Ya thingar da ngongliyed e pi maruwel rok e en ni ir e ke l’oegeg ku gub, u n’umngin nap’an ni kab rran; ya bayi neap’, ma dakuriy be’ nrayag ni nge maruwel.

⁵Ngiyal’ ni gu bay u roy u fayleng e gag e tamilang ngak e girdi’ nu fayleng.”

⁶Ma nap’an ni mu’ i weliy rok e re bugithin ney me thuw Jesus nga daken e but’ me athkuy bochu’uw i but’ ngay nge barbarnag; me liyef nga ruw raba’ i owchen fare mo’on,

⁷me ga’ar ngak, “Mman ngam luknag owchem u lan fa gi Ran ni Siloam.” (Fan e re ngachal ney e “Ka Nol’oeg.”) Ma aram me yan fare mo’on nge luknag owchen, me sul nike guy ban’en.

⁸Ma pi’in yad bbuguliyoror nge pi’in ur guyed ni i man ban’en u m’on ko ngiyal’ney nike guy ban’en e ra fithed ni lungurad, “Gathi ireray fare mo’on ni i par u but’ ngi i man ban’en?”

⁹Me ga’ar boch e girdi’, “I ir,” machane boch e girdi’ e lungurad, “Danga’, gathi ir, ya be’ nta’reb ya’arow.” Ma aram me mang fare mo’on e ga’ar, “I gag e re mo’on nem.”

¹⁰Miyad fith ngak ni lungurad, “I di’in ma gguy ban’en?”

¹¹Me fulweg fare mo’on ni ga’ar, “Fare mo’on ni Jesus fithingan e barbarnag e but’ nge liyef nga owcheg nruw raba’, me yog ngog ni nggu wan nga Siloam nggu luknag owcheg. Ma aram mu gu wan, ma yugu nap’an ni gu luknag owcheg mu gguy ban’en.”

¹²Miyad fith ni lungurad, “Ke yan e cha’nir ngan?” Me fulweg ni ga’ar, “Da gu nang.”

¹³Miyad fek fare mo’on ni immoy nib malmit i yan ngak e pi Farise.