John 8:38-56

³⁸Ayeng Akngey-itwek anenh, atha ingkerrenh anngetherr arek. Alakenh-they atha iletyek arrekantherr. Arrantherr apmwangkwarr apenteyel, arrenty-kenh, atyetyart arrekantherrenh-angkwarr.”

³⁹Rernem Jesus renh ilek, “Abraham-arl atyetyart anwernekantherrenh arrwekeleny.” Jesus-el renh-rnem ilek, “Abraham arraty-angkwarr anenh Akngey-kenh-angkwarr. Arrantherrarl Abraham-kenh-rnem aneyel, arrantherrarl arraty-angkwarr arrpemarl apentetyek.

⁴⁰Atha arrekantherr angka arraty ilek, atharl Akngey-kenh angka awek-penh. Arrantherr ayenh angwareyel, ipmek atwetyek. Abraham-kenh-angkwarr arrantherr Ingkart apentey-angenh arrangkw.

⁴¹Arrantherr arrwekeleny arrekantherrenh-angkwarrant apenteyel, arrenty-areny-kenh-angkwarr.” Rernem Jesus ikwer ilelhek, “Anantherr akwetyenty-wenyarl, anantherran Ingkart Akngey-kenh-rnem inngarl, ament-warl alhey-angenh.”

⁴²Jesus-el renh-rnem ilek, “Akngey apek akngey arrekantherrenh, arrantherr atyeng inkwerelhetyek. Arrangkw, arrantherr atyeng inkwerelhey-angenh. Ayeng Akngey-they apetyek, rantey ayenh arrekantherr-warl thwenek, ayeng ament apetyey-angenh.

⁴³Arrantherr angka atyenh iylpelant aweyel. Arrantherr arlkarirremel angka atyenhek awelhey-angenh.

⁴⁴Arrenty ra atyetyart arrekantherrenh aneyel, arrantherr arrenty ikwer awelheyel. Arrenty rantey irrtywalth aneyel, ahelengkw atwey-angker inngarl. Ra ament ikwerenh-angkwarrant apenteyel. Ra arraty ingkerrenhek iley-angenh, ra Ingkart-kenh angka arraty-angkwarr apentey-angenh. Ran ingwer-rnem akalty-antheyel, irrtywerrerl-ayntetyek. Arrantherr irrtywalth ahern-areny-rnem ingkerrenhel renh awem.

⁴⁵Atha arrekantherr angka innga ilekarl-penh, arrantherr atyeng awelhey-angenharl irrpeltherremel! Arrantherr ayenh apentey-angenh.

⁴⁶Arrantherr ayenh apmwan antwey-angenh atyeng arrantherr arraty awelhetyek. Angka arraty atha ileyel.

⁴⁷Akngey-kenh angkek awelhenty, Akngey-kenh anemarl. Arrantherr Akngey-kenh angka awelhey-angenh, arrantherranap Akngey-kenh-wenyarl.”

⁴⁸Jew ingwer-rnem Jesus-ek angkek, “Nganang Samaria-areny aneyel, artwa arrenty-akert.” Jew-rnem Samaria-areny-rnem-kety arlkarirrenh.

⁴⁹Jesus-el renh-rnem ilek, “Ayengan artwa arrenty-akert-wenyarl. Athan Akngey atyenhant tnakeyel. Arrantherr artwa apmwek-athen ayenh areyel.

⁵⁰Ayeng nthakenh tnakelhey-angenh. Akngeyelant ayenh areyel, rant ayenh mwerr antwem. Akngey ra arrekantherr inkwerelheyelarl, arrantherr ayenh tnaketyek.

⁵¹Atha arrenhantherr arraty ileyel, ingwerenty angka atyenh-angkwarr apententy, ra nthakenh ilwey-angenh.”

⁵²Jew-rnemel renh ilek, “Anantherr kel akalty, ngan arrenty-akert inngarl aneyel! Abraham ilwek, Akngey-kenh angkakert-rnem ilwek arrpemarl. Ngan ilelheyel, angka ngkwenh-angkwarr apententy, nthakenh ilwey-angenh.

⁵³Nganang Abraham-angkwarr ilkwa? Abraham kel ilwek, angkakert-rnem-then ingkerrenh-antey ilwek arrpemarl. Angwenharl ngan ilelheyel?”

⁵⁴Jesus-el renh-rnem ilek, “Ayeng tnakelhey-angenh, arrangkw. Akngey rant ayenh tnakeyel. Arrantherr irrtywerremel ilelheyel Akngey-kenh-rnem-arrpantey. Arrangkwaw!

⁵⁵Arrantherr ikwer akwerrparl, ayengant ikwer akaltyarl. Arraty ayeng ilelheyel, irrtywerrey-angenh. Ayeng ikwer akalty innga, ayeng angka ikwerenhek awelheyel.

⁵⁶Arrwekeleny Abraham-el ayenh iterl-arenh arrwekel-antey ayeng apetyey-alenty ahern nhenh-warl. Ra atyeng inkwerelhek.”