John 6:57-68

⁵⁷Vegu amedo Baba yaku na nifeideyo kana, ma ina dada vegu ameida, ye kaere na irigo amiye ka na dada vegu amego.

⁵⁸Omari gutuna deyo beredi bi mini; yi tutubena vene yaku irigamadi kana de. Irisi muyeyadi. Idu kaere mina beredi irigo bi toga toga ameibobigo.”

⁵⁹Iesu Capernaum ri usa usa yavari oteimagasa mina ago nigamo.

⁶⁰Ini usi dina vene tau mina ago neidesi niyadi, “Mina ago bi gira iniye; kaere yaku neidego?”

⁶¹Idu Iesu ini ukari diba niyo ini ago rofu mumugu nigamadi, dada niyo, “Mina yaku yi mokena moi toe rido ba?

⁶²Idu Amiye di mida sena ameyo sanari dairi bogo mina vesi bi beika mokegedi?

⁶³Sei di Vima bi vegu mado; roaita di vava bi de iniye iniye. Ago ya rofu niyaka bi Vima ma vegu di.

⁶⁴Idu ya vene be bi mokena vari gira de aededi.” (Adina bi senagi diba niyo kaere bi mokena vari gira aena de, ma kaere yaku siri rego.)

⁶⁵Resi niyo, “Mina resi ya rofu niyaka nai Baba yaku maka vava mago vonisi, amiye bi na rofu baegedi.”

⁶⁶Mina usi ini usi dina vene tau ina gedu masi inasa gogo de digamadi.

⁶⁷Mina dada amiye 12 rofu nikaiteyo, “Ya vene feresi digi ka ura rededi ba?”

⁶⁸Simon Peter yaku nikabai reyo, “Varika amiye, una bi kaere rofu digifa? Toga toga ameibobina vegu di ago bi yasa amedo.