John 6:54-67

⁵⁴Ebrybody wa nyam me body an drink me blood, dey got true life wa ain neba gwine end. An A gwine mek um git op fom mongst de dead people an lib gin, pon de las day.

⁵⁵Cause me body de true food fa nyam, an me blood de true drink.

⁵⁶Ebrybody wa nyam me body an drink me blood, dey da lib een me haat, an A da lib een dey haat.

⁵⁷De Fada wa da gii life, e sen me fa come eenta de wol, an de Fada mek me git life. Same way so, A gwine mek ebrybody wa nyam me body git life.

⁵⁸Dis de bread wa come down fom heaben. E ain like dat bread we ole people beena nyam wen dey been dey een de wildaness. Atta wile, dey done dead. Bot de one wa nyam dis bread yah, e gwine git life wa ain neba gwine end.”

⁵⁹Jedus tell de people all dem ting wen e beena laan um een de Jew meetin house een Capernaum.

⁶⁰Plenty people wa beena folla Jedus, wen dey yeh dem wod, dey say, “Dem ting wa e da laan we, dey too haad fa tek. Who kin gree fa do wa e da say?”

⁶¹Jedus been know dat de people beena grumble bout wa e tell um, eben dough nobody ain tell um. So e aks um say, “Dis ting mek oona wahn fa ton way fom me, ainty?

⁶²Well den, wa gwine happen ef oona see de Man wa Come fom God da go back op ta de place weh e come fom?

⁶³God Sperit da gii people life. People ain got no powa fa gii life. De wod dem wa A done tell oona, dey da mek God Sperit, wa da gii life, come ta oona.

⁶⁴Stillyet, some ob oona ain bleebe.” (Fom de time wen Jedus fus staat fa laan de people, e been know dem wa ain gwine bleebe pon um an de poson wa gwine sell um.)

⁶⁵Jedus taak gin say, “Dis de ting wa mek me tell oona say, ain nobody gwine come ta me cep de Fada mek dat one able fa come ta me.”

⁶⁶Fom dat time dey, plenty people wa beena folla Jedus, dey ton back an ain folla um no mo.

⁶⁷Jedus aks de tweb ciple dem say, “Oona wahn fa lef me too?”