John 6:24-36

²⁴Rernem arek, Jesus-arl kwertengerl ikwerenh-rnem-akert alpek. Rernem rtnwewarl nganemel, Capernaum tawen-warl artarnpenhek, Jesus-ek nthwetyek.

²⁵Jesus renh arek-penh, rernem renh ayernek, “Ingkartay, ilenger nga apetyek?”

²⁶Jesus-el renh-rnem ilek, “Arrantherr atnerteng innganem, amernekant iterreyel, atyeng iterrey-angenh.

²⁷Amernek intem-antey iterrey-angenh, ahern-areny-rnem amernekant iterreyel-apeny. Amern ahern-arenyekant iterrey-angenh anayntetyek. Amern ahern-areny arwek amern apmwa, anamerl-antey apmwirrey-angker. Nthakenh itethirrey-angenh amern ahern-areny-angkwarr. Ingkart Akngeyel ayenh arrernek, arrenhantherr itethiletyek, amern anthetyek, itethiley-angker. Arrantherr atyeng-angkwarrant iterretyek.”

²⁸Rernem renh ayernek, “Nthakenh anwantherr irreman, Akngeyek awelh-ayntetyek?”

²⁹Jesus-el renh-rnem ilek, “Akngey-kenh-angkwarr alakenh aynteyel, arrantherr ayenh tnaketyek, rarl ayenh thwenek ahern nhewarl.”

³⁰Rernem renh ilek, “Mwerr-angker nga lwewarrernelha, ilek-ilek mpwara, anwantherr ngenh iterl-aretyek, Akngeyelarl ngenh thwenek ahern nhewarl.

³¹Awank-akerr arrwekeleny-rnem alherlewenh apmer aherretyel. Akngeyel renh-rnem amern alker-arenyel wantenh Moses-angkwarr. Ntwa anwenhantherr amern antherl-aynta arlta arrpanenhel, amern alker-areny. Akngey-kenh pipel aynteyel, arrwekeleny-rnemel arlkwenh amern alker-areny.”

³²Jesus-el renh-rnem ilek arrpemarl, “Atha arrenhantherr arraty innga ilem, Moses-el arrwekeleny-rnem amern alker-areny anthey-angenh. Akngey atyenhelant amern anthey-angker.”

³³Jesus ranemarl ilelhek ikwer-rnem, “Akngeyel thwenek amern irrwerl-areny innga artwapeny. Akngeyelarl thwenek ahern nhewarl.”

³⁴Rernem angkek, “Amern intem-antey antherl-aynta!”

³⁵Jesus ilelhek, “Ayengarl ran amern arrenhantherr itethiley-angker. Atyeng-angkwarr arrantherr apententy, atha arrenhantherr itethiletyek angka atyenhel. Arrantherr atnerteng-apeny anayntetyek. Angka atyenhel atha arrenhantherr itethilem, atnerteng-anem-apeny, amernel itethilem-apeny, kwatyel itethilem-apeny.

³⁶Arrantherr ayenh anngetherr areyel, arrantherr ayenh tnakey-angenh.