John 5:5-27

⁵Edo embo da awa gaeko 38 karu edo atima isira awa ainda pasido atisira.

⁶Edo Iesu embo awa pasido atiri gosisira edo embo awa gaeko tupo atae karu edo atima isira awasedo uso yei nganega isira, “Imo sekago ewamei adi dipapa esi ta?”

⁷Setiri karu embo amimi mina sisira, “Atopatari sasaka eiawa wasiri edo ira awa embo mi na kondade oro umo da wosane sae edo era. Edo na wosadi jarono embo nei mi na derigedo edo giti wosedo era.”

⁸Edo embo awa awodo setiri, Iesu mi uso yei sisira, “Erido iso ewari besi budo edo pepeta eio.”

⁹Edo Iesu awodo setiri burigi be embo awa ewamei isira. Edo umo ewamei edo uso ewari besi budo pepeta adi tuturo isira.

¹⁰Edo wasiri eiawa isira iji awa Jew embomei da tumondebain ari iji de isira awasedo Jew embobo da babojegari mi Iesu mi etiri ewamei isira embo ainda yei sisera, “Imo iso besi budo pepeta esa amimi nangoda agodari bejetesa ko boroko awa mamaso ari iji ra.”

¹¹Edo ungo awodo setero embo amimi mina sisira, “Embo na etiri ewamei etena amimi naso besi budo pepeta anase setiri ena.”

¹²Setiri ungomi uso yei nganega isera, “Embo mo amemi eiedo asase setiri?”

¹³Awarate embo Iesu mi etiri ewamei isira awa Iesu mo averi awa gae ainda be awa Iesu embo jiwae be da teda awasedo.

¹⁴Edo amboda Iesu embo awa Jew embobo da tumondebain ari oro da tambudo uso yei sisira, “Naso ge ingio imo awa ewamei edo atesa awasedo iso wasiri biae awa jamo eio. Edo imo iso wasiri biae awa jamo ae adesa awa wasiri biae nembodiba mi iso karu matu awa derigadira.”

¹⁵Edo umo awa setiri embo awa dodo mambudo Jew embobo da gitijijigegari da yei mambudo embo amemi umo etiri ewamei isira embo awa Iesu ra sisira.

¹⁶Edo umo ungoda yei awa setiri ungoi Iesu buro awa isira tumondebain ari iji de embo etiri ewamei isira awa bekuba isera.

¹⁷Awarate Iesu mina ungoda yei sisira, “Naso Mama awa iji berari buro ira awasedo na daedo naso buro awa mana jamo adira.”

¹⁸Edo umo awodo setiri Jew embobo da gitijijigegari umo doro betarase dipapa isera ko ungomi sisera umo tumondebain ari iji da wasiri awa ambo ambo ae ira edo ko umo sira God awa uso mamo edo umo sira umo awa God ga da inono na.

¹⁹Edo Iesu ungoda bekuba isera ainda mina awa sisira, “Na ingode yei gebe sena mei mana uso kotari buro awa ambo ambo ise adira. Ro uso Mamo mi iri gosira awa umone ira. Ro Mamo mi ira da awodo awa mei da awodo ira.

²⁰Edo Mamo uso mei dubo budo ira awasedo ro umo umosuka ira awa uso mei da yei isaga edo ira. Awarate umo wasiri nenei embo etiri ewamei etira awa derigedo adira awa uso mei mi arase itari bugadira. Edo eiawa irirari gido ingo kove be adewa.

²¹Edo Mamo bebetegari jigari eroro wasiri de atorase itido ira da awodo mei umo amenda yei wasiri itari dipapa adira ainda itadira.

²²Edo Mamo umo umosuka embo kasae ra te uso mei de da embo kasarase goroba ari ititisira.

²³Edo Mamo awodo edo ari embo mi mei sapo adera teta ungo Mamo sapo edo era da awodo. Edo embo ave mei sapo ae edo era awa Mamo umo itiri bugusira awa sapo ae edo era.

²⁴“Na ge be sena, embo ave naso ge ingise amemi na itiri bugusena awa gebe edo ira embo awa gebe ira iji ainde wasiri natopo atari budo ira edo God mi mana umo kasadira. Edo uso asisi awa teta bebetisira da awodo rate boroko wasiri seka bugira.

²⁵Na ingoda yei gebe mi sena. Embo de evetu de boroko atera awa teta bebetegari embobo da awodo rate iji bugadira iji ainde ungomi God da mei da ge ingadera. Edo ungo mi uso ge ingise ungo sekago wasiri de eradera.

²⁶Edo Mamo awa wasiri da susu na da awodo Mamo mi uso yei goroba ari itari edo mei awa wasiri itari susu etira.

²⁷Mamo mei da yei kasari da goroba awa itira ainda be awa umo awa God da mei awa embo isira.