John 5:5-20

⁵Mironari bi amiye yokoi kaere bi lagani 38 gauka reyo.

⁶Iesu yaku mina amiye varegamo vegasa diba niyo ina bi ari doba tora makai varegamo. Ye nikaiteyo, “Ya ura reisa buni nigiya ba?”

⁷Ma nikabai reyo, “Varika amiye, koru kita redori, koruri na moi nena amiye bi koina, ma dadi negi reidari, amiye yokoi bi sena ina ya siko na ebu resi nedo.”

⁸Kamini ina rofu niyo, “Dadisi yi ekama vanau moisi nana re.”

⁹Ye minari maka buni nisi ini ekama moisi nana reyo. Mina bi Sabati medari ogau niyo,

¹⁰ye Jew vene yaku mina moi buni riyo amiye rofu niyadi, “Gua bi Sabati meda, ma ago gira dudu yi ekama uakaigi bi tabu.”

¹¹Idu nikabai reyo, “Amiye kaere na moi buni riyo yaku yi ekama moisi nana re na niyo.”

¹²Ye nikaiteyadi, “Kaere amiye yaku makai reyainedi ya niyo?”

¹³Idu mina buni niyo amiye bi ina toto mina amiye bi kaere, ini adina Iesu bi minari amededi amiye tau gade fogori forovai reyo.

¹⁴Mina usi Sei nivakena yavari baku resi niyo, “Neide, ya bi buni niyo; besa vegu no ga re, de bi beika yokoi no iniye ya rofu vata nigo baebu.”

¹⁵Kamini mina amiye disi Jew vene nioteimaro ina bi Iesu kaere yaku moi buni riyo.

¹⁶Mina resi Jew vene yaku Iesu esika esika maradi, bi Sabati medari mina vegu reyo dada.

¹⁷Idu ina vene rofu niyo, “Nai Baba bi gua toga mina medari moimai redo, ma na ka moimai reida.”

¹⁸Jew vene bi besa umuyegika maina regamadi mina ago dada, adina Sabati meda di ago gira ukero vau reyo maka de, idu ka nigamo Sei bi ini Baba ma mina ago yaku ina bi Sei sa moi yokoi maka riyo.

¹⁹Mina resi Iesu yaku niyo, “Rama iniye ya nida: Mida yaku inike beika yokoi de rego; ini Baba yaku beika redo, mina vesi maka redo. Adina beika Baba yaku redo bi Mida ka makai redo.

²⁰Adina Baba yaku ini Mida uka masi ini beika tau gade inike redo mina oteimado. Ina yaku ka beika tora tora reyainedi oteimago, ye ya vene tururu regedi dada.