John 5:40-47

⁴⁰hauvaa mau mua ghanaghana mavaa na mai tagua ge ku heghau na vola kasila eni.

⁴¹“Inau tu mua kenea na holouto ni tinoni,

⁴²na pukuna inau tu ghilala na vata ni tinoni vaghamiu, mu ghilala tau mua dolovia God tana tobamiu.

⁴³Inau tu mai ta nina maana Tamagu, mi ghau tau mua lavipangotiu. Hauva mana bona siki sakai ke mai ta nina maana heghena ke, geva kau lavipangotia.

⁴⁴Au liona kau lavia na holouto ni tinoni tamiu heghemiu, mau mua tabotabo ge kau lavia na holouto itatana gaia vamua te God. Na pukuna keri te vahola ngangata ge kau taluutuniu!

⁴⁵“Kau bei ghanaghana gea inau ku hurutaboghau ta Tamagu. A Moses tau varava itatana, agaia keri ke hurutaboghau.

⁴⁶Ke vagha kau puku ni taluutuniana Moses ke, ma kau taluutuniu ghua inau, na pukuna gaia te tughunitateu inau ta nina gegere.

⁴⁷?Mana pukuna tau mua taluutunia na hava Moses te gerea ke, mi vei kau nea na taluutuniana na hava tu bosa vanighau?”