John 5:28-43

²⁸Ayenharl awek-penh, arrantherr iterrey-angenh anenherr-arey, atharl arrenhantherr ilem. Ingwer-inger arrewaly-rnemel ayenh aweyenh, ayeng yangkelheyenh ikwer-rnem.

²⁹Ingkerrenh arrewaly-penh itethirrenhey-alpeyenh. Ingwer-rneman arraty-angkwarr anenh-rnem rernem iteth intem-antey aneyenh. Ingwer-rneman apmwangkwarr anenh-rnem, atha renh-rnem akngakeyenh. Ikwer-penh atha renh-rnem irrenteyenh-anem intem-antey.”

³⁰Jesus Jew-rnem-kenh atyetyart-rnem-warl angkek, “Akngeyel ayenh thwenek nhenh-warl. Ayeng nthakenh ament warrkirrey-angenh arrangkw. Ayeng ikwer awelhem, arraty-angkwarr. Atha ingkerrenh arraty-angkwarr tyatemiletyek, angka ikwerenh-angkwarrant, atha amentel tyatyemiley-angenh.”

³¹“Alakenh-anyem ayeng angka atyeng-penh ament ilelhey-angenh. Anyentelant angka ilem, arrantherr ikwer awelhey-angenh. Moses-kenh-angkwarr alakenh aynteyel ament-kenh arrangkwarl.

³²Irrwerl-arenyel angka atyenh arraty ileyel arrpemarl, angka arraty innga, irrkaty rey-antey.

³³Arrantherr angkakert-rnem thwenek John Baptise-emeley-angker ikwer-warl, ayenh rernem iterl-aretyek. John-el ilek angka arraty innga, ayeng irrwerl-areny inngarl.

³⁴Alakenh arrantherr angka John-kenh iterl-aretyek arrantherr ayenh tnaketyek, Akngeyelarl arrenhantherr itethiletyek. John ra ahern-areny arwarl. Angka atyenh ament arrpemarl, irrwerl-areny-kenh.

³⁵John-el-tangkwel angka Ingkart-kenh ilerl-apenh, iwerr arraty-angkwarr apenterl-ayntetyek, lyenenty-akertel iwerr arraty apentem-apeny. Arrantherr ikwer alyep arwa awelhenh.

³⁶John-el arrekantherr arraty innga ilenh angka atyenh. Ayeng warrkirreyel Akngey-kenh rlterrk-akert. Arrantherr ayenh areyenh, arrantherrap Akngey renh iterl-areyenh, rarl ayenh thwenek ahern nhenh-warl.

³⁷Akngeyel arrekantherr ilek arrpemarl angka atyenh, angka arraty innga. Arrantherr Akngey renh awey-angenh, arrantherr renh anngetherr arey-angenh.

³⁸Arrantherr ayenh tnakey-angenharl, rarl ayenh thwenek ahern nhenh-warl. Arrantherr angka ikwerenh-angkwarr apentey-angenh arrangkw.

³⁹Arrantherr angka reytemilek Akngey-kenh pipel aynteyel, arrantherr Akngey-itwel iteth intem-antey anetyek. Angka atyenh anyent ra Akngey-kenh pipel aynteyel.

⁴⁰Ilekek arrantherr atyeng-angkwarr apentetyek ilkelhey-angenharl? Arrantherr atyeng-angkwarr apententy, arrantherr iteth intem anetyek.”

⁴¹Jesus angkek arrpemarl, Jew-rnem-kenh atyetyart-rnemek, “Atha nthakenh ahern-areny-rnem akarriley-angenh, rernem ayenh tnaketyek arrangkw.

⁴²Atha arrenhantherr iterl-areyel, arrantherr Akngeyek ilkelhey-angenh.

⁴³Akngey atyenhel ayenh thwenek rlterrk ikwerenh-akert ahern nhenh-warl. Arrantherr ayenh tnakey-angenh, atyeng irrpeltherremel. Ingwerenty amenterrp apey-alhenty, Akngey-kenh rlterrk-wenyel, arrantherr ikwer inkwerelhem kanper-antey.