John 5:17-36

¹⁷Jesus ra angkek ikwer-rnem, “Akngey atyenh warrkirreyel-apeny, ayengan aleth warrkirreyenh arrpemarl, nthakenh ipmelhey-angenh.”

¹⁸Rernem artewentyel innga ikwer ahelirrek-anem, rarl arlta ltyerrey-angker impen-angkwarr warrkirrenh, rernem artewentyel innga ahelirrek, rarl Ingkart Akngey akem, “Anyent-antey wenh.”

¹⁹Jesus angkek Jew-rnem-kenh atyetyart-rnem-warl, “Atha arrenhantherr arraty innga ileyel. Ayengan Akngey-kenh alerikwan. Nthakenh atha ilek-ilek mpwarey-angenh amentel. Ayengan ikwer-angkwarrant warrkirreyel, rarl warrkirreyel-apeny. Atha Akngey arem, ayeng irrkaty-angkwarr arrpemarl warrkirrem, rarl warrkirreyel-apeny.

²⁰Akngey atyeng ilkelheyel. Ayengan alerikw ikwerenh, ra atyeng lwewarrernem warrk ikwerenh. Ingwer-inger ra atyeng ilek-ilek mwerr-angker ilkwarl lwewarrerneyenh. Arrantherr ayenh aremel, arrantherr apateyenh.

²¹Akngey ipmepenh itethiley-angker. Irrkaty-angkwarr arrpemarl, ingwer-rnem iteth anem atyeng-angkwarran Alerikw-angkwarr. Ingwer-rnem arwa alhewer atha renh-rnem itethilem, ayengarl arlkwenteyel-angkwarr-antey.

²²Akngeyel nthakenh ingwer-rnem ayerney-angenh, apmwangkwarrek apek mwerr-angkwarrek apek. Ra ayenh arrernek, arlta ingkernel atha ingwer-rnem ayernetyek, apmwangkwarr anentyek, mwerr-angkwarr anentyek.

²³Alakenh-they ingkerrenhel ayenh tnakeyenh, irrkaty-angkwarr Akngey rernem tnakeyel-apeny arrpemarl. Akngeyel ayenh ahern nhenh-warl thwenek. Ingwerenty atyeng irrpelthirrenty, ra Akngeyek irrpelthirrem arrpemarl.”

²⁴Jesus ikwer-rnem-warl angkek, “Atha arrenhantherr arraty innga ileyel. Akngey rarl ayenh thwenek ahern nhenh-warl. Ingwerentyel angka atyenh awemel, ayenh arraty tnaketyek, rap iteth intem aneman. Akngeyel renh tyatyemiley-angenh, nthakenh irrwarey-angenh.

²⁵Atha arrenhantherr arraty ileyel. Ingwer-rnem kel innga awelhetyek-anem, atha renh-rnem ileyel-angkwarr, ayengan Akngey-kenh alerikw inngarl. Ingwerenty atyeng awelhenty, ra intem-antey iteth aneman atyeng-angkwarr.

²⁶Akngeyan ingkerrenh itethiley-angker. Ra ayenh arrernek alerikw ikwerenh, atha ingwer-rnem itethiletyek arrpemarl.

²⁷Alakenh-anyem ra Artwa Impen ikwerenh ayenh atyetyart arrernek, atha atyenh-rnem akngaketyek, apmwernem-they.

²⁸Ayenharl awek-penh, arrantherr iterrey-angenh anenherr-arey, atharl arrenhantherr ilem. Ingwer-inger arrewaly-rnemel ayenh aweyenh, ayeng yangkelheyenh ikwer-rnem.

²⁹Ingkerrenh arrewaly-penh itethirrenhey-alpeyenh. Ingwer-rneman arraty-angkwarr anenh-rnem rernem iteth intem-antey aneyenh. Ingwer-rneman apmwangkwarr anenh-rnem, atha renh-rnem akngakeyenh. Ikwer-penh atha renh-rnem irrenteyenh-anem intem-antey.”

³⁰Jesus Jew-rnem-kenh atyetyart-rnem-warl angkek, “Akngeyel ayenh thwenek nhenh-warl. Ayeng nthakenh ament warrkirrey-angenh arrangkw. Ayeng ikwer awelhem, arraty-angkwarr. Atha ingkerrenh arraty-angkwarr tyatemiletyek, angka ikwerenh-angkwarrant, atha amentel tyatyemiley-angenh.”

³¹“Alakenh-anyem ayeng angka atyeng-penh ament ilelhey-angenh. Anyentelant angka ilem, arrantherr ikwer awelhey-angenh. Moses-kenh-angkwarr alakenh aynteyel ament-kenh arrangkwarl.

³²Irrwerl-arenyel angka atyenh arraty ileyel arrpemarl, angka arraty innga, irrkaty rey-antey.

³³Arrantherr angkakert-rnem thwenek John Baptise-emeley-angker ikwer-warl, ayenh rernem iterl-aretyek. John-el ilek angka arraty innga, ayeng irrwerl-areny inngarl.

³⁴Alakenh arrantherr angka John-kenh iterl-aretyek arrantherr ayenh tnaketyek, Akngeyelarl arrenhantherr itethiletyek. John ra ahern-areny arwarl. Angka atyenh ament arrpemarl, irrwerl-areny-kenh.

³⁵John-el-tangkwel angka Ingkart-kenh ilerl-apenh, iwerr arraty-angkwarr apenterl-ayntetyek, lyenenty-akertel iwerr arraty apentem-apeny. Arrantherr ikwer alyep arwa awelhenh.

³⁶John-el arrekantherr arraty innga ilenh angka atyenh. Ayeng warrkirreyel Akngey-kenh rlterrk-akert. Arrantherr ayenh areyenh, arrantherrap Akngey renh iterl-areyenh, rarl ayenh thwenek ahern nhenh-warl.