John 4:9-26

⁹Na vaivine te nia hare na pukuna rana Jew tara mua liokolura na lei tinoni ni Samaria. Keri ge bosa tughu vania, “?Ighoe na Jew, mi nau na vaivine ni Samaria, ivei tea ge o nongiu na inu?”

¹⁰Ma Jesus te bosa tughu vania, “Ge toko ghilalaa nina sonihalavu God, mo ko ghilala ahei te nongigho na inu, keri ge ko nongiu ge ku vahegho na beti maurihali.”

¹¹Na vaivine te bosa tughu vania, “Ighoe na haba, o mua loghoa na vatei lalabeti, me lalo na tuvu. ?Ivei ko va lavia na beti maurihali?

¹²?Ivei tea, ighoe to haba vulea Jacob a kukuamami? Gaia te vaheghai na tuvu eni, ma gaia mana lei dalena mana lei nina sheep tara inu iga.”

¹³Ma Jesus te bosa vania, “Ahei tua ke inuvia na beti eni ke ghoi haga inu so.

¹⁴Ma hei tua ke inuvia na beti ku nia hevei, ke mua ghoi haga inu ghua. Na beti ku vahea eni ke vuravura i lokana ke vahea na beti maurihali, me ke vahea ghua na vola kasila.”

¹⁵Na vaivine te bosa vania, “Aghoe na haba, ko vaheu na beti keri! Ge ku mua ghoi haga inu, mu ku mua ghoi mai lavi beti iani.”

¹⁶Jesus te bosa vania, “Ko tona mo ko holoa mai a taumu mo koro mai iani.”

¹⁷Ma gaia te bosa tughu, “U mua logho taugu inau.” Jesus te bosa vania, “E utuni sughua to bosa to mua logho taumu.

¹⁸Na pukuna ighoe to taudira tua e lima na mane, mana mane to kabu kolua itaeni ke te mua puku ni taumu. To bosa utuni vaniu sughua!”

¹⁹Na vaivine te bosa vania, “Aghoe na haba, u ghilalagho ighoe na prophet sughua.

²⁰Na lei kukuamami iani Samaria tara holohaba God i vuvungana na ghotu Gerizim eni, mi ghau na Jew tara bosa ke mi Jerusalem vamua na komu ka holohabaa igaa God. ?Ivei na bona ni holohaba te uto?”

²¹Ma Jesus te bosa vania, “Vaivine, ko taluutuniu, na bongi ke mai na lei tinoni kara mua holohaba na Mama i vuvungana na ghotu eni pi Jerusalem.

²²Ighau na vure ni Samaria tau mua ghilala pukua hei kau holohaba. Mi ghai na vure ni Jew tai ghilalaa ahei kai holohaba, na pukuna itamami ighai na Jew te puku mai na vola.

²³Mana bona ke mai, nina Tarunga Tabu God, te tatei na utuni nina God, ke maanangira na lei tinoni ge kara puku ni holohabana na Mama. Mana bongi keri mete sara ghua tua itaeni. Na Mama te kenera rahei kara vahea na puku ni holohaba te liona te vagha keri.

²⁴God na Tarunga, mi ta nina maana mughua nina Tarunga Tabu ge na lei tinoni kara tangomana na puku ni holohaba te ulaghana.”

²⁵Na vaivine te bosa vania, “U ghilala na Messiah ke mai, tara holoa nia Christ. Mana bona ke mai, agaia ke taraighai nia na lei totobo soko.”

²⁶Jesus te bosa vania, “Inau tu kokoe vanigho, inau gaia.”