John 4:15-34

¹⁵Arelh angkek, “Atyetyartay, kwaty antha, ayeng anthweng intem anayntetyek, ayeng angkepelarreng ngenty nhenh-warl apey-alperl-anekerr.”

¹⁶Jesus-el arelh renh ilek, “Ntwang anewengkw ngkwenh ikngwerl-alpa.”

¹⁷Ra tyernek, “Ayengan anewek arrangkwarl.” Jesus angkek ikwer-warl, “Nga arratyarl ilelheyel, anew-akert-weny.

¹⁸Ngkwenh anewengkw 5-pel arrwekel anenh. Aley-anem nga artwa ingwer-itwel arwapeny aneyel. Ngarl atyeng ilelhek arratyarl.”

¹⁹Arelh angkek, “Atyetyartay, atha ngenh iterl-areyel, ngan Ingkart-kenh angkakertarl.

²⁰Arrwekeleny-rnem apwert Gerizim nhenh-warl akarrirrenh Ingkartek kwenirretyek. Arrantherr Jew-rnem Jerusalem-warl alhetyek, Ingkartek kwenirremel inkwerelhetyek. Nthenh ra Ingkart-kenh apwert aknganenty innga anwantherr ikwer kwenirrey-alhetyek, arratyek-ayteng? Apwert Gerizim apek? Apwert Jerusalem-itwek apek?”

²¹Jesus-el arelh renh tyernek, “Atyeng awelha. Ingwer-ingeran ingkerrenharl apmer arrpanenhel rernem Akngeyek kwenirreyenh arraty-angkwarr, apwert Gerizim-wenyant-anem Jerusalem-wenyant-anem.

²²Samaria-areny arrantherr arraty-angkwarr apentey-angenh. Alakenh-anyem anwernantherr Jew-rnemel iterl-areyel Ingkart-angkwarr arraty apenterl-ayntetyek. Anwernekantherrant Ingkartel arrwekel-antey angka arrernek, angka ikwerenh arlpimpiletyek, anwekantherr-angkwarr, Jew-rnem-angkwarr.

²³Aley-anem, ingkerrenhel renh tnakerl-ayntetyek inkwerelhemel innga itnweng ikwer anthelhetyek. Aleyan Akngey-kenh Itnwengel renh-rnem Akngey-kenh angka akalty-antheyel-antey, rernem renh arraty-angkwarr apenterl-ayntetyek, akalty anayntetyek iterl-aremel. Akngey arlkwenteyel, alakenh-anyem rernem inkwerelhetyek ikwer.

²⁴Akngeyarlap Itnwengan. Akngey apenteyel-rneman itnweng anthelhetyek, renh tnaketyek innga. Itnweng Rlwartel renh-rnem akalty-antheyel.”

²⁵Arelh angkek, “Atha Christ renh iterl-areyel, Akngeyel awank-akerr arrwekeleny-rnem ilek, renh thwenetyek ahern nhenh-warl. Ra apetyentyel ra anwekantherr ingkerrenh-anem anayntileyenh.”

²⁶Jesus-el renh ilek, “Ayengarl ran anyent angkeyel ngkweng-warl, Christ innga rey-antey ayeng.”

²⁷Kwertengerl ikwerenhel-rnem arey-alpek renh, rarl arelh ikwer-itwel angkenh-antey. Rap renh-rnem apatel-anthek. Rernem angkerrenh, “Ilek arelh ran Jesus ikwer-warl angkeyel?” Rernem Jesus renh ayerney-angenh arrangkw.

²⁸Arelh ra ampwal kwatyek-arelh iwerl-alhek, tawen-warl-anem alpek. Ra tawen-areny-rnem-warl angkek,

²⁹“Apetyenherr-arey, artwa nhak aretyek, ra ingkerrenh iterl-areyel, atharl mpwarek. Artwa ran Christ apek, Akngeyelarl arrwekeleny-rnem ilenh, renh thwenetyek ahern nhenh-warl?”

³⁰Rernem tawen-they anperlarr-alhenh. Rernem Jesus-warl-athek apetyenh, renh aretyek.

³¹Kwertengerl-rnem angkek, “Akalty-anthenh-anthenhay, amern arlkway!”

³²Ra angkek ikwer-rnem-warl, “Atha amern impen atnyeneyel, arrantherr iterl-arey-angenharl.”

³³Kwertengerl-rnem ayernerrenh, “Ingwerentyel apek amern akngetyek ikwer.”

³⁴Jesus angkek, “Ayeng amernekant iterrey-angenh. Atha warrk renh ywerrelhiletyek Akngeyek, rarl ayenh warrk anthek. Alakenh-anyem ayeng Akngeyek warrkirreyel, ayeng rlterrk anayntetyek, amern akngerr atha arlkwenty-penh-apeny.