John 4:13-42

¹³Jedus say, “Ebrybody wa da drink de wata wa dey een dis well gwine tosty gin.

¹⁴Bot ebrybody wa da drink de wata A gwine gim ain neba gwine git tosty no mo. Fa true, de wata A gwine gim gwine be een um like a spring ob wata wa keep on da gim true life wa ain neba gwine end.”

¹⁵De ooman say, “Please sah, gii me dat wata! Den A ain gwine neba git tosty no mo, an A ain gwine haffa come yah ta dis well gin fa git wata.”

¹⁶Jedus tell de ooman say, “Go git ya husban an come back yah.”

¹⁷De ooman say, “A ain got no husban.” Jedus say, “Ya da tell me de trute wen ya say ya ain got no husban.

¹⁸Fibe diffunt man dem done marry ya. An de man ya da lib wid now ain ya husban. Ya da tell me de trute.”

¹⁹De ooman say, “Sah, A see ya a prophet wa God sen.

²⁰We fada beena woshup God ta dis mountain, bot oona Jew people say we mus go ta Jerusalem fa woshup God.”

²¹Jedus tell de ooman say, “Ya mus bleebe wa A da tell ya. De time gwine come wen oona ain gwine woshup we Fada God pon dis mountain, needa een Jerusalem.

²²Oona Samaria people ain know de God wa oona da woshup. Bot we Jew people know de God we da woshup, cause shru de Jew people, God da sabe oda people.

²³Stillyet, de time da come, an e done come now, wen people wa da woshup fa true gwine woshup we Fada God een dey haat. An dey gwine woshup um een de right way, jes like e stan fa true. Cause we Fada God da look fa people like dat fa woshup um.

²⁴God a Sperit, an dem wa woshup um mus woshup um een dey haat an een de right way, jes like e stan fa true.”

²⁵De ooman tell Jedus say, “A know dat de Messiah, wa dey call Christ, gwine come. Wen e come, e gwine splain all ting ta we.”

²⁶Jedus tell um say, “A de one ya da taak bout.”

²⁷Same time Jedus ciple dem come back, an dey been stonish fa see Jedus da taak ta a ooman. Bot ain none ob dem aks de ooman say, “Wa ya wahn?” Needa none ob um aks Jedus say, “Hoccome ya da taak ta de ooman?”

²⁸Den de ooman lef e wata jug an gone back ta town, an e tell all de people dey fa come.

²⁹E tell um say, “Oona mus come see a man wa tell me ebryting A done done. Oona tink e de Messiah?”

³⁰So de people lef town an come ta Jedus.

³¹Same time, Jedus ciple dem beena try fa git Jedus fa nyam sompin. Dey say, “Teacha, please, tek sompin fa nyam.”

³²Bot Jedus say, “A got food fa nyam wa oona ain know nottin bout.”

³³So de ciple dem aks one noda say, “Ya tink somebody done fetch um some food?”

³⁴Jedus tell um say, “Wen A do wa de one wa sen me yah wahn me fa do, an finish op all de wok e gii me fa do, den dat me food.

³⁵Oona kin taak say, ‘Fo mo mont fo haabis, ainty?’ Bot A da tell oona say, look pon de fiel good. De crop done ready fa haabis.

³⁶Eben now de poson wa da cut de crop da git e pay. Eben now e da geda op de crop fa ebalastin life so dat de poson wa da plant de crop an de poson wa da geda um op, all two dem heppy fa true togeda.

³⁷Cause like people say, ‘One poson da plant, an oda poson da geda op de crop.’ E stan so!

³⁸A been sen oona fa haabis de crop een a fiel weh oona ain wok. Oda people done wok um, an oona done gain fom de wok dey done.”

³⁹Plenty people ob Samaria dey een dat town bleebe pon Jedus cause de ooman say, “E tell me ebryting A done done.”

⁴⁰So wen de people ob Samaria come ta Jedus, dey beg um fa stay wid um. An e stay dey two day.

⁴¹Cause e taak ta de people dey, a heap mo ob um come fa bleebe pon Jedus.

⁴²Den dey tell de ooman say, “We bleebe now. Dis time yah, e ain jes cause ob wa ya been tell we. We bleebe now cause wesef done yeh um. An we know dat e de Sabior ob de wol, fa true.”