John 3:3-14

³Jesus-el renh tyernek, “Atha ngenh arraty innga ilem, Nga Akngey-kenh-angkwarr aylpenty, ngap irrngarl arrpemarl ayntem.”

⁴Nicodemus-el apatemel ayernek, “Nthakenharl ayeng irrkngarl arrpemarl aynteyenh. Kel ayeng ilkwerrek!”

⁵Jesus-el renh tyernek, “Atha ngenh arraty innga ilem, nga kwaty-angkwarr Itnweng-angkwarr itethirretyek, nga irrngarl arrpemarl ayntem, Akngey-kenh-angkwarr aylpenty.

⁶Arlkan itethirrem arrwekel arwa ahern-areny-angkwarr, amikw-angkwarr, aynikw-angkwarr. Akngey-kenh ament arrpemarl, Itnweng-angkwarrant itethirrem.

⁷Nga atyeng arraty awelhetyek, ywarn iterrey-angenh atharl ngenh ileyel-angkwarr innga. ‘Nga irrngarl ayntetyek arrpemarl.’

⁸Aweran arwa alhewer-angkwarr pweyel. Ntwa awer aweyel, ntwa iterl-arey-angenh nthenh-they ra apetyeyel. Renh iterl-arey-angenh arrpemarl nthenh-angkwarr ra pweyelan. Alakenh-anyem anwantherr iterl-arey-angenh, nthenh-angkwarr Itnweng Rlwart ikwer-warl apetyem, renh lyertenyilem, artwa-anem ra irrngarl ayntem-anem ampa akely-apeny Itnweng Rlwart-angkwarr.”

⁹Nicodemus-el Jesus renh ayernek, “Nthakenharl alakenhan?”

¹⁰Jesus-el renh ilek, “Ngan akalty-anthenh-anthenh inngan Israel-areny-rnem-kenharl. Ntwa angka nhayneman iterl-arey-areny!

¹¹Atha ngenh arraty innga ileyel. Anwantherr anngetherr arek arrpemarl. Atha iterl-areyel arraty angka irrwerl-areny-kenh-angkwarr, atyenhel-rnem iterl-areyel arrpemarl. Arrantherran anwekantherr awelhey-angenharl.

¹²Atha angka ahern-areny-kenh ngkweng anayntilek. Atha angka ahern-areny-angkwarr anayntilem ngkweng, nga atyeng awelhey-angenharl. Nthakenhan ntwa iterl-areman, atharl angka irrwerl-areny-kenh anayntilem?

¹³Ahern-areny apmer irrwerl-itwek aney-angenh. Artwa Impen Akngey-kenh rant akalty irrwerl-arenyek. Anyent ran irrwerl-they apetyekant.

¹⁴Moses-elarl ampwal rtnwem-arrpantey irrwerlilek apmer arlpaw-itwek, alakenh-anyem artwernemel Artwa Impen Akngey-kenh irrwerlileyenh arrpemarl.