John 2:5-19

⁵Ma aram me ga’ar e chitiningin Jesus ngak e pi’in ntapigpig, “N’en nra yog ngomed ni ngam rin’ed e aram e n’en ni ngam rin’ed.”

⁶Piyu Israel e bay e motochiyel ni pire’ ni yalrad ko meripa’ ni yad ma ta’ ko ba’ rorad e taliw, bochan e ren’ey ma aram e immoy nel’ i rume’ nni ngongliy ko malang ntafen e ran u rom, nra reb mrayag ni nge yan rliw’ ara guyey i gallon ngalan.

⁷Me ga’ar Jesus ngak fa pi’inem ni yad ma pigpig, “Mu suguyed e pi rume’ ney ko ran.” Miyad suguy fapi rume’ ko ran nge mada’ nga nguwelen,

⁸ma aram me ga’ar ngorad, “Mu l’inged boch e ran riy ngam feked i yan ko fare mo’on ni ir e be gagiyegnag e re madnom ney.” Miyad fek i yan ngak,

⁹me ri’ fare ran nike piliyeg ke ngal’ ni wayin. Ma de nang ko gin ni yib e re wayin nem riy (machane fa pi’inem ni yad bogi tapigpig nra l’inged e ran u lan reb fapi rume’ e yad manang); ma aram me pining fare mo’on ni ir e ke mabgol

¹⁰me ga’ar ngak, “Gubin e girdi’ e yad ma pi’ e bin th’abi fel’ e wayin nsom’on, ma nap’an nra pire’ e ke unum e girdi’ riy mfini pi’ e wayin ni gathi rib fel’. Machane gur e kam tay e bin th’abi fel’ e wayin nda mpi’ ke mada’ ko chiney!”

¹¹Ma aram e ke ngongliy Jesus e bin som’on e maang’ang ni ngongliy u lan e binaw nu Kana ni bay u lan e nug nu Galile; Ireram e gin ni dag riy gelngin ni yag ngak u tharmiy, ma aram me mich Jesus u wan’ pi gachalpen.

¹²Ma fa’an nni mu’ me yan Jesus nge chitiningin, nge pi walagen ni pumo’on, nge pi gachalpen nga Kapernaum, miyad par u rom ni in e rran.

¹³Ngiyal’ nem e ke chugur ko madnom ni Paluk’af rok yu Israel, ma aram me yan Jesus nga Jerusalem.

¹⁴Me pir’eg e pumo’on u lan e Tempel ni yad be chuway’ ko garbaw, nge saf, nge bulogol, ma ku errogon e pi’in yad ma thiliyeg e salpiy ni yad bay u tebel rorad.

¹⁵Me ngongliy fen e dimow u yu yil’ i gaf nge tuluf urngin fapi gamanman ngar chuwgad u lan e Tempel, ni saf nge garbaw; me thikiy e tebel rok e pi’in yad ma thiliyeg e salpiy nge wear e salpiy rorad ni wasey u but’;

¹⁶me ga’ar ngak fapi cha’ ni yad be folchuway’ ko bulogol, “Mfeked e pi bulogol nir ngam chuweged u roy! Dab mu ted tafen e Chitamag nib market!”

¹⁷Me yib ngan’ pi gachalpen ni bay ko babyor nib thothup nike ga’ar, “Rogon ni gu be tiyan’ug ko naun rom, i gur Got, e be yik’ u fithik’ag ni bod ba nifiy.”

¹⁸Me sul piyu Israel ngak ngar fithed bbugithin ngak ni lungurad, “Mang maang’ang e rayag ni ngam ngongliy ngam dag riy ngomad ni bay mat’wum ni ngam rin’ e ren’ey ni kam rin’?”

¹⁹Me fulweg Jesus ngorad ni ga’ar, “Mbuthuged e re naun rok Got ney mu gu toy u lan dalip e rran nge m’ay.”