11Jesus-el kwaty-penh wayn mpwarek tawen Cana-itwek apmer Galilee-ek, rlterrk ilkwakertel, kwertengerl ikwerenh-rnemel renh aretyek. Rernem Jesus renh tnakek-anem rlterrk ilkwakert.
12Arlta ikwer-penh Jesus tawen ilkwa Capernaum-warl alhek kwertengerl ikwerenh-rnem-akert. Amikw-then ayteyikw-rnem-then alhek ikwer-angkwarr. Rernem tawen Capernaum-itwek aney-alhek arlta irrpetyel.
13Arlta impen arrer-anem tyenkerr Anperarl Alhek “Passover” rernem arlkwetyek, Jesus kwertengerl ikwerenh-rnem-akert alhek Jerusalem-warl.
14Rap Jew-rnem-kenh tyaty ilkwewarl aketh-ampeny-warl alhek Ra arey-alhek rernemarl pwelek-rnem yep-yep-rnem-then thip rwelyarr-rnem-then tharlemilenh. Ra arek artwernem man-angketyarr taypel-itwek anerl-anenty, man change akngerr-akert.
15Jesus ra arek-penh, ra ikwer-rnem ahelirrek, rernemarl apmwel-areth Akngey-kenh warl-itwek tharlemilenh aker ilek-ilek. Whip ra mpwarek rwep-penh. Artwernem tyaty-they ra irrentek yep-yep-rnem-then pwelek-rnem-then, taypel-rnem akngartewemel, man-angketyarr. Man arlperrty iwek.
16Artwa thip-akert-rnemek ra arlkek, “Thip-rnem arleng akngeynenherr-arey! Nhenhan Akngey atyenh-kenh warlarl. Arrantherr store-anem arrernek apmer nhenh-itwek apmer impen Akngey-kenh!”
17Kwertengerl-rnemel awek-penh, rernem iterl-arek angka Akngey-kenh arrwekelenyarl ayntenh, “Ayeng arraty iterreyel warl ngkwenhek, warl menty artelh-aynteyek. Ayeng ahelirrek apmwel-aretharl-anem anew-anenh, angka Akngey-kenh iley-angker.”
18Jew-rnem-kenh atyetyart-rnemel Jesus arek, rarl ingkerrenh irrentek tyaty ilkwethey, rernem apetyek renh ayernemel, “Akngeyelang ngenh ilanthek, ntwa ingkerrenh tyaty ilkwethey irrentetyek? Arrangkw apek.” Rernem alakenh renh ayernek, ikwer irrpeltherremel.
John 2
John 2:11-18