John 21:5-17

⁵Edo unemi ungo jawo sedo sisira, “Singa banga ingo wo dimbevi ta?” Setiri ungo mi mina sisira, “Da ro baera.”

⁶Edo ungo awodo setero unemi ungoda yei sisira, “Ingoda monga awa ingoda ingo be kena nga demo da pigewo edo ainda wo tambadewa.” Setiri ungo ungoda monga pigedo edo monga awa jumbari nga da vitari awa sago ae isira ainda be awa ungo wo jiwae be burisera awasedo.

⁷Edo Iesu mi ambojimbi da dubo budo isira amimi Peter da yei sisira, “Omone Bada ra.” Edo omone Bada ra ingisira awa Simon Peter umo uso bo tu de isira awasedo uso bo tamo awa budo sekago asugurisira. Edo asugedo umo da kekapuiya isira.

⁸Edo ambojimbi nenei awa wo monga de awa nga de jumbudo ambo da diga da bugusera. Edo ungo awa kiambu beda go wo oiro isera awasedo.

⁹Edo ungo poi da vivitigedo riawo ainda eviri gosisera. Edo ri da awa wo de ambe de eviri gosisera.

¹⁰Edo Iesu mi sisira, “Wo boroko betewa awa nenei budo pou.”

¹¹Setiri Simon Peter mambudo monga awa jumbiri poi da vivitisira. Edo monga awa wo jiwae be mi ato ae isira ungoda ajigari awa 153 awarate monga diwae isira.

¹²Edo Iesu mi ungoda yei sisira, “Puwo indari indawe.” Edo umo awodo setiri ambojimbi ungo oju kiambu de umo averi awa nganega ae doturisera ko ungo gosisera umo awa Bada awasedo.

¹³Awasedo Iesu ungoda yei mambudo ambe ititisira. Edo wo de da awodo isira.

¹⁴Edo Iesu betetiri God mi etiri erido iji tamonde umo umosuka ambojimbi da yei isaga isira.

¹⁵Edo ungo indari indero Iesu mi Simon Peter da yei sisira, “Simon John da mei iso dubo bari naso yei mo embo nenei da dubo bari naso yei da eiedo aeta?” Setiri Peter mi mina sisira, “Ge be Bada, imo gosesa na imo dubo burena.” Edo umo awodo setiri Iesu mi uso yei sisira, “Naso sheep simba eio.”

¹⁶Edo Iesu awodo sedo sekago uso yei sisira, “Simon John da mei imo na dubo buresi ta?” Setiri Peter mi mina sisira, “Gebe Bada imo gosesa na imo dubo burena.” Edo umo awodo setiri Iesu mi uso yei sisira, “Naso sheep simba eio.”

¹⁷Edo Iesu awa sedo sekago uso yei sisira, “Simon John da mei, imo na dubo buresi ta?” Setiri Peter dubo vevera isira ko Iesu iji tamonde umo nganega isira, “Imo na dubo buresi ta?” Edo dubo vevera de uso yei sisira, “Bada imo rora berari gari ra edo imo gosesa na imo dubo burena.” Edo Peter awodo setiri Iesu mi uso yei sisira, “Naso sheep simba eio.