John 21:4-19

⁴Day clean, Jedus gone an stanop pon de sho. Bot de ciple dem ain been know dat been Jedus.

⁵Den Jedus tell um say, “Me fren dem, oona ain ketch nottin?” Dey ansa say, “No, we ain ketch nottin.”

⁶Jedus tell um say, “Tek oona net an shrow um pon de right han side ob de boat. Den oona gwine ketch some fish.” So dey shrow out dey net pon de side weh Jedus tell um. Den dey ain been able fa draw de net back eenside, dey been sommuch fish een de net.

⁷Dat ciple wa Jedus lob tell Peter say, “Dat de Lawd da stanop yonda pon de sho!” Now Simon Peter been tek off e top cloes wa e weah wiles e beena fish. So wen e yeh dat ciple say, “Dat de Lawd,” e jes wrop e top cloes roun esef an jomp eenta de wata.

⁸De oda ciple dem tek de boat an gone ta de sho, da drag de net full op wid fish. De sho ain been faa off. E been bout a hundud yaad.

⁹Wen dey git ta de sho, dey see fish da roas pon coal, an some bread.

¹⁰Jedus tell um say, “Bring some ob de fish wa oona jes ketch.”

¹¹Simon Peter gone back eenside de boat an drag de net ta de sho. Dey been a hundud an fifty-shree big fish wa full op de net. Stillyet, de net ain teah.

¹²Jedus tell um say, “Come an nyam.” None ob de ciple dem hab mind fa aks um say, “Who ya da?” cause dey been know dat de Lawd.

¹³So Jedus gone an tek de bread. Den e gim de fish.

¹⁴Dis mek shree time dat Jedus appeah ta e ciple dem, atta e been git op fom mongst de dead people an lib gin.

¹⁵Atta dey been nyam, Jedus aks Simon Peter say, “Simon, John son, ya lob me fa true mo den all dem oda ciple yah lob me?” Peter ansa Jedus say, “Yeah, Lawd, ya know A lob ya.” Jedus tell um say, “Ya mus feed me lamb dem.”

¹⁶Jedus aks Peter de secon time say, “Simon, John son, ya lob me fa true?” Peter ansa say, “Yeah, Lawd, ya know A lob ya.” Jedus tell um say, “Ya mus mind me sheep dem.”

¹⁷Jedus aks Peter gin say, “Simon, John son, ya lob me?” Peter haat been hebby cause Jedus aks um shree time ef e lob um. So e ansa de Lawd say, “Lawd, ya know all ting. Ya know dat A lob ya!” Jedus tell um say, “Feed me sheep dem.

¹⁸A da tell ya fa true, wen ya been nyoung, ya been able fa dress yasef, an jes git ready an gone wehsoneba ya been wahn fa gone. Bot wen ya done ole, ya gwine scretch out ya han, an noda poson gwine dress ya an tek ya weh ya ain wahn fa go.”

¹⁹(Wen Jedus say dat, e beena show how Peter gwine dead an hona God.) Den Jedus tell um say, “Ya mus folla me!”