John 21:13-25

¹³Iwe sa loh Jesus sala hasi flowa kowe sa ngaler, ngo wol ila sengal mele ye foru ngal yig kowe.

¹⁴Iye mele hasluwel yael Jesus llah ngalir mokwe redabeyal mo wol miril yal molow tefael mo irel maes.

¹⁵Rela mol mo irel mongoy ngo Jesus sa kasiya Simon Pedrus bo, “Simon le gel lol John, ye kkel yam hachangiyey mo imor ika sibis?” Simon Pedrus sa hatefaeli le ye sor bo, “Ngoa, ila sengal ho Samol, gel ngo ho gola le ihachangug.” Jesus yesa kangalu bo, “Hafalir saaf ka layi.”

¹⁶Jesus sa wol kasiya tefaeli le ye sor bo, “Simon le gel lol John, ho hachangiyey?” Pedrus yesa hatefaeli ngo yesa sor bo, “Ngoa, ila sengal ho Samol, gel ho gola le ngang ihachangug.” Jesus yesa wol kangalu bo, “Hafalir saaf ka layi.”

¹⁷Yela molwe hasluwal ngo Jesus yesa wol kasiya bo, “Simon le gel lol John, ho hachangiyey?” Yesa tayikof depel Pedrus irel molwe sa fael suluw yael Jesus kasiya bo, “Ho hachangiyey?” Iwe yesa kangalu bo, “Samol, pangal formel ngo gel ho gola; ho gola le ihachangug!” Iwe ngo Jesus yesa wol kangalu bo, “Hafalir saaf ka layi.

¹⁸Ibe kangalug mala tosal: Yodwe ho chil tarmal ngo te tugul solbos le ho dipli bo hobe loh iyang ngo homa loh. Iwe ngo ho bela malelap, ngo ho bele hadingawey mekla pom, ngo semal yebe fargu sa palugloh solbos le gel hote dipli bo hobe loh iyang.”

¹⁹(Jesus ye kekapta wululul yal be mes Pedrus le yebe kawraloh falmay la yael Deus.) Iwe Jesus yesa kangalu bo, “Dabeyey!”

²⁰Pedrus sa tagul tefael sala wiri molwe redabeyel Jesus we ye kkel yael Jesus hachangi. Iye iy yeramtawe ye roh ngal Jesus irel yodwe re momongol fehaf ngo yesa kasiya bo, “Samol, itey le yebe fangloh gel?”

²¹Yodwe Pedrus yela wiri ngo yesa kasiya Jesus bo, “Samol, ifa sengal iye semal?”

²²Jesus sa hatefaeli, “Hare ngang idipli bo iyebe mel yee, la hola yodla ibe tefaeldoh iyang, ila ngo meda mele ho kasiy iyang? Dabeyey!”

²³Iwe sa medarloh kaptal molwe luwulur panger mokwe redabeyel Jesus, le yeramtale semal ila ye towe mes. Ngo ligdi bo Jesus yete sor le towe mes yeramtale. Jesus ye sor bo, “Hare ngang idipli bo be mel yee, la hola yodla iy be tefaeldoh iyang, ila ngo meda mele ho kasiy iyang?”

²⁴Iye molwe redabeyel Jesus we ye kapta kofael meka, ngo wol iy chog mele ye tefadiy meka lal babior. Iwe ngo hamem ha gola le meka iy ye kapta ila ye katos.

²⁵Ye cholop mekla Jesus ye wol foru. Hare pangal loh meka ngo ye teftafdiy lal babior, iwe ngo yai luluwal ila ye towe daw pangal babior kala lal faileng le.