John 20:1-30

¹Kamini uriyaku gorogoro mukuna nufasa, fura di ourena medari, Mary Magdalene bi guri aeyadi sana bosi guri di ida venari fore biri riyadi bi moi etagae riyadi mina veyo.

²Mina resi raga resi Simon Peter ma Iesu uka mado usi dina amiye yokoi rofu bosi niyo, “Bi Varika amiye guri sanari moi yakuyadi, ma una una toto ini aeyadi sana bi!”

³Ye Peter mina usi dina amiye yokoisa guri aeyadi sana urana boyadi.

⁴Ina vakoi raga regamadi, idu usi dina amiye yokoi Peter ebu resi guri sanari ina iko okisi

⁵agu risi varuka buni maka veyo, idu guri ideri bi de boyo.

⁶Ye Simon Peter usi okisi guri aeyadi sana dui resi varuka buni veyo.

⁷Iesu di ne uruma varuka ini ada efono reyadi ka veyo; bi varuka bunisa ide, idu ini sanari maka firo risi aeyadi.

⁸Kamini usi dina vene yokoi, kaere guri aeyadi sana rofu siko okiyadi, ka bi ini ideri bosi vesi mokena vari gira aeyo.

⁹(Adina mina medari, Sei di ago ina toto, ye muyena dadi rae reyaine dada.)

¹⁰Ye ini usi dina vene bi ini rautu neinei dairisi diyadi.

¹¹Idu Mary bi guri aeyadi sana etofaro are resi isaka nigasa agu risi ideri ne reyo ma

¹²Sei di naivo naivo vima remanu varuka feyo risi Iesu di roaita aeyadi sanari amegamadi ma veyo, yokoi bi ini ada rofu ma yokoi bi ini yuka rofu.

¹³Kamini nikaiteyadi, “Rema, ya bi beika resi isaka nisa?” Ma niyo, “Nai Varika amiye bi moiyadi ma goidu aeyadi bi na toto!”

¹⁴Mina nigasa kero resi Iesu are redo ma veyo, idu bi ina toto.

¹⁵Ye ina rofu niyo, “Rema, beika resi isaka nisa? Ya bi kaere maina reisa?” Ma mokeyo bi muro nari redo amiye yokoi, dada niyo, “Amiye tora, moi diyo vonisi, bi goidu aeyo na oteima ma bosi moigida.”

¹⁶Kamini niyo, “Mary!” Ma kero resi Hebrew agori niyo, “Rabboni!” (Mina ini adina bi “Oteimana amiye”.)

¹⁷Ma niyo, “Ga na avaka moi, adina nai Baba rofu bi dairina kode; idu nai dubuiyaka vene rofu disi nioteima, ‘Nai Baba ma yi Baba rofu dadigida, kaere bi nai Sei ma yi Sei.’”

¹⁸Ye bosi usi dina vene rofu niogau reyo, “Na yaku Varika amiye veyaka.” Resi Iesu yaku niyo ago nioteimaro.

¹⁹Fura di ourena meda uriyenauri, ini usi dina vene bi egogo sanari ida biri risi ae gira resi ideri amegamadi, Jew vene rofu ori reyadi dada. Ye Iesu baesi ini utari are resi niyo, “Uka amuta bi yasa ameyaine.”

²⁰Mina ago ni vau resi bi ini vana ma aveta oteimaro, ye ada reyadi Varika amiye veyadi dada.

²¹Ma dudusa niyo, “Uka amuta bi yasa. Baba yaku na nifeideyo kana, na ka ya nifeideida.”

²²Mina nisi ina fafau asa masi niyo, “Vima kikifa moifa.

²³Amiye yokoi ini vegu no moi erufugedi vonisi, bi koite makugo; ya ini vegu no de moi erufugedi vonisi, de moi koite makugo.”

²⁴Mina ituari Iesu boyori, amiye 12 yokoi roka Thomas, kaere ka roka niyadi Kakafasina, bi ina venesa de.

²⁵Ye ini usi dina vene yaku niyadi, “Una yaku Varika amiye veyafa!” Idu niyo, “Ini vanari ikoko imiyadi sana vesi nai vana ebuna aesi nai vana ini aveta ideri de aegida vonisi, bi toga mokena vari gira de aegida.”

²⁶Gabi fura yokoi koina niyori, ini usi dina vene bi dudusa yava ideri amegamadi ma Thomas bi inasa. Bi yava ida biri risi ae gira reyadi, idu Iesu ini utari baesi are resi niyo, “Uka amuta bi yasa.”

²⁷Resi Thomas rofu niyo, “Yi ebuna minari aesi nai vana ve; yi vana roto risi nai aveta ideri ae. Mokena vari gira de aena ga re, idu mokena vari gira ae!”

²⁸Ye niyo, “Nai Varika amiye ma nai Sei!”

²⁹Kamini niyo, “Yi mokena vari gira aeyo, na veyo dada, idu kaere vene na de veyadi, ma mokena vari gira aeyadi bi buni mago!”

³⁰Ye Iesu yaku ini usi dina vene di nemokori mokena vegu tau regamo, mina buka ideri bi de bura reyo.