John 20:1-25

¹8ibadj e kijeba8acinig e manadjitagani8anig, meg8adj kiabadj e tibikanogobanen, Mani Magdala ki ija 8ibabikiniganikag. Ogi 8abaman dac kitci asinin egi manibinagani8indjin ka odji pidigani8anig.

²E 8abadag ii, ki kitci ki8ebato kidji nda 8abamadjin Simo Pienan acitc pejig kodagian kikinoamaganan, Jesos ka kitci sagiapanin. Mani dac ogi inan: “Ki madji8idjigadeni ka Tibendjigedj o8ia8 8ibabikiniganikag. Ka8in dac nikikendasinanan adi ka iji atcigadenig.”

³Simo Pien acitc kodag kikinoamagan ki ipaidi8ag 8ibabikiniganikag.

⁴Kodag dac 8aa na8adj ki kijibatogoban apitc8in Simo Pien, midac 8intam ki odjitcibatogoban.

⁵Ki camagita e podazig8eabadag 8ibabikinigani. Ogi 8abadanan dac 8ik8eiginiganan kagi abadanigin e 8ik8eiginigadenigobanen Jesosan o8ia8ini e atenigin. Ka8in dac odji pidigesi.

⁶Apitc Simo Pien ka odjitcibatodj, ki pidige 8ibabikiniganikag. Midac ogi 8abadanan 8ik8eiginiganan,

⁷acitc pabagi8anicini Jesosan octig8ani kagi 8ik8eiginigadenigiban. Pepakan dac atebanin ini, egi ojiginigadegin.

⁸Aa dac kodag kikinoamagan ki pidige, 8in nitam kagi tag8icig 8ibabikiniganikag. Ogi 8abadan ega e tag8anig iima Jesosan o8ia8ini, midac ogi teb8etan egi abidjibandjin Jesosan.

⁹Ii apitc, ka8in maci ododji nisidotasina8aban Kije Manidon Omazinaigani kagi ikidomaganigiban panima Jesos kidji abidjibadj.

¹⁰Midac midjinijin ki koki ki8e8ag.

¹¹Mani Magdala taji ma8iban ag8adjik 8ibabikiniganikag. Meg8adj dac e taji ma8idj, ki camagita e podazig8eabadag 8ibabikinigani.

¹²Ogi 8abaman dac nijin ajenin e 8abiganigin okonasini8an, e taji abindjin adi ka iji atenigiban Jesosan o8ia8ini. Ka inik8ecinipanin Jesosan pejig taji abiban, kodag dac ka ijizidecininipanin.

¹³Ini ajenin ogi k8ag8edjimigon: “Ik8e! 8egonen 8edji ma8ian?” Ogi nak8e8ajian: “Ki madji8idjigadeni ka Tibenimijidj o8ia8, acitc ka8in nikikendasin adi ka iji atcigadenig.”

¹⁴Ka ick8a ikidodj ii, ki k8ekigaba8i acitc ogi 8abaman Jesosan e tajigaba8indjin iima. Ka8in dac ododji nisida8ina8asi8an.

¹⁵Jesosan dac ogi k8ag8edjimigon: “Ik8e! 8egonen 8edji ma8ian? A8enen ka nanada 8abamadj?” “Kitige8inni aa,” inendamogoban Mani. Ogi inan dac: “Kicpin kin ka madjina8ad8en, 8idamaocin adi ka iji asadj, midac niga koki odapina.”

¹⁶Jesos ogi inan: “Mani!” Ki k8ekigaba8i dac Jesosikag acitc ogi inan: “Rabboni,” “Kikinoamage8inni” 8a ikidomagag e Coda8inni ijigij8ani8ag.

¹⁷Jesos dac ogi inan: “Ka8in midjiminijiken, ka8in mega maci nidodji ijasi Nidadamikag. A8i ijik nidjiki8eg Nidadamikag e ijaian, ka iji Odadamieg kekina8a. Mi aa Nikije Manidom, ka iji Okije Manidomieg kekina8a.”

¹⁸Mani Magdala dac ogi nda tatibadjimota8an Jesosan okikinoamaganan. Ogi inan dac: “Nigi 8abama ka Tibeniminak!” Ogi 8idama8an dac adi kagi igodjin.

¹⁹E ani onag8icig mi pejig8an ii e kijigag e manadjitagani8ag, kikinoamaganag ki ma8adjiidibanig. Ki kibak8aodizo8ag osa e kosa8adjin Coda8innin ka niganizindjin. Jesos dac kitata ki odji nagozi iima acitc ki tajigaba8i nena8idj 8ina8akag, acitc ogi inan: “Pekadendamo8in kimininom.”

²⁰Ka ick8a ikidodj ii, ogi 8abadaan okikinoamaganan onidjin acitc opimena kagi iji pajiba8agani8idj. E 8abama8adjin Jesosan, ki kitci min8endamog.

²¹Jesos dac mina8adj ogi inan: “Pekadendamo8in kimininom. Mi maia Nidadam kagi pidjinijaojidj ooma akig, mi kenin kidijinijaonom kidji paba ijaieg.”

²²Ka ick8a ikidodj ii, ogi podanan okikinoamaganan acitc ogi inan: “Odapinik Mino Manido kina8akag.

²³Aa8e ke kasiama8eg opatado8inan kada kasiama8agani8i, acitc aa8e ega ke kasiama8eg opatado8inan ka8in kada kasiama8agani8isi,” ki ikido Jesos.

²⁴Pejig Jesos ka midatcin acitc nijindjin okikinoamaganan, Tomas (Thomas), “Aa pejig ka nijonta8igi8adj” ka ijinikanagani8igobanen, ka8in tesiban iima apitc Jesosan ka nagozinipanin.

²⁵Kodagiag dac kikinoamaganag ogi ina8an Tomasan: “Nigi 8abamanan ka Tibeniminak.” Tomas dac ogi inan: “Kicpin ega 8abadaman Jesos ka iji saga8agani8idj onidjikag, acitc kicpin ega taginam8ag ka iji agokenigibanin sagaiganan, acitc kicpin ega saminam8ag ka iji namezidj, ka8in niga teb8etasin.”