John 20:1-16

¹Ye chil ruchupung lemeralel rallawe Sunday ngo Mary Magdalena yesa loh irel pewe ye sala wiri le sa chuyloh porow we piltal molwe hatemal pewe.

²Yesa ddar sa loh irel Simon Pedrus mo apostel we semal we Jesus ye hachangi ye sala kangalur bo, “Resa hachuya Samol mo lal pewe, ngo ha togla lobosle re sala itol mo iyang!”

³Iwe Pedrus mo apostel we semal resa loh irel pey we.

⁴Resa loh le re ddar iwe ngo ye mmid iwe semal mo imol Pedrus iwe ye sala hamoal hola pewe.

⁵Yesa kallong sala wiri mengag kowe ngo iy yete bulong.

⁶Simon Pedrus ye hamirdoh chog yesa bulong lal pewe sala wiri mengag kowe ye mel wototol,

⁷iwe mo mengag we ye dudug ngal molwe chemel Jesus, le ye tamel luwul mengag kowe tot bo ye musloh le ye lul fengal.

⁸Ngo apostel we semal we ye moal hola pewe yesa wol bulong, ye sala wiri mokwe ngo yesa chepar.

⁹(Ir re temedaf chog irel molwe babior we ye santus ye sor le iy yebe molow tefael mo irel maes.)

¹⁰Iwe resa tefael ngal molwe bugter.

¹¹Mary ye su yulgul pewe le ye tetang. Yodwe ye chil tetang ngo yesa hataeplong lal pewe

¹²sala wiri rumal angelus le ye bbechrag mekla mengagur. Re maroro loboswe re itol molwe porgol Jesus iyang le semal ye mel mo wolul ngo semal mo wolpech.

¹³Iwe resa kasiya we bo, “Fefel la, meda mele ho tetang iyang?” Iwe ngo iy yesa sor bo, “Resa hasiloh Samol we yai, ngo itugla lobosle re sala itol mo iyang!”

¹⁴Iwe yesa tagul tefael sala wiri Jesus le ye su loboswe; ngo ye togla le Jesus molwe.

¹⁵Jesus yesa kasiya bo, “Fefel la, meda mele ho tetang iyang? Itey le ho memeri?” Fefel we yebe kachog le chol milay we iy molwe. Iwe yesa kangalu bo, “Hare gel melap mele ho hasi molwe porgol, ngo hosa kangaluyey lobosle ho itol iyang bo ibela hasi.”

¹⁶Iwe ngo Jesus yesa sor bo, “Mary!” Ngo Mary yesa tagul ngali ngo sa sor irel yalol Hebrew bo, “Rabboni!” (Fael mele ila “Sensey.”)