John 1:9-45

⁹Aeni agaia na puku ni marara, na marara te mai tana maramana ge ke maghoradira na lei tinoni soko.

¹⁰Mana Bosa te mai tana maramana, ma sakai vamua God te gonia nia na maramana, hauva mana vure ni maramana te mua ghilalaa.

¹¹Agaia te mai tana komuna heghena, hauvaa mana lei kulana vure oli heghena tara mua holopangotia.

¹²Mana balu so tadira tara holopangotia mara taluutunia. Ma gaira raini te hera na sonihalavu tunuva ge kara dalena God.

¹³Agaira tara mua dalena God na pukuna tara vahura ge ke taonira tana levu ni huli. God heghena vamua te hera na vola vaolu.

¹⁴Mana Bosa te vuha tinoni, me kabu i ghobuda. Mi ghai tai righia nina lada, na lada te loghoa agaia na vahuhu sosopa ta Tamana. Agaia te vonughia na sonihalavu mana utuni.

¹⁵John te bosa tatea me ghaghua, “Agaia eni na tinoni tu bosa na bona tu ghaghua, ‘Agaia ke tumuriu mai, hauva me haba vuleu inau, na pukuna te ghaha mai tua i naghona na vahuagu.’”

¹⁶Na pukuna nina sonihalavu te sule, te vautoghita soko, me tona haliu so na vautoada haia.

¹⁷God te vahea na vetena nia Moses itadira na vure, mana sonihalavu mana utuni tara mai ta Jesus Christ.

¹⁸E taho mua ahei te vaevanea tua God. Hauvaa ma gaia vamua na Dalena sosopa, na pukuna agaia te God ghua me ghana kolua Tamana, ge tughunitatea vanighita.

¹⁹Aeni na hava John te bosatatea tana bona na lei habadira na Jew i Jerusalem tara nira vetena na balu manesukaghi mana balu mane hahanga tadira na manesukaghi, ge kara huatia John, “?Ahei ighoe?”

²⁰Ma John te mua hove na bosatughu, me bosatate uto maemane vanira me ghaghua, “I mua nau na Christ.”

²¹Ma gaira tara ghoi huatia so, “?Ma hei so ighoe? ?Ighoe Elijah?” Ma John te bosatughu, “Taho, e mua inau, Elijah!” Ma gaira tara ghoi huatia so, “?Ighoe na Prophet?” ra vania. Ma John te bosa tughu, “Taho!”

²²Ma gaira tara ghaghua vania, “?Ko bosa kalea vanighai mai, ahei sughua ighoe? Ighai kai va bosa oli vanira tara vetenaghai mai. ?Na hava ko bosagho heghemu nia?”

²³Ma John te bosa tughu vanira taonia na bosana na prophet Isaiah idania, “Inau na talama ni mangana siki sakai te ghaeghahe tana bona mamaha me ghaghua, ‘Kau goni maemanea na halautuna na Lord ke liu igaa!’”

²⁴Mana balu itadira na lei holabosa, tara nira vetena mai tua rana Pharisee,

²⁵tara ghoi huatia so John, “?Ge to ko mua Christ mo mua Elijah po mua na Prophet ke, mi vei tea ge o gonia na vulitabu?”

²⁶John te bosatughu vanira, “Inau tu vulitabughau nia na beti, ma gaia te tughuru i ghobumiu tau mua ghilala.

²⁷Agaia na mane ke tumuriu mai, hauva me mua managu inau na lavikehana na hahara ni marevona.”

²⁸Na lei totobo raini te kale i Bethany i levu uluna na betitina Jordan, te vulitabu iga John.

²⁹Te roropo ghana mai John te righia Jesus te mai tatana ge ghaghua, “Keri nina Dale Sheep God, te lavikeha na palu ni maramana!

³⁰Aeni gaia na tinoni tu bosaa tana bona tu ghaghua, ‘Na tinoni ke tumuriu mai eni, te haba vuleu inau, na pukuna te hagha mai tua i naghona na vahuagu.’

³¹Inau tu mua ghilala ahei gaia, mi nau tu mai nia vulitabu na beti ge ku tughunitatea gaia vanira rana vure ni Israel.”

³²Ma John te nia hevei nina bosa ni tutughuni eni me ghaghua, “Inau tu righia na Tarunga Tabu te horu mai kokou te vagha na bola, me tegha i vuvungana.

³³Tu mua ghilala inau te vagha agaia sughua na tinoni, sakai vamua God, te vetenau mai ge ku nia vulitabu a beti, te ghaghua vaniu, ‘Na tinoni ge ko vaevanea na Tarunga Tabu ke horu mai me ke mai tegha i vuvungana, agaia keri na tinoni ke nia vulitabu na Tarunga Tabu!’”

³⁴Ma John te ghaghua vanira, “Inau tu righia tua te vagha, mu bosa vanighau ke, ma gaia sughua na Dalena God.”

³⁵Me ghoi roropo ghana mai, John te ghoi tughuru kolura erua nina vaovarongo.

³⁶Tana bona te righia Jesus te tona haliu, agaia te ghaghua, “Keri nina Dale Sheep God!”

³⁷Tana bona erua na vaovarongo toro rongovia te bosaa eni, ge ro tumuria Jesus.

³⁸Ma Jesus te rei pulohi me righira toro tumuria ge huatira, “?Na hava toro kenea?” Ma rogaira toro bosa tughu vania, “?Tarai, ivei to ghanagho?”

³⁹E bosa vanira Jesus, “Mai mo koro righia.” Tana bona ni aho eni te manana na tangi e vati tana nulavi. Ma rogaira toro nia udu moro righia ivei te ghaha, moro kabu itatana na dani udolu.

⁴⁰Ma sakai tadira te rongovia John me taonia Jesus ke, Andrew, na tahina Simon Peter.

⁴¹Me mua hau vaso murina me sodoa hoghona Simon ge bosa vania, “Iroghai toro sodoa tua na Messiah.” (Na ghanaghana ilokana na bosa eni - Christ.)

⁴²Ma Andrew te holaa va Simon ta Jesus. Ma Jesus te vaevanea ge ghaghua, “Na ahamu itaeni ke Simon dalena John, mi ghoe kara hologho nia Cephas.” (Na aha vaghana so Peter).

⁴³Ta ghoi sakai na dani, Jesus te ghanaghana ge ke sara tana bubulo i Galilee. Mi ga te sodoa Philip me bosa vania, “Ko tumuriu!”

⁴⁴Philip na komuna Bethsaida, toro ghahara ghua iga Andrew ma Peter.

⁴⁵Philip te sodoa Nathaniel me bosa vania, “Ighai tai sodoa tua na tinoni Moses te gerea tana buka ni vetena, mana lei prophet tara gerea ta didira na gegere. Agaia Jesus dalena Joseph ni Nazareth.”